KUKAMI ATUGHIU 5 - BAIBEL (BSI)

Akumllaki Shinike Kuto

¹ Tur lo akukau Hiram ye David shou kiviu shicheke eno pano kughouno Solomon no papu David zuqhushi akukau shiluve keu chilukeno lashikami pa lau hapuwu.

² Solomon ghi asutsa pesu Hiram lau puwu:

³ “Ipu David ye pa suhomxa pesu akeqo ghakhu sasu tamomithe aghu shiche kehu, paye pa MPEU Alhou mllani keu kumllaki shilumove, AMPEU no pa ghumiqo shou tokulu pa tsumoke kutolo.

⁴ Ikemu AMPEU iLhou no ilughilo kuami kumtsu sasu kulakishi itsulue, niye aghumi kuhae eno khuunomu le ighi nikemi akumsapu kuhae.

⁵ AMPEU no ipu David lau tushoqhie, ‘Onu khuu akukau shipe nike ozuqhulo ino kishelu keno pa pelo akumllaki lakhi shilupe nani.’ Ikehu itehiye ino AMPEU iLhou kumllaki shinikeu xathaluvae.

⁶ Tighenguno owu timiqo Libanon lo puwuno ighenguno Kedar subo yeqhitsulo. Iwu timiqo no owu timiqo sasu kuqhano mla nani eno ino kiu kiumu owu xakutha kiqi lono ajume panongu tsuni. Kughengu nono ithi anike, ninguye Sidonmi toi tokta ghatha thikemi kuhae.”

⁷ Hiram no Solomon sutsa chiluno ighono pa lokivishive eno pi, “Ishino AMPEU shelo kughengu alokutsu nu hitoi ke pesu David zuqhulo ashiayeh hipaqo shou kalupekeu ghenguno!”

⁸ Tishino Hiram no Solomon lau asutsa hipau puwu: “Ino osutsa chiluvae eno nono kiu khu anikeno ti otsunike niye kutope ani. Ino Kedar ngo Sahusu ishi pesu tsuni.

⁹ Iwu timiqo pelono Libanon lono asu akupuju pesu ashuka lo tsughada pukuno azughilono yipe wo nono sughilo pike alo qhitsu peni. Tishino owu timi pelono kuqhovetsu peni eno owu timino xakishe puluve peni. Ike nono shi masakeuye owu timi ghenguno achuqupu tsutsulo,” ipi

¹⁰ Hiram no Solomon no lunishi akeu Kedar ngo sahusu kupuju kumtsu tsulu.

¹¹ Solomon ghi athi ahu kimighi 100.000 eno oliv teli abohu 110,000 pesu ampe ampelo pawu timi lojipenike Harim tsulu.

¹² AMPEU no pa shoqhi shikeu kiqi lono alokutsu pesu Solomon pama dolo kulakishi shilu eno pama kuqhano pulokuqhakeu yezah mlalu.

¹³ Akukau Solomon no Israil yeghi kumtsu lono timi 30,000 pesu akumla lo sulu.

¹⁴ Adoniram pelo panongu shou ampi shilu. Pano amqo kuthu shi kije, amqo lakhi khilo timi 10,000 eno amqo lakhi khino aqhi lakhi Libanon lo ngope eno aqhi kini akilo ngopekeu shilu.

¹⁵ Atolo atu kubo penike ghenguno Solomon no timi 80,000 eno 70,000 no pekishe penikeu shilu.

¹⁶ Pano akumla jukutsu tsupenike attomi 3,300 kutope qhi.

¹⁷ Akukau Solomon zahkutsu lono panonguno atupha kijeje hephono pesu akumlla ki ghuza boqha shilu.

¹⁸ Solomon eno Hiram timiqo ngo Biblo phughi lono ighikemi ishino atu ngo tokta mlapheno Achineki shithu.