KUKAMI AKINIU 17 - BAIBEL (BSI)

Hosheya no Israil Kukau Shilu

¹ Ahaz no Juda lo kakeu mpe chighi akiniu shi akelono, Ela nu Hosheya no Israil lo akukau shiluno Samaria lo ampe toku ayehpelu.

² Paye AMPEU zulo axine shive, ikemu pa zuu kukamiqo khunoqono Israil lo ayehpeche keno tipaqo toi axine shikutukeuye kumoe.

³ Asiriya kukau Shalmaneser no pa sasu aghu shithuve; Hosheya ye Shalmaneser zulo ipeghive eno ampelo zahme pa tsu anikeu shive.

⁴ Ikemu mpe lakhi loye Hosheya no aghinimi hapesu Ijip lo kukau So lau puwuno pa kuphutsulopi eno ampelo zahme Asiriyami tsuchekeu tavelopi pithi puwu. Kughou Shalmaneser no hipau chilukeno pano Hosheya kughaluveno akughukilo khathave.

Samaria Ikiqive

⁵ Tishino Shalmaneser no Israil le puzu Samaria bothaluve. Bothano le akeu mpe akuthuu shi akelo khikhi

⁶ Hosheya no kakeu mpe atokuu shi akeno, Asiriyami kukau no ighino Samaria leluve eno Israilmi kughasusu Asiriya lo akughumi shi sasuwuve eno panongu khami kughapesu Hala phughilo ngovepe eno khamino sawo Gozan distrik lo Habor ghoki phivilo qhive eno khamino Mediya phughilo ngovepe.

⁷ Samaria ikiqive keuye Israilmi no AMPEU panongu Lhou zulo axine shive, khuuno Ijipmi ulono panongu xaphelu eno Ijip lono khalacheu panongu sasu ipeghilupe keno. Panonguye alhou kutauqo mllauve

⁸ eno AMPEU no pawu timiqono azu iqesusu ighikithishi haphevetsukeqo timi khuayehqo papeu khave eno Israil kukamiqono kilethi sutsukeu khuayeh ikhiluve.

⁹ Israilmino AMPEU panongu Lhou no pulomokeu kumlaqou shiuve. Panonguno aphughi lono wo nasa eno taun kumtsu akumtha kumlla-a shisuqhewove.

¹⁰ Atoghi kumtsu eno asubo kicheqho kumtsulo athigho shosuwo eno alhouliu Ashera julho shisu pesu qhi,

¹¹ eno akumlla-a kumtsulo piti kumnakeu shi, tiye AMPEU no timi khunoqo pano yeghi lono hapheve keno tipaqo khuayeh papeuve. Panongu kumla lhoksaqo ghenguno AMPEU loghu kighideve tsu

¹² eno AMPEU no asu-atu mllakevilo pikeu yezah hebidevetsu.

¹³ AMPEU no pa ghinimiqo eno tungkupumiqo hapuwuno Israil eno Juda ghutu tsu: “Nongu laghi lhoksaqo phevelo eno izahkutsu khikhi Ayehza kakulo anikeno, khipau ino nongu puasuqo eno iqemi tungkupumi vechewono tsukeno tipaqo yehza ghokulu shilo.”

¹⁴ Ikemu panonguno agholumoe; eno Panongu puasuqo toi amlo thoshelo eno panongu Lhou AMPEU lau pulu bemoe.

¹⁵ Panonguno pawu mijekutsu puloshoqhi shikeu hephove eno pano pikumsa ghutukeu ikhilumono peve. Panonguno ame kuhakeu asu-atu mllauve eno panongu pesu ame kukuhau shiuve eno sukumxa lo akeqo shiyeh khuayeh panonguno tiu papeuveno AMPEU zah kutsuqo hebidevetsu.

¹⁶ Panonguno AMPEU panongu Lhou yehza kumtsu hephoveno ayino amshitsu julho ghi shisupe qhi, ayepuqo mlla eno Baal lhou mllaukhave.

¹⁷ Panonguno panongu ti anuliqo kughapesu aghakishi kumlla shipesu asu-atu lhou tsu; panonguno saqhi-sali shi, tumukeu muthu keu shiwu eno AMPEU zulo kiuno akukuqu kuchou keno tiulono panongu kuxu tsuuve, tishikeuno AMPEU mlo shikighide tsue.

¹⁸ AMPEU no Israilmi shou amlo ideveno pa zulono panongu hapheve puzu Juda kukaphu likhi qhiluve.

¹⁹ Ikemu Juda lo kuami timiqo ghi AMPEU panongu Lhou yehza gholumoe; ipuzu panonguye Israilmi no peluvekeu khuayehqo haluve.

²⁰ AMPEU no Israilmi kumtsu milive, aghime panongu tsu eno panongu kughapesu ayikusami aghumi ulo suvetsu eno ashekhaloye panongu pa nhekithe lono haphe puwuve.

²¹ AMPEU no Israilmi pesu Judami launo kututa shivetsu kethiu, Israilmiye Jeroboam, Nebat nu pesu panongu kukau shiluve. Jeroboam no panongu pesu AMPEU launo kututa shivetsu eno panongu sasu ighono lhoksakugha xine kuxulo sailove.

²² Panonguye Jeroboam papeuve eno pano kuqu keu xine shi kibe mlacheuve,

²³ ikehu ashekhaloye AMPEU no pa nhekithe lono panongu hapheve, pano paqemi tungkupumi vechewo panongu ghutu keu lono pano shinipi ketoi shive. Tighenguno Israilmiye Asiriya yeghilo kughasasu akughu shiukhave, panonguye ishikutolo tile xu achephike.

Asiriyamino Israil lo Ngoluve

²⁴ Asiriya lo akukauno Babilon Kut, Ivva, Xamat eno Sefarvaim qolono timiqo ikhiluno panongu sawo Samaria phughilo kughuna luvepe, Israilmi kugha sasu akughu shiwuvekeqo alo panongu pelono kughuna luvepe. Tipaqono aphughiqolo ngoluve eno tile xuluve.

²⁵ Kughou panonguno atughushi tile iloghikeno panonguye AMPEU mllamoe, tighenguno pano abongushu puwuno panongu khami heqhi chuvepe.

²⁶ Asiriya kukau vilo pithikeuno pano timi sawo Samaria phughilo qhikeqoye tipau yeghilo lhou yehza mthake ghenguno Alhou no abongushu puwuno panongu heqhi chuvepe ipi pa lau pithitsu.

²⁷ Tighenguno akukauno ahza tsu: “Achinemi akughushi kugha saghikeqo gholo milakhi kighide puwolo; pa pelo idewo tilau xuwuvepelo, tipa yeghilo lhou yehza pesu timiqo shikape kepushilo.”

²⁸ Ike Israilmi achinemi lakhi khuu puzuu Samaria lono kugha saghi keno pa pelo idewope eno Bethel lo ngono pa pelo kiutoi AMPEU mlla masakeno timiqo shikatsupe.

²⁹ Ikemu timi khunoqo Samaria lo kughunaniye iloghikeno panonguye panongu suatu julho shisuno pewo puzuu Israilmino mlapesu qhikeu kiqolo suno tiu mllauve. Pututa loji shino panonguno ighikeu phughi kiqi lono asu-atu julho mllauve:

³⁰ Babilon lono ighikeqo timino Sukot Benot lhou julho shisu; Kut lono ighikemiqono Nergal julho shisu; Xamat lono ighikeqono Ashima julho mla;

³¹ Ivva lono ighikemino Nibhaz eno Tarkak julho mla; eno Sefarvaim lono ighikeqono panongu ti anuliqo kugha pesu akipti kumllagho shi-ghi Adrammelek eno Anammelek lhouqo tsu.

³² Timi hipaqoye AMPEU ghi mlla eno panongu dolono timi jeli kumtsu kishepheno asu-atu kumlla-a qolo achinekishiu shipe eno panongu ghenguno aghakishi kumllagho tsukeu shipe.

³³ Ike panonguye AMPEU ghi mlla, ikemu panongu ghakhu lono pekishe susu ighikeu khuayeh kiqi lono pututa ghakhu lhouqo ghi mllae.

³⁴ Panonguye ishikutolo tipau khuayeh pekishe chephi. Panonguye AMPEU ghi mllamo momu pa yehza eno ahza kutsuqo khikhi pano Jakob laghaqo khuu pano Israil ipi kuve tsukeno pa vechewono tsukeu gho lumoe.

³⁵ AMPEU no panongu sasu puloshoqhi lakhi shi eno ahza hitoi panongu tsu: “Kutau lhouqo mlla kevilo; panongu zulo pishiqho tsukevilo momu panongu huthu kevilo momu aghakishi kumlla shipesu tsukevilo.

³⁶ Nonguye igholu masa nani, AMPEU no Ijip lono akuka akumto kije lono nongu saipeghitsue; nonguye izulo pishiqho masa eno aghakishi kumllagho itsumasae.

³⁷ Nonguye alhokuthu iyehzaqo eno izahkutsu khikhi ino nongu ghenguno yetsukeno tipau gholu masae. Nonguye alhou kutau mlla kevilo,

³⁸ eno ino nongu sasu puloshoqhi shikeu kumsuma mokepue.

³⁹ Nonguye AMPEU nongu Lhou, igholumasa, tishi aye ino nongu ghumi u-lono nongu susholu nani.”

⁴⁰ Ikemu timi tipaqo huye initsumo eno panonguye tamomithe khaghi khuayeh papeukhave.

⁴¹ Ikehu timi tipaqoye AMPEU ghi mlla, ikemu tipau gholono panonguno pututa suatu julho ghi mllache; eno ishikutolo tipaqo polo laghaqoye atholo tishi shi achephi.