KUKAMI ATUGHIU 6 - BAIBEL (BSI)

Solomon no Achineki Shi

¹ Israilmino Ijip qhiveno ighivekeu ampe 480 shivekethiu, Solomon no Israilmi shou kakeu ampe abidiu shi akelono aqhi akiniu Ziv shi ake lono Solomon no achineki shithu.

² Achineki tipau alou bocho akushulau miter mukutsuni, akije lau miter toku eno akiqhe lau miter chighi kuthu no tuxa ke.

³ Ikulola akulaghi ye miter bidi tuxa thonhei eno akije lau miter toku ke, tiye akumlla bokutha pahike.

⁴ Achineki lo alasheqoye kumtsu khalacheuye mughughui shike

⁵ khalacheu tozu daghi, akuchughi hula-hila eno ahuu akusau kumtsu homxa aki kikishe kuthu shipuku eno ti aki lakhi khilo akiqhe lau miter kini sentimiter muku ke

⁶ Kodibo lakhi khi lo akijelau miter kini sentimiter muku eno amtau boye akije lau miter kini sentimiter lhotsuni, iku kunguu boye akijelau miter kuthuno sentimiter chighi shike. Ti akumllaki tozuye iqi chhiliu nguno ipumihehei keu lono shike, tishi anguno bokuthaqoye atozulo chopukuno aghuzasu sumonamu puthugho kulupu shi shilu.

⁷ Atuqoye akukubo a lono kishekulu shi mlaveno suwo kithi kimevekeu likhi shie, ikehu ti achineki shi ake aloye kiumu qhoqhoshi keu ghugha momu hesukeu ghughamu shimono vejoi suwo kime luvekeu lono shie.

⁸ Chhiliu kokuthabolo ilonikeu laye achineki apeu kudauno ikulo la shie eno tilauno akijolha akiniu akuthuulo ikukepula shie.

⁹ Ike akukau Solomon no achineki shiqhiluve. Kedar tokta suwo amqha eno amukhusu shilu.

¹⁰ Pano akumllaki homxa kokuthabo mlasu. Kokuthabo lakhi khino akiqhelau miter kini sentimiter muku eno kokuthabo tipaqoye Kedar toktano amukhusu shino akumllaki kuchughi kighijelo shisu.

¹¹ AMPEU tsa Solomon lau ighi:

¹² “Tsala nono iyezahqo eno ahza kumtsu aghokulushi pelu aye, opu David lau kiu piqhi puakeno ino ovechewo shikupu tsuni.

¹³ Ino iwu timi Israilmi gholo nono khikhi akumllaki hipau shi anikeno tipau vechewo ngoni eno niye khilemu panongu phevemoe.”

¹⁴ Ike Solomon no akumllaki shiqhiluve.

Akumllaki Alou Nanu

¹⁵ Alou tozuqoye Kedar tokta suwo aghuza lono iku amqha kutolo mlasu eno aghuza ye sahusu tokta no qhae.

¹⁶ Aloubo pesu Shishe Akimthe-a ku-tsu eno tiye akumllaki chhokiphe kudau mlasu. Ti akushu lau miter toku eno Kedar suno shikeu pesu aghuza lono iku amqha kutolo bokutha sue.

¹⁷ Shishe Akimthe-a zulo bokutha ye akushulau miter chighi tache ke.

¹⁸ Kedar tokta suwo akumllaki bocho alou aye shi kulakulai apoxi eno axamunu puile akeuqo julho shisu; alou bochoye kumtsu Kedar tokta no atuqo nhaghi kuzuve kehu atozulo atu suno mlapuakeu ashouye ithulumoe.

¹⁹ Akumllaki zupou alou bocholo bokutha lakhi shieno tipaulo AMPEU wu Puloshoqhi Bohu qhikepu shie.

²⁰ Ike ilo alou bokutha ye akushulau miter toku, akijelau miter toku eno akiqhelau miter toku eno tiye kumtsu shuna kuchouno kuzue. Akumllaki kiptia ye Kedar tokta no kuzuno mlae.

²¹ Akumllaki sholokuu shunano qhae eno shuna-la huno ilo alou bokuthabo ikulolalo qhie eno tighi shunano kuzupe qhie.

²² Akumllaki alouye kumtsu shunano kuzu eno Shishe Akimthe-a kiptia ghi shunano kuzupe qhie.

²³ Oliv subo no shikeu achishibo kupu Kerubim atuna mlano Shishe Akimthe-a ipikeulo suwo qhie, eno tikuma lakhi khino miter bidino sentimiter lhobidi qhemghaike.

^24-26 Kinikujo koghekughu eno akimighi aqhemi aphiphike. Lakhi khino achishibo kinini pue eno achishibo lakhi khino akushulau miter kinino sentimiter mukuku ke, ikehu achishibo kumtssu lakhiu lono wo lakhi kuma doloye miter bidino sentimiter lhobidi ke.

²⁷ Ti kumaye Shishe Akimthea lo agi kitheghi suwo qhie ike kuma chishibo xakhokeu huno atozu hula hila di-ghi kokuthabo amtau khonhaghi qhie eno achishibo ashe kumtssu no lakhino lakhi dikileghi qhie.

²⁸ Kerubim kuma ye kumtsu shunano kuzupe qhie.

²⁹ Kokuthabo alou tozu eno ilo alou kokuthaboye kumtsu Kerubim, amsabo eno puile akeu xamunu julho shisuwoto.

³⁰ Bokutha ghuza kumtsu shunano kuzupe qhi.

³¹ Shishe Akimthe-a kuchoulo ilonike lalo ahukikha ye oliv suno shikeu kini shi; eno ahukikha kunguuye miliho hila lono mlape qhie.

³² Ahukikhaqo kumtsu Kerubim, amsabo eno puile akeu xamunu julho shisu eno tipaqoye kumtsu shunano kuzue.

³³ Bokuthabo alou lo ilo nikeu hukikhaye oliv suno kodibo hilano mla.

³⁴ Asahusuno mlakeu hukikha kumaye liquchhe kulupushi mlae,

³⁵ eno tipaulo ghi Kerubim, amsabo eno puile akeu xamunu julho shisuno shunano kumtsu kuzupe qhi.

³⁶ Akumllaki zulo ilo alou akikhala kutope qhi eno kujolha kuthu loye atuphano akupuwu shi eno kujolha lakhi loye Kedar toktano amukhusu shie.

³⁷ Akumllaki boqha hukuthu shikeuye aqhi akiniulo Ziv qhi lono Solomon no kakeu mpe abidiu shi akelono huthuke.

³⁸ Aqhi akutacheu, Bul qhilo Solomon no kakeu mpe chighi aqhaqhiu lono Akumllaki akupughu shiqhiluve. Ike Solomon ye akumllaki hipau ampe tsuni lono shiqhiluve.