KUKAMI AKINIU 8 - BAIBEL (BSI)

Shunem lo Atopuuno Ideighi

¹ Tipathiu Elisha no Shunem lo kuau atopuu khuu nu pano xuputhuve tsukeno tipau vilo pi, “Osholokumi sasu khile khilemu ado kitila ghenguno ngove kepushi chevelo, kughengu AMPEU no hipa ghakhulo ampe tsuni puqumiye puwuni cheni.

² Liye pano pive tsukeu kiqi lono li sholokumiqo sasu Filistiya lo ampe tsuni ngonike ghenguno wuve.”

³ Ampe tsuni tovekethiu lino Israil lo ide ighive eno akukau lau wuno liki alu tsu chilevelopi khu.

⁴ Lino akukauno Elisha qeu Gehazi sasu kuptsa aghikeu ithulu; ti akukau ye Elisha wu akumzapu ghili ithinishi ae.

⁵ Elisha qeu Gehazi no akukau vilo Elisha no kishi akithi lono akuxu kughulhove tsukeno tipau ghili lhe akelono atopuu khuu nu Elisha no xuputhu tsukeno tipau huno akukau lau ighino li ki eno ayeghi tsuchileve lopi qhuiniju ighi. Gehazi no pi, “Impeu akukau, atopuu ngo li nu Elisha no akuxu shi kughulhovetsu keu hipama hi ighi anie.”

⁶ Akukauno atopuu vilo tishike sheapi iniju eno lino khochile Gehazi no pi akeuye kuchouke ipive. Tileno akukauno kijemi lakhi kupuzu liwu kiu anikeno ti kumtsu li tsuchileve tipau gholo lino ampe tsuni wuveke dolo li yeghi lono kiu tuxatini ipeghikeno ti kumtsu amelo suveno tsulo ipive.

Elisha ngo Benhadad

⁷ Elisha ye Siriya kukau Benhadad no su ake ghuloki lono Damaska lo ighilu kughou akukau vilo Elisha ighi aniepi pithi keno

⁸ pano pa qholo kijemi lakhi Hazael vilo pi, “Noye agho lakhi pesu tungkupuu lau wuno pa pelo AMPEU launo niye vilu nani keo mokeno ithi sughi jupelo.”

⁹ Tighenguno Hazael no kemel lhobidi lo Damaska lono mlaphekeu thime akiviuqo akho shipusu Elisha lau wu. Kughou Hazael no pa sasu kusholukeno pano ishi pi, “Oqeu akukau Benhadad no ihapuwuno ovilo paye pa kusu lono vilu nani keo mokeno ithisughi penike ighi ani.”

¹⁰ Elisha no khochile, “AMPEU no ilau piyesutsuke paye thive nanie; ikemu noye wopuzu pa vilo paye vilu nani ishi pivelo.”

¹¹ Tileno Elisha no ighono akumsapu gi xapusu Hazael gilo jupuku akelauye Hazael ye ighono kujove. Paikhavi lono Elisha ye anhezu ipeghi qauve.

¹² “Noye kushiye qa anikya, akijeu?” ipi Hazael no iniju. “Kughengu nono Israil timiqo lau ighono kumsa kimshipu mlani keu ino ithuluve ake ghenguno qa anike,” ipi Elisha no pi. “Nono Israilmi wu aghukhuaqo amisu pitivetsu nani, lhothemi kivimiqo ghiqhivetsu nani, panongu nuliqo ayeghilo qodave nani, eno topumi mishi chekeqo akuchughi ghixuvetsu nani.”

¹³ “Niye kiu kuka pesuno tikithipu shiluni kya? Niye kiumu kumo!” pi Hazael no iniju. “AMPEU no ipiyeve ake nono Siriya lo akukau shiluve nani,” pi Elisha no khochileve.

¹⁴ Hazael no Benhadad lau ide ighikelo pano pa vilo iniju, “Elisha ye kishile pikya?” “Pano ivilo pikeuye noye vilu nani” ipi Hazael no khochile.

¹⁵ Ikemu thoghiuye Hazael no asupha azuno putsu no akukau gi nhavetsu, tishike lono akukauye thive. Tithiu Hazael no Benhadad shelo Siriyami kukau shiluve.

Juda lo Kukau Jehoram

¹⁶ Ahab nu Joram no Israil lo kakeu mpe apunguu shi akelo Jehoram, Jehosafat nu no Juda lo akukau shilu,

¹⁷ paye apunu mpe shighi kini shi akelono eno paye Jerusalem lo ampe tache ayehpelu.

¹⁸ Pa nipuye Ahab nongake eno Ahab kibolomi toi pa ghi Israil kukami xine laghilo papeuve. Paye AMPEU zulo axine shive,

¹⁹ ikemu AMPEU ye Juda shipusave tsuni keu pulomoke, kughengu pano pa qeu David vilo tushoqhi puakeuno pa laghano alhokuthu ayehpe kibewo nani ipi pua.

²⁰ Jehoram no ka ake ghuloki lono Edom no Juda sasu kumjo ithughino akuka ithuluve keu ghakhu lakhi shiluve.

²¹ Tighenguno Jehoram no pawu khurshi ghushimiqo kumtsu sasu Zair lo wu. Ikemu Edommi ghushimino pa eno pawu khurshi ghushimi saphetou pama suholuve kemu kishiala shino putho lono ithughino poluve; eno pawu ghushimi ye akilo pochilesu wokhave.

²² Tinguno tilauno Edommiye Judami launo pa kuka shiluve. Hipau ghuloki lono Libna phughi ghi Judami sasu kumjo ipeghi.

²³ Jehoram no kiu shikeno ti kumtsu Judami Kukami Xughili kakulo yekutsupe qhipuani.

²⁴ Jehoram ye thive eno pa kumoye David phughilo qhove eno pa nu Ahazia no pa shelo akukau shiluve.

Ahazia Judami Kukau

²⁵ Ahab nu Joram no Israil lo kakeu mpe chighi akiniu shi akelono Ahazia Jehoram nuno Juda lo akukau shiluve,

²⁶ apunu mpe muku kini shi akelono eno paye Jerusalem lo ampe lakhi ayeh pelu. Pazaye Athalia, akukau Ahab nongake eno liye Israil lo akukau Omri tilimi ke.

²⁷ Ahazia ye akukau Ahab bolomi kulakupu shikeu lono pa ghi Ahab kibolomi toi AMPEU zulo axine shive.

²⁸ Akukau Ahazia no Israilmi kukau Joram gholo sukuqhano Siriyami kukau Hazael sasu aghushi. Gilead lo Ramot ipikeu lono ghushimiqo aghushikile kelono Joram ye aghushiqa lono izave.

²⁹ Paye pa ghuza lono viluniyeno Jezril phughilo wuve eno Ahazia no tile pa putsa ighilu.