KUKAMI ATUGHIU 4 - BAIBEL (BSI)

Solomon wu Atomi

¹ Solomon ye Israilmi kumtsu shou akukau shiluveno

² hipaqono pa qholo atomiqo ke: Achineu: Azaria Zadok nu

³ Kughakutha kudau akiyeu: Shisha nu pama Elihorep eno Ahija Kupasukeu lo ampi shikutsuu: Ahilud nu Jehoshafat

⁴ Ghushimi kudau zahtsuu: Jehoida nu Benaia Achinemi: Zadok eno Abiathar

⁵ State lo Ahngqo shou atou: Nathan nu Azaria Akukau mijekutsu-u: Achineu Nathan nu Zabud

⁶ Akighiki lo aqemiqo shou atou: Ahishar Akumla kishimi shou: Abda nu Adoniram

⁷ Solomon no Israil yeghiqhalo State ahng shipenike timi chighi kini sukusu shilu. Panonguno achuqupu pututa State lono qhapheno akukau eno pa qholo mla akemi tsupe nikeu shi. Aqhi lakhi khino kiphighi ampe kupujulo panonguno achuqupu qhape akukau eno pa qholo mla akemi ghenguno tsupenikeu shike.

⁸ Ike kijemi pano chighi kini je eno panonguno ayehpe akeu State qoye hike: Benhur no Efraim ghakhu shou ahng shilu

⁹ Bendeker no aphughi Makaz, Shaalbim, Beth Shemes, Elon eno Beth Hanan shou ahng shilu

¹⁰ Benhesed no aphughi Arubbot, Soko eno Hefer lughi hipaqo shou ahng shilu

¹¹ Benabinadalo, Solomon nga Tafat lukeuno-Dor ghakhuqha shou ahng shilu

¹² Baana Ahilud nu no aphughi hipaqo Taanak, Megiddo eno Beth Shean phivilo aghakhu akeqo, Jezreel phughi lono chhiliu iqikelo Zarethan phughi kuto shou ahng shilu

¹³ Bengeber no Gilead lo Ramot phughi, eno Jair laghaqhou Gilead lo aphu akeqo, Manasse lono ikowokeu eno Bashan lo Argob ghakhu khilehi aphughi lhotsugho akeno, ti kumtsulo aliwo kuptu eno alazayino shikeu khagho supua keno tipaqo shou ahng shilu.

¹⁴ Iddi nu Ahinadab no Mahanaim state lo ahng shilu

¹⁵ Ahimaaz, Solomon nga kutau Basemat lukeuno Naftali lughi shou ahng shilu.

¹⁶ Hushai nu Baana no Asher ghakhuqha eno Bealot phughi shou ahng shilu.

¹⁷ Parua nu Jehoshafat no Isakhar lughi shou ahng shilu.

¹⁸ Ela nu Shimei no Benjamin lughi shou ahng shilu.

¹⁹ Uri nu Geber no Gilead ghakhuqha khikhi akukau Sihon Amarimi Bashan lo akukau Og pamano qhasupesu achekeno tipau shou ahng shilu. Hipano chighikini nguno alau aqha kumtsu ghenguno ahng lakhi ache.

Solomon Nibonile Kuka

²⁰ Juda eno Israil yeghiqhalo timiqono azughi mukulo asaye toi ikowove; panonguno chu-sho luno ighono alokivi shilu.

²¹ Solomon kukaphu huno Eufrati ghoki lono wo Filistiya eno Ijip lughi kutolo ashiayeh khijehi anikeno ti kumtsu qhachho wove. Panonguno zahme patsu eno pano xu ake kutolo pawu timi shilu khave.

²² Solomon no atsalalo avehupu shikeuye ashomukhu ashoghi 150 eno achuqupuno ahu 300

²³ ashi pubeyi keu amshitsu chighi eno aghalo kumza chekeu mishi muku eno bheri 100 eno tinguno alau aqhu, achuyi ashe eno atha kupu awu ishike.

²⁴ Solomon no Eufrati ghoki kulolau lono huthu susu Tifsa lono Gaza kuto ayehpeche. Eufrati kulola kudau akemi kukami kumtsuno pa qholo ache eno pano achexu lo aghakhu kumtsu sasu kulashi ache.

²⁵ Pano xuake kutolo Juda eno Israil yeghiqha kumtsulo sushokulu qholo ache eno Dan lono Beersheba kutolo akibo kumtsu no pututa tsayilu eno khughuthibo pighilukha.

²⁶ Solomon ye pawu khurkulu sunhekeu khurshi tsu 40,000 eno khurshi kusami 12,000 ishi ache.

²⁷ Pawu ahng chighikiniqo huno aqhi aqhino kivetsughu Solomon ghengu eno pa qholo akuka kighikilo akemiqo ghenguno thwokha avehupu shi akeu kumtsu suwo tsuche.

²⁸ Ahng lakhi khino pa saje lono ashothi ngo aghijini ishi suwo avehupu shikelo patsu eno khurshi kusami eno tughashiqo kumtsu ghenguno ghi achuqupu suwo tsuche.

²⁹ Alhou no alokutsu eno ithipili kulu kighithi mighi khakumla pushi eno akukumsu kuthokuzu azughi mukulo asaye jehi pesu Solomon tsu.

³⁰ Solomon lokutsuye kipelau kighithimi lokutsu momu Ijip lo kighithimi lokutsu nguno alokutsuuke.

³¹ Paye timi kumtsu nguno alokutsuuke: Ezrahitmi Ethan eno Makol nuliqo Heman, Kalkol, Darda noqo nguno alokutsuue eno pa jekipino achexu lo aghakhu akeqo kumtsu lau vekupha wove.

³² Pano ahole 3,000 eno ale 1,000 shou iqi phetsue.

³³ Pano asuboqo eno atsuniqo khikhi Libanon lono Kedar subo acheni eno axamunu atupikiyelo thuipeghi chekeu kumtsu ithie, tinguno alaughi tughashi, aghau, itikiche lhoxu eno akha kumtsu ithie.

³⁴ Ayeghiqha kumtsu lono kukamino pa lokutsu ghili chiluche eno pa tsa ininiye pa lau hapuwuche.