KUKAMI ATUGHIU 1 - BAIBEL (BSI)

David Teasuthiu

¹ Akukau David ye ighono kitemi shive eno pa qemino akulu phi pa puu kemu paye luvuyi mlave.

² Ike pawu atomiqono pa vilo pi, “Akijeu, nino oghenguno ili lhothe lakhi ogholo ngope kepushi phutsuni, tishianguno olamlu lu penie.”

³ Israil yeghiqha kumtsulo ilimi ajukiviu lakhi phuju, ike kuchono Shunem lono panonguno ilimi lakhi Abishag phulu, eno li sasu akukau lau sa ighi.

⁴ Liye ighono ajukivi eno lino akukau kheno pa tuchomujolu, ikemu paye li sasu ashiaji kuqhakeuye shimoe.

Adonija no Akuka Kusuxa

⁵ Itehi David ngo Haggit pama nu Adonija no pa likhi pa putsaghi pi, “Ino akukau shiluveni;” eno pa kutoshino khurkulu eno khurshi kusami gholo timi lhopungu kutolo kutono pa zulo pojupe.

⁶ Papu David ye khilemu pa mlo shipusaghi “Noye kushiye hikithipu shi cheni kya?” pi ghuthu lakhimu pa sakiyi jumphie. Paye ighono phuithai jukivimi lakhi; paye Absalom thikusho ke.

⁷ Pano Joab paza Zeruia ngo Abiathar achineu pama sasu kuptsano pamano pa kuphutsu nikeu shi pulove.

⁸ Ikemu Zadok achineu, Benaia nu Jehoidami, Nathan tungkupuu, Shimei, Rei eno David ghukheuqo ye Adonija gholo pulokuqha tsumoe.

⁹ Ghulo lakhi Adonija no bheri, amshitsu eno atha pubeyikeu mishiti heqhino Apighi Tuqu, Enrogel zupuki akeu phivilo no aghakishi kumlla shie. Pano David nuli kutami eno akukau qholo ighikemi kumtsu ti akumlla ghulhulo kusue,

¹⁰ ikemu paye pa thikuzuu Solomon, tungkupuu Nathan, akukau ghukheu Benaia noqoye ku-sumoe.

Solomon pesu Akukau Shilu

¹¹ Tileno Nathan no Solomon paza Bathsheba lau wuno li iniju, “Haggit nu Adonija no pa likhi pa pesu akukau shive akeu noye chimla aphi kesha? Akukau David ye hipau ghili kumu mtha aphie!

¹² Tsala nono olikhi okuxu eno onu Solomon kuxu xalu nishi aghi aye ino ovilo pianike

¹³ mtazu Akukau David lau wulo eno pa vilo ishi inijulo, ‘Akijeu, noye inu Solomon pelo oshelo kalupe nikeu shi tushoqhi ke kumoke shea? Tishi aye kishi no Adonija pelo Akukau shive anipe kya?’ ”

¹⁴ Nathan no pi, “Nono Akukau David sasu kuptsa aphi lono nighi iloghino nono pi akeuye kuchouke ipi pisukupha tsuni.”

¹⁵ Kuchono Bathsheba no akukau zuabolo ilo. Paye ighono kitemi shive kehu Abishag Shunem limino pa tuchoghi sasu ngo aghi.

¹⁶ Bathsheba no akukau zulo itsaqi, tileno pano iniju, “Noye kiu lunishi ani kya?”

¹⁷ Lino khochile, “Akijeu, nono AMPEU oLhou jelono ivilo tushoqhikeu ye inu Solomon pelo oshelo akukau shipenikeu shie.

¹⁸ Ikemu Adonija no kaluveamu noye tipau kumu mthano aphi.

¹⁹ Pano amshitsu, bheri eno atha pubeyi keu mishiti kutomo heqhino aghakishi tsuvae eno pano onuliqo, Abiathar achineu, owu ghushimi shou zahtsuu Joab ishi aghulhu lo kusue, ikemu paye onu Solomon ye kusumoe.

²⁰ Akijeu, Israilmi kumtsuno khuu pelo oshelo kalu penishi anikeno opelo pitsu penishi anie.

²¹ Nono pitsumo aye, nono thive kemtsa inu Solomon ikujoye jekuchumi kepi peithaniye kuto ani.”

²² Lino hipatsa pi akelono Nathan no akuka kighikilo ighi.

²³ Panonguno Akukau vilo pi, “Nathan tungkupuu hile ighi anie.” Pano iloghino akukau zulo pishiqho.

²⁴ Nathan no pi, “Impeu akukau, noye Adonija pelo oshelo kapeni keu shi pithive tsu akesha?

²⁵ Kughengu ishi tsala lono paye amshitsu, bheri eno atha pubeyike mishiti kutomo heqhino aghakishi kumlla shi ani. Pano onuliqo, Joab owu ghushimi shou zahtsuu Abiathar achineu ishi kusuno itehi panonguye alokivishi pa sasu aghulhu shi ani eno ‘Akukau Adonija pelono axu shupeniu!’ ipi igha anie.

²⁶ Ikemu akijeu paye iku ke kumono Zadok achineu, Benaia oghukheu, onu Solomon hipaqo lakhimu kusumoe.

²⁷ Ikehu akijeu, nono hipaqo shipenikeu shi pulovetsu amu noye ningu hi oqemiqo viloye khuuno oshelo kalupe nikeno pitsumono aphike sha?”

²⁸ Tileno akukau David no khochile, “Bathsheba ilau saghilo.” Ike lino akukau ake alo iloghino akukau zulo puthugho.

²⁹ Tishino pano li vilo pi, “Ino xuakeu AMPEU khuuno iwu shiluksa kumtsu lono ixaphelu keu je lono tushoqhi ani,

³⁰ ino AMPEU, Israil Lhou zulono tushoqhi ani, Onu Solomon pelono ishelo kalupeni, eno pano izuqhushi ikuka lakhulo iqalu nani ipi ino ishi tsala lono piqhi ani.”

³¹ Tileno Bathsheba no akukau gizulo itsaqi asukumsa tsu ghi pi, “Impeu akukau David pelo axupushulu peniu!”

³² Akukau David no pi, “Zadok achineu, Nathan tungkupuu, Jehoiada nu Benaia ishi ilau ku-saghilo.” Ike panonguno akukau zulo ighi.

³³ Tileno akukauno panongu vilo pi, “Iqemiqo nongu gholo sawuno inu Solomon pelono iu khurshi shou iqapeno Gihon zupukilo iqighipelo;

³⁴ tileno Zadok achineu eno Nathan tungkupuu pama pelo teli pe nu tsuno Israilmi kumtsu shou akukau shipenikeu shipelo; afuko ighano ishi pilo, ‘Solomon akukau axupushulu pelo!’

³⁵ Nonguno pa thiu shino iqhoghilo eno pano ighino ikuka lakhulo iqa nani; kughengu pano izuqhushi akukau shiniae; ino pa pelo Israil eno Juda yeghi shou ayehpe penike pa sukusu shivae.”

³⁶ Tileno Benaia Jehoida nuno akukau khochile, “Tishipeniu, eno AMPEU oLhou no tipaulo shikuputsupeni!

³⁷ AMPEU no ni kijeu kukau gholo aighi ketoi Solomon gholo ghi alupeniu, pa kukaye onguno akijeu eno kinikulu shilu peniu.”

³⁸ Tighenguno Zadok, Nathan, Benaia eno Kherethi ngo Pelethi ishino wupuzu akukau David wu khurshi shou Solomon kughuqano Gihon zupuki kutolo pa sasu wu.

³⁹ Tileno Zadok achineu no Oliv teli supuakeu bohu Aphiki lono ikhipheluno pesu Solomon nukisheluve. Tishino panonguno afuko igha; eno timi kumtsuno pi, “Akukau Solomon axupushulu pelo!”

⁴⁰ Tipathiu panonguno alokivishi ighamuku fulili igha eno panongu ghugha huno ayeghi thotsu itha pa papesu wue.

⁴¹ Tipa ghulokilo Adonija eno pawu inamiqo kumtsu aghulhu shitawo cheke lono panonguno asutsa chilu. Kughou Joab no afuko ghugha chilukeno pano iniju, “Aphughilo hi mbumughu igha akeuye kiu kiqi kya?”

⁴² Pano pitamphi lono, Jonathan achineu Abiathar nu ighive; ike Adonija no pi, “Iloghilo, kughengu noye amekua timi lakhi, asutsa kivi sughi aghi nani pi laju ani.”

⁴³ Jonathan no Adonija vilo pi, “Ningu kukau David no Solomon pesu akukau shive tsuae;

⁴⁴ akukauno Zadok achineu, Nathan tungkupuu eno Benaia Jehoida nu, Kherethi ngo Pelethi ishi Solomon gholo puwuvae; panonguno pa pelo akukau wu khurshi shou ikuno chenipe;

⁴⁵ eno Zadok achineu ngo Nathan tungkupuu pamano Gihon zupuki lono pa pelo akukau shipe nike nukisheluvae; panonguye tilehi alokivishi cheiqho cheni kehu aphughilo mbumughu ahukulu shi ani. Ike tipau sutsa nono chilu anie.

⁴⁶ Solomon no akuka lakhulo iqaluvae.

⁴⁷ Tinguno alau akukau qemino ningu kukau David lau ighino ishi pi, ‘OLhou no Solomon pesu onguno ajekipiu shilu peni eno Solomon yehkipe huno onguno kinikuluu shilu peniu.’ Tishino akukau David ghi pa zua lono pishiqhono mllae,

⁴⁸ Akukauno highi ishipi, ‘Israil Lhou AMPEU kumghakeu shilupelo kughengu iji lono ipeghikeu pelo ishitsala lono ikuka lakhulo ngolupe nikeu pulovetsua, inhethino hi ithuluvae.’ ”

⁴⁹ Tileno Adonija wu kukusumiqoye ighono thuthu shive eno panongu lakhi khino puthughono pututa lalo wove.

⁵⁰ Adonija ghi Solomon msa sheveke launo AMPEU no achekeu phikilo ilono akumlla kiptia ichushei ipeghi akeu tsuquluve.

⁵¹ Hipau sutsa Solomon vilo pi, “Julo, Adonija ye akukau Solomon msake launo akumlla kiptia kibo tsuqu pesu ngono ishi pi anie, ‘Akukau Solomon vilo azutakihi pesu pa qeu Adonija pithi pemonike tushoqhi paghi pelo ipi.’ ”

⁵² Solomon no khochile, “Tsala pano aghokulu shi aye pa kutsulo asa lothi lakhimu butsumo nani; ikemu pano tishimo aye paye pithive nani.”

⁵³ Ikehu akukau Solomon no akumlla kiptia lono Adonija sasu iqighipeni keu shive. Adonija no akukau zulo itsaqitsu kelo Solomon no pa vilo pi; “Okilo idewolu nani.”