KUKAMI AKINIU 24 - BAIBEL (BSI)

¹ Jehoiakim no akukau shi akelono Babilon lo akukau Nebukadnezar no Juda le ighi eno ampe kuthu kutolo Jehoiakim ye pa yehza qholo ngokepu shive; tipathiu pa ghi mujochilethu.

² AMPEU no pa qeu tungkupu vechewo pano shi nani piketoi kuchono AMPEU no Babilon ghushimi, Siriyami, Muabmi eno Amunmi hipaqo ighino Jehoiakim sasu aghushithu eno Juda yeghi shipsa thuve.

³ Hi shive keuye AMPEU zah kutsu lonoke, pa nhekithe lono Judami hapupove nike ghengu eno akukau Manasse xine ghengunoke,

⁴ tiye pano amikuchomiqo heqhi pithivetsu keu lonoke. AMPEU ye tipau ghenguno Manasse xine qhivetsu mlave.

⁵ Jehoiakim no kiu mlakeno ti kumtsu Judami Kukami Xughililo yekutsupe qhipuani.

⁶ Jehoiakim ye thive eno pa nu Jehoiachin no azuqhulo akukau shiluve.

⁷ Ijip kukau ye pawu ghushimi sasu khilemu Ijip hechesu aghulau move, kughengu Babilon lo kukauno Ijip lughi kumtsu qhasuluve, tiye Eufrati ghoki lono wo Ijip yeghi ahuu alughi kutolo qhachholuve.

Jehoiachin no Juda lo Kalu

⁸ Jehoiachin ye apunu mpe chighitache shi akelono Juda lo akukau shiluno Jerusalem lo aqhi kuthu kalu. Pa zaye Nehusta, Jerusalem lo achekeu Elnathan ngake.

⁹ Papu kumla hutoi Jehoiachin ghi AMPEU zulo axine shiuve.

¹⁰ Pano ka ake lono akukau Nebukadnezar kijemino Babilonmi ghushimi sasu ighino Jerusalem le thuve eno ti homxa khasuluve.

¹¹ Tishi khasupe aghushi akelono akukau Nebukadnezar ampino Jerusalem lo ighi

¹² eno tileno akukau Jehoiachin gholo paza, pa nuliqo, pawu kijemi eno ti akukakilo achekeqo kijemi kumtsu Babilonmi qholo ngove nikeu shi ipeghive. Nebukadnezar no kakeu ampe akutacheu shi akelono pano Jehoiachin kughaluveno akughu shive

¹³ eno tipau gholono Achineki eno akukakilo akuakini akughupu nhemgha kumtsu pesu Babilon lo su wove. AMPEU no azuuno pipuaketoi, Nebukadnezar no shuna no shikeu akhu ajukhu khikhi akukau Solomon no Achinekilo peithaniye mlasukeno kumtsu kubopiniyive tsu.

¹⁴ Nebukadnezar no Jerusalem lo xukuami, akukau nuli sakiphetomi kumtsu kuqhakelo 10,000 akughumi shi sasu wuve. Tilikhi kumono pano akumlalo azukinimi shitsami, ayi kiyiqimi kumtsu kughasasu wuve, ipuzu ighono kumlhomiqo likhi Juda lo qhivetsuno wuve.

¹⁵ Nebukadnezar no Jehoiachin akughumi kiqi lono sawuve eno pa gholo Jehoiachin paza, pa nipuqo, pa qholo kijemi eno Juda yeghilo sakiphetomi kumtsu kughasasu wuvetsu.

¹⁶ Nebukadnezar no timi akhotomi kumtsu Babilon lo kughasasu wuve, kumtsu kuqhakelo 7,000 eno akumla shitsami pano 1,000 tipau gholo ayi kiyiqimi ghi ae, panongu kumtsu subosughi choshiyi keqo kumlalo ilokuzumi likhi toikeqo kughapesu wuve.

¹⁷ Nebukadnezar no Jehoiachin papu thikuzuu Matania pesu Juda lo akukau shivepe eno paje kilipesu Zedekia ipi kukidevetsu.

Zedekia no Juda lo Kalu

¹⁸ Zedekia ye apunu mpe muku lakhi shi akelono Juda lo akukau shilu eno paye Jerusalem lo ampe chighi qhaqhi ayehpelu. Pa zaye Hamutal, Libna phughilo achekeu Jeremiya ngake.

¹⁹ Akukau Jehoiakim no mlaketoi akukau Zedekia ghi AMPEU zulo axine shive.

²⁰ AMPEU ye Jerusalem lo eno Juda yeghilo kuami shou ighono pa mlo qimlaveno aloghu avekeu lono pano panongu kumtsu pa nhekithe lono hapupokhaveke.