KUKAMI AKINIU 7 - BAIBEL (BSI)

¹ Elisha no khochile, “AMPEU no kiu pikeno inijulo! Thoghiu hipa ghulokilo nonguno Samaria lo athikishi akiviu kilogram kuthu momu asho thi kilogram tsugholo tsandiyi lakhi no qhulu nani.”

² Akukau ghukheuno Elisha vilo pi, “Khilemu tishimlae, tsalatsa AMPEU no pa ampino paikhavi lono tsutsughu puwutsu namu tiye tokulupu tsa kumoe! “ “Tishi nani putsake ju alo, ikemu noye kiu chuqupumu chulumo nani pi Elisha no khochile.”

Siriyami Ghushimino Pove

³ Timi bidi apugha kusu no suno Samaria phughi khagho khalacheu ngoa eno panongu dolo ishi kuptsa kileghi pi, “Thivemoke kutolo ninguye kushiniye hile ngokhe anikya?

⁴ Aphughilo ilonamu kumu avehupu kuha, kughengu tilau wuaye akhuno thivenia; hilehi ngo anikeu ghi thiveni cheni. Tighenguno ningu Siriyami ghazulo wuni. Tsala panonguno ni puxutsu aye ninguye xuluniae; le ni heqhive kepu shi pinamu ninguye thivenia.”

⁵ Ikehu, zughughui akelono panonguye ithuveno Siriyami ghazulo wuve, ikemu panonguno tipa alo ighikelo, khuumu ithumla.

⁶ Kughengu AMPEU no Siriyami pelo ghushimi kutomono khurshi ngo khurkulu sasu chekeu ghugha toi chiluvepe eno Siriyamino kumsuvekeuno Israil kukauno Hatimi ngo Ijipmi kukamiqo eno panongu wu ghushimi sasu ighino leniye chea kughashi kumsuluve.

⁷ Ike Siriyamiye kijiliuno panongu kuxu susho lunikelauno pokhave, panongu aphiki, khurshi eno gadaha kumtsu qhive eno aghazu pathoshi qhiveno chekhave.

⁸ Kughou timi bidi huno aghazu kupunulo ighilukeno, panonguno aphiki lakhilo ilono tipaulo chuqu kusho kiu qhipuaghi keno tipaqo chu-sholuve, ipuzu tsandi, shuna eno aphimini aghikeu ikhilukhaveno xapu kusupe qhive; panonguye ide ighino aphiki kutaulo ilono puzuu toi shi.

⁹ Ikemu tileno panongu dolo hitoi pikile, “Ninguye hiye shimokepu shiani. Ninguye asutsa aloke anipuzu ningu dolo likhi qhipuave kepu shi amoe. Tsala ninguno inaqhe kutolo pimono auve aye mutsuqhei aghime ningu tsu nani. Ningu mtazu wuno Akukau wu kijemi vilo piveni!”

¹⁰ Tileno panonguye Siriyami ghazu qhiveno Samaria lo idewono khagho kheu kupheno pi: “Ninguye Siriyami aghazulo wukemu kumu ithumla momu chimlae; khurshiqo ngo gadahaqo lakhimu tsughape qhipuamoe eno aphikiqo ghi Siriyamino qhiveno wuvekeu atholo ani.”

¹¹ Aghukhumino hipau sutsa pesu kutughuvetsu eno ti akuka kilo ghi pithivetsu.

¹² Tiye putho shi aphie, ikemu akukauye azua lono ithughiveno pa qholo kijemiqo vilo pi, “Siriyamino kiu kughu anikeno ino nongu vilo pini! Hilehi puqumiye akeu ithi ani, ikehu panonguye panongu ghazu qhiveno aluzaqhalo itshuwuvae. Panonguno kumsuve keuye ninguye aphughi qhiveno achuqupu phuighi kelono akuxuno ningu kughaluveno aphughi leluveniye shi ani.”

¹³ Pa gholo kijemi lakhino pi, “Aphughi hilehi ngo akemiye avekusa sholuni putsa, azuuno thivekeqo toi nani putsae. Tighenguno timi khami gholo khurshi pungu qhivekeu hapuwuno kiu shivekeno ithi kepushi penie.”

¹⁴ Panonguno timi khami kishepheluve eno akukauno khurkulu kini tsupuwuno Siriyami ghushimi kishivekela phukidekudai sughipenike kishekulushi mijeno hapuwu.

¹⁵ Ike timiqoye Jordan kutolo ighilu eno alaghi kumtsu aphi nhemgha ngo aghunanu Siriyamino pocheke lono qhiveno povekeu panonguno ithulu. Panonguno ide ighino akukau vilo kishekulu pithivetsu.

¹⁶ Samaria lo kuamiqono poipeghino Siriyami ghazu kumtsu lhethuve. AMPEU no pipuaketoi, ashothi akiviu kilogram kuthu momu barli thi akiviu kilogram tsugho lono tsandiyi lakhi lono jeve.

¹⁷ Akukauno pa ghukheu pesu aphughi khagholo timi hekukutsuu shi ape. Ikelaye timiqono ipeilo ake lono akijeu huye nedaqhi pithive, tiye Elisha tungkupuuno azuuno pipua ketoi akukauno pa juniye cheke lono tishive.

¹⁸ Elisha no Akukau vilo ishi tipipua—thoghiu hipa ghulokilo asho thi akiviuqo kilogram kuthu momu barli thi kilogram tsugho lono Samaria loye ghuka lakhi lono je nani,

¹⁹ ishipikelo ti akijeu huye ishi khochilepua, “Khilemu tishi shilumo nani—tsala AMPEU no pa ampino ghuthu khavino tsutsughu puwu pinamu!” Elisha no khochileve keuno, “Tishi nani putsake nono ju alo, ikemu noye achuqupu lakhimu chulumo nani” ipipua.

²⁰ Ike kuchouno pipua ketoi pa lau tishive, kughengu paye timino ikipe ikulo lono khagho lono nedaqhi pithive.