KUKAMI AKINIU 6 - BAIBEL (BSI)

Amughu Ithukulu

¹ Ghulo lakhilo tungkupumi aloji lakhi khunoqo shou Elisha no ampi shitsu akeno panonguno pa lau muchho, “Ninguno ngo akeu-a ye ighono tulaloi!

² Tighenguno Jordan kudau wupenike zah ningu tsulo, tishi aye asubo hami yeqhino ningu kutoshino akungoki mlaluveni.” Elisha no khochile, “Tishiulo.”

³ Panongu gholo milakhino pa vilo panongu sasu wulopi qhuiniju eno pa ghi pulovetsu,

⁴ ikehu panongu kumtsa chewu. Kughou panonguno Jordan tolukeno panonguye akumla shithuve.

⁵ Panongu gholo milakhino asubo lakhi yeqhi ake lo paikhavi lono amughu azulo hejo suve. “Akijeu, niye kishiveni kya? kughengu amughu huye timi vilo khusu hughie!” pi Elisha vilo iniju.

⁶ Elisha no iniju, “Khilehi pheqhi suvekya?” Timi huno pheqhi suvekeu-a kichepiye, tileno Elisha no asu lakhi miche pesu ti iloveke alo vesu eno tishi kelaye amughu hu yipekilhe khalacheu ipeghive.

⁷ “Hi ikhipheluvelo” pi pano ahza tsu eno timi huno itsaqi puzu ikhipheluve.

Siriyami Ghushimi Theqhikulu

⁸ Siriyami kukauye Israilmi sasu aghushi ae. Pano pawu kijemiqo sasu kuptsa puzuno a-a lakhi kisheluno pa ghazu mlaluve.

⁹ Ikemu Elisha no asutsa pesu Israil kukau lau khilemu tilau wukevilo pi hakhave kughengu Siriyamino asumini pholo ngono ala khe akhani ke.

¹⁰ Tighenguno Israilmi kukauno a-a tipau phivilo akemi timiqo vilo wukepu kumoe pi pivetsu eno panonguno tipaqo kheluve. Hitoi shi ghuthu kini kuthu kutolo shive.

¹¹ Tileno Siriya kukau ye ighono amlo ideve eno pa qholo kijemiqo ku-kutsuno panongu iniju. “Nongu khuuno Israil kukau saphu ani kya?”

¹² Panongu gholo milakhino khochile, “Ningu khuunomu kumoe, akijeu, ikemu Elisha tungkupuu khuu Israil lo acheni keno pano nono tuqhouno ozuabo lono pikeu tsaghi pe akukau vilo piluve cheni,” ipi.

¹³ “Pa khile anikeno phusaghilo, Tishiaye ino timi puwuno pa kusaghi peni,” pi akukau no ahza tsu. Kughou Elisha ye Dothan lo aniepi pa vilo pithikeno,

¹⁴ pano ghushimi kutomo gholo khurshi eno khurkulu ishi tsupuwu. Panonguno putho lono taun toluno tipau suhomxaluve.

¹⁵ Thoghiu inaqhe itheno Elisha qeuye ithughive eno khalacheu ipeghike lo Siriyami ghushimi khurshi ngo khurkulu sasu ti taun homxapesu aghikeu ithulu. Tileno pano Elisha lau poighino akichiqhi pi, “Ninguye thiniae. akijeu, ninguye kishiveni kya?”

¹⁶ Elisha no pi, “Msakevilo, panongu sasu akeuye ningu gholo akemi pachi anie.”

¹⁷ Tishipiveno pano inikhu, “O AMPEU, pa nhethi lhaphetsuno pa pelo ithulupelo!” Elisha qeuno jupuwo kelauye ato kumtsu khurshi ngo khurkulu mino Elisha homxa pesu ngo aghikeu ithuluve.

¹⁸ Kughou Siriyamino lethuvekeno, Elisha no inikhuthuve. “O AMPEU, timi hipaqo nhethi kighicheve tsulo!” AMPEU no pa kighini khochile tsuno tipaqo nhethi kighichevetsu.

¹⁹ Tileno Elisha no panongu lau wupuzu pi, “Nonguye alaghi kumolo ngo ani, hiye nonguno leniye chekeu taun kumoe. Ipapelo eno nonguno hachekeu timi lau sawuni.” Tishino pano panongu sasu Samaria lo wuve.

²⁰ Panonguno aphughi tolukemtsa, Elisha no inikhu, “Panongu nhethi lhaphetsulo, AMPEU eno panongu pelo ithukulupu shitsulo.” AMPEU no pa kighini khochile tsu; pano panongu nhethi lhaphetsu ikelaye panonguye Samaria phughi alou ngo aghivekeu ithulu.

²¹ Kughou Israil kukauno Siriyami ithulukeno, pano Elisha vilo iniju, “Ipelono panongu heqhivepemo kesha, akijeu? Ino panongu heqhiveosha?”

²² Pano khochile, pi “Moe, nono aghushi akelono kughalukeu ghushimi shi aghinamu heqhi kevilo. Ikemu panongu pelono chu sholuve peno panongu kukau lau kighide puwolo.”

²³ Tighenguno Israil kukauno panongu ghenguno ighono aghulhu kije kutotsu; eno panonguno tsaqutsalei chu-sho luvekethiu panongu kighide puwovetsu. Tinguno tilauye Siriyami ye Israil yeghi leighimove.

Samaria Khasuluve

²⁴ Ado hami thiu Siriya kukau Benhadad no pawu ghushimi kumtsu sasu ighino Israilmi sasu aghushi eno Samaria lethuve.

²⁵ Aghushive keu lono aphughilo chuqu kusho ighono mpive kehu gadaha kutsu lakhilo tsandiyi lhothache eno aghatsuna gram 200 lo tsandiyi pungu lono zheuve.

²⁶ Ghulo lakhilo Israil kukauno aphughi liwo shou alacheche kelono topumi lakhino ighamuku pi, “Akijeu, ikuphutsulo!”

²⁷ Pano khochile, “Tsala AMPEU thotsu okuphu tsumoaye niye kishino okuphu tsuluni kya? Niye athikishi mu aji mu kuhae?

²⁸ Noye kiuno shilusa ani kya?” Lino khochile, “Wovekeu tsalalo topumi hipauno akukumsu tsuke ikujo inga heqhi chuveno ghulo kutauno li nga heqhi chunikeu shie.

²⁹ Tighenguno ikujo kuqhano inu heqhino lhochuve. Thoghiuye ino li vilo li nu heqhino lhochunie pikeuloye lino pa kusupe qhivae!”

³⁰ Hipatsa chiluno, akukauye amlo ghime launo pa phi suxuve eno timi khunoqono ti atupikiye kupunukhoi ngo akeno pishipuwo akukauye yeqhiyephi uakeu ithulu.

³¹ “Alhou pelono ipithive peniu, tsala ino ishino Elisha pithimlave aye” ipi akukauno ashoqhi shive.

³² Tishino Elisha saghipe nike aghinimi hapuwu. Tipa ghulokilo, Elisha ye muchomi khamino pa putsa ighi akehu akilo ngo-a. Akukau ghinikishimino ighimphi lono Elisha no ti muchomiqo vilo pi, “Ghikiqhiu huno khami puwuno ipithive peniye shi ani! Tighenguno pano hile ighi aye ahukikha khaluvelo eno pa pelo khalacheu ipe pekevilo. Pa thiuno akukauno ashekhashi ighi nani.”

³³ Pano akushukulu shi ti pitalu kemtsa, aghini kishimi ighiveno pi, “Hiye AMPEU no ningu lau akukupuna sughitsu ani! Tighenguno kushiniye ado peveghi pa khe anikya?”