LESHELE 102 - BAIBEL (BSI)

Lhothemi Shiluksami Kighini

¹ Ikighini initsulo, O AMPEU, eno ighugha olau ighilu pelo!

² Kughou ino shiluksalo ani keno ilauno tsughu susu wuve kevilo! Okini ilau kughopuwolo eno ino kukemtsa ikhochile tsulo!

³ Ikuxuye amichhi toi hauve ani, eno ighi anhuye amiphokilo toi pitipuzaqhi ani.

⁴ Niye asutsuni ighuyivekeu toi thibuyivae; niye achuqupu minemo vae.

⁵ Niye sakutu kelauno igha ani; niye ayikono aghi khaluvae.

⁶ Niye asayeqhalo pa likhivekeu pelikan ghau toi ani, ixapinyive keu-alo aqhaqho lakhi ake toi ani.

⁷ Niye azua dapesu zuhumlano ani, niye pa likhivekeu tughashoqhi no aki molelo ake toi ani.

⁸ Atsala kupuju ighumino ipipusa ani; khunono ithaigha chenikeno ghushokelo ije peitha ani.

⁹ Niye asho chu akeshi ayevu chuani, eno inhezuno ino yeakeu zu kite ghi sho ani.

¹⁰ Kughengu ologhu eno oxukighideno hitoi shianipeke; kughengu nono ikhapeqhe puzu ivepuwuveke.

¹¹ Ikuxuye avelau yekukhu toike; niye qhaivekeu sutsuni toivae.

¹² Ikemu no AMPEU ye pulhapujulo akukau; tiqheli kumtsuno okumsulu nani.

¹³ Nono ithu puzu Zion kimiyekutulo, li shou kimiye kepu tuqhudo ighivae; hiye ado achipishi anike.

¹⁴ Oqemino li kimiye cheni, liye kutsapinyive ayeathono; liye ixapinyive pinamu panonguno li kupukeu ani.

¹⁵ Ashiayeh qono AMPEU sumsa nani ayeghilo kukami kumtsuno pa kuka sumsa nani.

¹⁶ Kughou AMPEU no Zion shiqheki theni keno tileno pano paye kiutoi kijekeno pephepiye nani.

¹⁷ Pano pawu timi phevekeqo kighini initsuni, eno panonguno qhuiniju keu pevetsumo nani.

¹⁸ AMPEU no kiu shivetsu keno ighini keu tiqhelimi ghenguno yepesu qhilo, tishianguno ighinikeu tiqhelimino pa sheqhe nani.

¹⁹ AMPEU no pa-a qhemghaikeu akimthe-a kudauno jupiqi, pano kungugha lono ayeghilo jupiqi.

²⁰ Akughu shi akemi ghime ghugha pano chilu, eno thivepeniye kughathavekemi kuqhopheve.

²¹ Ikehu Zion lo paje asheshu nani eno Jerusalem lo pa sheqhe nani;

²² Tiye kughou ashiayeh eno akuka qhano kumtsa ighieno AMPEU mlla nikeno tileno shi nani.

²³ Ilhothe lono AMPEU no ipelo kulhokughomi toi shivepe, Pano ikuxu kughukhovetsu.

²⁴ O Alhou, ino kitemi shimphi loye isasu wuve kevilo. O AMPEU, noye alhokupuju xuacheni;

²⁵ Kha-ghino nono ayeghi lhopheke, eno o-u ampino kungugha mlake.

²⁶ Tipaqoye hauve nani, ikemu noye ache nani; panoqoye aphimini toi aqa shive nani. Nono aphimini toi tipaqo peve nani. eno panoqoye hauve nani.

²⁷ Ikemu noye alhokupujulo athoe eno okuxuye khilemu ashekha shimoke.

²⁸ Ni tianulino akuxu kivilo xu nani, eno nono sushokeu qholono pano tianuliye sushokulu anani.