KUKAMI AKINIU 5 - BAIBEL (BSI)

Naaman Shipivi

¹ Naaman ye Siriyami ghushimi kijemi lakhi, Siriya lo akukauno ighono akiqheu lono sumsa pa ikhilu gihuche, kughengu AMPEU no pa vechewo Siriyami ghushimi pelo tokulu shilupeke. Paye ighono amlo kivimi ghushimike, ikemu paye apugha kusu puchekemi lakhi.

² Panonguno Israilmi sasu aghushi kelono Siriyamino Israilmi anga lakhi sasu ighi, khuu athiuye Naaman nipu qeliu shiluvekeno.

³ Ghulo lakhi lino li mpeliu vilo pi, “Impeu pelono Samaria lo achekeu tungkupuu lau wujupe nishi kumsu anie! Pano tilau wu aye pa pugha hipau shipivi luve nani.”

⁴ Kughou Naaman no hipatsa chilu keno paye akukau lau wuno ti anga aqeliu no pa vilo pikeu tsa pesu pithi.

⁵ Akukauno pi, “Israil kukau lau wulo eno yesu hipau pa tsulo.” Tighenguno Naaman no tsandiyi, shuna muqo 30,000 eno aphimini kuzuqhu kuzuli shikulupu chighi ishi pesu chewu.

⁶ Pano yekili pesu wuchekeulo hitoi hepua: “Yesukipeu hipauye igholo kijemi lakhi paje ye Naaman ke. Niye opelono pa pugha hipau shipivivetsu penishi ani.”

⁷ Kughou Israil kukauno yesu philukeno akumza kelauno pa phi suxuve eno akichiqhi ishipi, “Siriya kukau ye kishino niye timi hipau shipivi lunanipi laju ani kya? Paye niye Alhou, khuu akithi akuxu kuka pecheni keno tipau kughashi kumsu anike sha? Paye bidelauno isasu kichighiniye amuqu shi ayeakena!”

⁸ Kiu shive anikeno tungkupu Elisha no tipau chilu kemtsa pano atsa lakhi akukau lau puwu: “Noye kushiye okumzaqhiyi ani kya? Timi hu ilau hapuwulo eno Israil yeghilo tungkupuu lakhi achekeu piyeni!”

⁹ Tileno Naaman ye pawu khurshi eno khurkulu sasu wu eno ighino Elisha ki hukikhalalo ngove.

¹⁰ Elisha no aqemi lakhi hapipeno pa vilo ishi pivepe. Jordan lo wuno ghuthu tsuni qhuvelo, tishiaye pa pugha akivishi viluve nani ipi.

¹¹ Ikemu Naaman ye amlo idesu wove eno ishi pi, “Ino kumsukeuye paye akulaghi lomu ipeghino pa MPEU Alhou ku puzu ipughakulo pa-u pesu kuzupuku tsuno ishipivi tsu nani ghashi athono.

¹² Damaska yeghilo Abana eno Farpar ghokiqoye Israilmi zu nguno akiviu kumo sheo? Tipaqolo wuno azu kuchhuveno vilumoni sheo!”

¹³ Pa qeuno pa vilo ighino pi, “Akijeu, tsala tungkupuuno kiwala kushokutsupu ovilo shilo pi aghikepu aye nono shimomu take. Ikemu pano ovilo okutoshino wupuzu qhuvelo eno viluvelopi anike ghenguno tishiju kepue.

¹⁴ Tileno Naaman no Jordan lo ilono pa kutoshino ghuthu tsuni azulo kuptsu. Elisha no shilo pikeutoi, kuchono paye aloqhi viluve. Payikono anga lakhi toi mutshaminheyi eno ighono juvi sheve.

¹⁵ Tishike lono pano pawu timi kumtsu sasu Elisha lau ide ighieno pi, ‘Alhou kutauye kuha ikemu Israilmi Lhou likhi anipi ino ithivae; tighenguno akijeu, kimiyeno agho hipau ilauno ikhilutsulo.’ ”

¹⁶ Elisha no khochile, “Ino huthuchekeu akuxu kuau MPEU je lono ino tushoqhi ghi pi anike niye agho hipau lumo nani.” Naaman no tsuikhomo pa vilo luvetsulopi akemu pano tipau lutsumove.

¹⁷ Tighenguno Naaman no pi, “Tishiaye nono igho lutsumo aye ipelono ayeghi khurshi pe kini ikilo suwo kepushi itsulo, kughengu nighi hinguno hilauye aghakishi momu pitikumllagho alhou kutau tsumono AMPEU likhi mlla venike.

¹⁸ Ino AMPEU pelono ikipimi qhivetsu penike lakuju ani. Kughou ino ikukau sasu Rimmon kumllaki khikhi Siriyami lhou keno ti mllaniye ighike ghulokilo mutsuqhei AMPEU no ikipimi qhivetsu nani!”

¹⁹ Elisha no pi, “Akivishi wolo,” Eno Naamn ye wove. Naaman no ala kushuwalo humphi lono

²⁰ Elisha qeu Gehazi no pa likhi pa putsaghi pi, “Impeu ye Naaman launo kiu nhemgha mu lumono vejoi phepuwove! Paye Siriyami kijemi hipauno agho pa tsukeu luvekepu shiae. Xukuau MPEU jelono niye pa hasu huni eno pa launo thime hami khuluveni.”

²¹ Ike paye Naaman papesu pohu. Kughou Naaman no pishipuwo timi lakhi pa lau posu hucheghi keu ithulukeno pawu khurkulu lono ilheiqighino pa sasu kusholuno ishi iniju. “Kiwala kuquvekeu anike sha?”

²² Gehazi no pi, “Kumu kumoe. Ikemu impeu no ihapuwuno ovilo hi pitsulopike, itehino tungkupumi kini Efraim toghi kudauno ighi ani ikehu paye opelono tsandiyi 3,000 aphi aloke atuna kini ishi tsupenishi anie.”

²³ “Tsandiyi 6,000 pesu wolo,” pi Naaman no khochile. Tishino pano tsuyikhomo tsunikeu shive, tsandiyi jolabo kinilo suno mushovetsu eno aphikuzu aloke atuna kini ishi ikhitsuno pa qeu kini hapesu Gehazi zuuno xapuwo tsupenikeu shivetsu.

²⁴ Kughou panonguno chesu wo Elisha no achekeua toluvekeno Gehazi no Jolabo kumsho kumahu ikhiluveno pesu akilo ilove. Tishive kethiu pano Naaman qeu pama kighide puwove.

²⁵ Paye akiniu akilo ide ilove, tileno Elisha no pa vilo iniju, “Noye khilau wuve kya?” Pano khochile, “Akijeu, niye khilaumu wumoe”

²⁶ Ikemu Elisha no pi, “Niye kughou timi huno pawu khurkulu lono iqighino osasu kusholu ake ghulokilo hu aghungu lono ogholo ake kumosheo? Hiye pisa eno tiphimini, oliv xathi, atsaithi, bheri eno amshi momu aqemi mu luakepu ghuloki kumoe!

²⁷ Tighenguno Naaman kusu huno oshou ikughiniae eno tiye no eno olaghaqo lau alhokuthu acheuvenia!” Kuchono Gehazi no cheve kemtsa paye apugha kusu hu ithuluve, pa yikono murasu kimiyetoive.