LESHELE 141 - BAIBEL (BSI)

Kijiliu Kighini

¹ Ino oku ani, AMPEU; mtazu ilau ighitsulo! kughou ino okuni keno isutsa initsulo.

² Ikighiniye tsungquikeu-ta kipti toi ikhilu tsulo, eno i-u peqhepe inikhukeuye avelau akipti-gho toi ikhilu tsulo.

³ Ikichilo aghukheu lakhi qhitsulo, O AMPEU, imtsu kikhalo aghukheu lakhi qhitsulo.

⁴ Achipikumo shinishikeu launo ikheluvelo eno kixikilamino shikeu lhoksa gholo sukuqhani keu launo ikheluvelo; eno ipelo pano ghulhulo chhosupe kevilo.

⁵ Timi kivimiye ikimiye kelauno ishikighime eno isakiyi pelo, ikemu niye alhoksami launo khilemu agigihu ikhilumo nani, kughengu niye pulhapuju panoqo lhoksa kumla ghochile inikhu acheni.

⁶ Kughou panoqo shou ayehkipemi atuxulo tukulusuni keno, itsaye kuchou kepi timi qono ithilu nani.

⁷ Asu shokho pesu amno shi ghiphove ketoi panoqo saghiye akumoki mukulo kuzaleveke.

⁸ Ikemu inhethiye okudau ju acheni, O AMPEU iLhou; olauno ino ihjelu kepu phucheni; ipelo thivepe kevilo!

⁹ Panonguno ighenguno alichhe shipuakeu launo ikheluvelo, alhoksa shichekemi lichhe launo ikheluvelo.

¹⁰ Kixikilami pelo pano lichhelo ilulove pelo eno ishipsamono pojolu pelo.