KUKAMI AKINIU 9 - BAIBEL (BSI)

Israil Kukau Jehu Kishelu

¹ Tipathiu tungkupuu Elisha no lhothemi tungkupu gholo milakhi kuluno pa vilo ishi pi, “Aghili kutono Ramot-Giled lo wulo. Hi oliv teli sukeu bohu pesu wulo,

² tipau-a tolu kemtsa Jehosafat nu Jehu ti Nimshi tilimi phujulo. Pa kusamiqo gholono pa kutashi luthu khakutha bolo sasu ilolo

³ eno oliv teli hipau pesu pa kutsulo lepuku tsuno pilo, ‘AMPEU no shuphetsu anike pano opesu Israil kukau shipenikeu shi kishe ani’ ipilo. Tishino mtazu a-a tipau qhivelo.”

⁴ Tighenguno lhotheu tungkupu huno Ramot lo wuve,

⁵ tile ighikelo ghushimi shou akijeu lakhi ahohomi gholo aghikeu phuphelu. Pano pi, “Akijeu, oghenguno ino asutsa lakhi sughi ani.” Jehu no iniju, “Noye ningu gholo khuu putsa ani kya?” “Oputsa ani, akijeu, “ ipi pano khochile.

⁶ Tishino pamano sholokuu ilo eno tungkupu lhotheu huno oliv teli pesu Jehu tsuqalo lepuku tsuno pa vilo pi, “AMPEU, Israil Lhou no piphevetsua: ‘Ino opelo iwu timi Israilmi shou akukau shipenike okisheluva.

⁷ Noye ompi shikicheu akukau, ti Ahab nu heqhive masa eno ino Jezebel shou aghime tsuni kughengu lino iwu tungkupumi eno iqemi kutamiqo pithivetsuke.

⁸ Ahab kibolomi eno pa lagha lono ikowokeqo kumtsu pithi khave tsumasae; pa kibolo kiptimi ye muchomi lono iqi anipau kutolo puhavetsu masa.

⁹ Ino Israil kukau Jeroboam ngo Israil kukau Baasha laghaqo lau mlave ketoi pa kibolomi kumtsu tihutoi pughave tsuni.

¹⁰ Jezebel kumoye qhopemoni ikemu li sukumoye Jezril ghakhu lono atsuno chuvepeni.’ ” Hipaqo piveno tungkupu lhotheuye kokuthabo tipau qhiveno pove.

¹¹ Jehu ye pa kusami kijemi qo lau ide ighikelo panonguno pa vilo iniju, “Thwokha kumtsu achipishi anima? ti nikhanighau ye ovilo kiu shile pi ighi kya?” “Paye ivilo kiu khu ighikeno nonguye ithi anima?” ipi Jehu no khochile.

¹² Panonguno khochile pi, “Moe, ninguye kumu mthae!” Paye kiu ovilo pi ighikeno ni vilo pitsulo! Pano AMPEU no pi ani pipuzu: “Ino opelo Israilmi shou akukau shipenike okisheluvae,ipie.”

¹³ Paikhavi lono Jehu kusapami kijemi qono panongu phikuzu xapesu apukhu nepalo qhatsuno Jehu pelono tipau shou puthughope eno afuko igha eno asheshu pi, “Jehu ye akukau shivae!”

Israil Kukau Joram Heqhive

¹⁴ Tileno Jehu, Jehosafat nu, khuu Nimshi nukeno pano Joram sasu kimthi ipeghive (Joram eno Israilmi kumtsu kuqhano Ramot Gilead susho ae eno Siriyami kukau Hazael sasu kumjo ae,

¹⁵ ikemu akukau Joram ye Jezril lo wuve, Siriyami kukau Hazael sasu aghushi kelono izavekehu shipiviniye wuve). Jehu no pi, “Hi shikeu nongu ghi pulo ani aye, nongu khumu aphughi heche ashou ipeno Jezril lo timiqo kutughu wu kevilo.”

¹⁶ Tishino paye khurkulu lo ikuno Jezril lo khile Joram no akulho qhi ngo akeno tile wuve eno Juda lo kukau Ahazia ghi pa putsaniye tile wo ngo a.

¹⁷ Aghukheu no Jezril qoghe lono pishipuwo Jehu ngo pawu timiqo cheghikeu ithuluno ighamuku pi, “Timi khami pochekeu ithulu ani,” ipi. Joram no khochile, “Khurshi lono timi lakhi puwuno pa pelono shompami keo aghumi checheni keno wuno kimchi sughilo” ipi.

¹⁸ Ikelono aghiniu huno khurshilo ikuno posu hu Jehu sholuno pa vilo pi, “Akukauno pike noye shompami kiqi lono chechenima pi iniju ani?” “Noye kumu ti iniju akepu kumoe, tiye okumla kumoe! Ithiu ipapelo” ipi Jehu no khochileve. Ti aqoghe lo aghukhepe akeuno pishipuhu aghiniuno Jehu eno pawu ghushimi sholu kemu idechile ghimovekeu ithuluno pithikithe.

¹⁹ Itaghi aghinimi kutau lakhi puwu eno pa ghi puzuu inijukeu tho tsa pesu iniju. Ikelono Jehu no khochile, “Okumlapu kumoe, kumu ti iniju akepu kuha! Ithiu wono ipapelo” ipive.

²⁰ Aghukhuuno itaghi pithi keuno aghinikishiu ye ti amqo chechekeu toluva ikemu pa ghi idechile wochemoe ipi. Eno highi ishi pi, “Ti amqo saphetouno pawu khurkulu muqhumuzai sasu checheni eno paye Nimshi nu Jehu toi ithulu ani!”

²¹ “Iwu khurshi kutotsulo” pi Joram no ahza tsu. Tipau kiqi lono kutovetsu eno pa ngo akukau Ahazia ishi khurkulu kututalo ilono Jehu sasu kushonike pohu. Panongu hula hila ighino Nabot lu lono kushokilelu.

²² “Noye kulashinike ghenguno cheni kesha?” ipi Joram no pa iniju. “Kiu kulakishi tsa pi anikya kughengu tumumi eno asu-atu oza Jezebel no huthuphe tsukeu ishi kutolo ningu gholo aphikeno kiu?” ipi Jehu no khochileve.

²³ “Hiye pishikiqhie, Ahazia!” ipi Joram no igha pi, tishino pawu khurkulu satsughu sasu pove.

²⁴ Jehu no pa kumto kumtsu suno pa piji kapuwu kehu apiji no Joram mqalo vepuku keuno vepili ilo pa mlolo vesuve. Tileno Joram ye pawu khurkulu lono ikiqi thive,

²⁵ eno Jehu no pa sakicheu Bidkar vilo pi, “Pa kumo ikhiluno pesu Nabot lulo vesuvetsulo. Hi kumsululo, kughou nikujo akukau Joram papu Ahab thikhau pochekelo, AMPEU no Ahab mithikeu tsa ishipi:

²⁶ ‘Ighina Nabot ngo pa nuliqo heqhi pithivekeu ino ithuluvae. Eno ino hitoi piqhi puani hipau lu lono ino aghime otsuni.’ Tighenguno Joram kumo ikhilulo eno Nabot lulo vesuvelo, AMPEU no piqhi puakeu shikupu tsukepushi,” pi Jehu no pa sakicheu vilo pi.

Juda Kukau Ahazia Heqhive

²⁷ Kiu shivekeno akukau Ahazia ye ithiveno pawu khukulu lono posu Bet Hagan phughi kudau pove, kughengu Jehu no pa hache kehu. “Pa heqhivelo!” pi Jehu no pawu timiqo ahza tsu, ikehu pano Ibleam taun phivilo Gur laghilo pawu khurkulu sasu pocheke lono panonguno pa ghuzave. Ike paye izavekemu kishiala shipuzu Megido phughi kutolo poighiluno tipa-a lono thive.

²⁸ Paw kijemiqono pa kumo khurkulu lo pesuno Jerusalem lo xapu ighi eno kukami kumo qhoche keu David phughilo qhove.

²⁹ Ahazia no Juda lo akukau shiluve, tiye Ahab nu Joram no Israil lo kakeu mpe chighi aqhaqhiu shi akelono.

Kukaliu Jezebel Heqhive

³⁰ Jehu no Jezril lo ighiluve. Jezebel ye kiu shivekeno ti chiluveno li nhethilo eno likutsu kishekulu msapuveno kukaki alashe lono puthughono pishipiqi alaghilo ju a.

³¹ Jehu no khagho hechesu iloghike mtsa lino ighamuku pi, “No Zimri! Timi hekiqhiu! noye hilehi kiu shi ighi ani kya?”

³² Jehu no pishipuku juno igha pi, “Khuuno ikudau suni kya?” Akukakilo kuami kini-a kuthuano alashe lono pishipiqi pa ju,

³³ tileno Jehu no panongu vilo pi, “Hilau ti sunhe kuluqhivelo!” Panonguno li sunhe kuluqhive eno li jino atozu eno khurshi shou kumtsu veda puku khave. Jehu no li kumo shouno pawu khurkulu tuhasu wu,

³⁴ eno kukakilo iloghino alibe chu. Tishive kethiuno pano ishipi, “Ghushovekeu atopuu kumo ikhiluno shiqhove tsulo; kiukiu shi aghimu li ghi akukau nga lakhi ke.”

³⁵ Ikemu timi khunoqo li kumo shiqhove tsuniye wukeno panongu ighikelo li kutsu boghe, li ughi eno apukhughi likhi aghino kutauye kumu phumlave.

³⁶ Panonguno hipau ghili Jehu vilo piniye ighike lono pano pi, “Tiye AMPEU no pa qeu Elija tungkupuu vechewono kiu shive nani keno pipuakeu shikupuve. ‘Atsuno Jezril ghakhu lono Jezebel kumo chuve nani.

³⁷ Li saghi kiu aghikeno tiye tubatuzu toi apanaghaiveno khunomu tipaqo kimchi lumove nani.’ ”