KUKAMI AKINIU 15 - BAIBEL (BSI)

Uzia no Juda Kukau Shilu

¹ Jaroboam Akiniu no Israil lo kakeu mpe muku akutsuniu shi akelono Amazia nu Uzia no Juda lo akukau shiluve,

² apunu mpe chighi tsugho shi akelono eno paye Jerusalem lo ampe lhopungu kini ayehpelu. Pazaye Jerusalem lono ighikeu Jekoliya ke.

³ Papu kumla papeghi pa ghi AMPEU no kiu pulokeno ti mlatsu.

⁴ Ikemu asu-atu mllachekeu a-a qoye shipusamono ache, ike timiqoye aghakishi eno piti kumnakeu tamomitheno mllache.

⁵ AMPEU no apugha pesu Uzia kuxu thaqhulo puchepe kepushi tsuve. Paye pa likhi akilo ngoche eno akumla jeli kumtsu lono akulho qhiche, ipuzu pa nu Jotham no aghakhulo ayehpechepe.

⁶ Uzia no kiu shikeno ti kumtsu Judami Kukami Xughili yekutsulo qhipu ani.

⁷ Uzia thive eno pa kumoye David phughilo kukami qhochekeu alo qhove eno pa nu Jotham no pa zuqhulo akukau shiluve.

Zekharia no Israil kukau Shilu

⁸ Akukau Uzia no Juda lo kakeu mpe shighi akutacheu shi akelono, Jeroboam Akiniu nu Zekharia no Israil lo akukau shilu eno paye Samaria lo aqhi tsugho ayehpelu.

⁹ Pa ghi pa zuumiqo toi AMPEU zulo axine shive. Paye Nebat nu akukau Jeroboam no Israilmi sasu axine lo iloveke toi lhoksakugha kumlaqou papeuve.

¹⁰ Jabes nu Shallum no atheshino akukau Zekharia ye Ibleam a lono ghiqhiveno pa zuqhushi akukau shiluve.

¹¹ Zekharia no kiu mlakeno ti kumtsu Israilmi Kukami Xughili yekutsukeu lo ani.

¹² Tighenguno AMPEU no akukau Jehu vilo tushoqhi puaketoi shikupuve: “Olaghano tiqheli abidiu kutolo Israil lo akukau shilu nani,” ipikeu hu kupuve.

Shallum no Israil Kukau Shilu

¹³ Akukau Uzia no Juda lo kakeu mpe shighi atokuu shi akelono, Jabes nu Shallum no Israil lo akukau shilu eno paye Samaria lo aqhi lakhi ayehpelu.

¹⁴ Gadi nu Menahem no Tirza lono Samaria lo wuno Shallum ghiqhive eno pa zuqhulo akukau shiluve.

¹⁵ Shallum no kiu shikeno eno pano thechu shikeu ghili kumtsu Israilmi Kukami Xughili yekukutsulo ani.

¹⁶ Menahem no Tirza lono wucheke lono Tapua phughi qhoi shipusavetsu, tilehi kughuna kuami eno tipau hokumxalo kuami kumtsu hexavetsu, kughengu aphughi huno pa gizulo ikhiphe pesu tsumovekehu. Paye totimi anga mishi puchekemi po ghixuvetsu.

Menahem no Israil Kukau Shilu

¹⁷ Akukau Uzia no Juda lo kakeu mpe shighi atokuu shi akelono Gadi nu Shallum no Israil lo akukau shiluveno paye Samaria lo ampe chighi ayehpelu.

¹⁸ Pa ghi AMPEU zulo axine shive eno lhoksakugha akukau Jeroboam Nabat nu no Israilmi sasu axine lo ilovekeu kumla lhoksakugha laghi papeuve.

¹⁹ Tiglat Pilaser Siriyami kukau no Israil le iloghi ke ghulokilo pa saphu pa kukaqha shikumtotsu apenike ghenguno Menahem no tsandiyi kilogram 34,000 pa tsuve.

²⁰ Menahem no Israil lo kinimiqo lau milakhi khino tsandiyi lhopungu pa tsupeni keu shi anguka suno qhaluve. Tighenguno Tiglat Pilaser ye pano yeghilo idewove.

²¹ Menahem no kiu mlakeno ti kumtsu Israilmi Kukami Xughili yekukutsulo ani.

²² Paye thive eno qhove ipuzu pa nu Pekahiya no azuqhushi akukau shiluve.

Pekahiya no Israil Kukau Shilu

²³ Uzia no Juda lo kakeu mpe lhoapunguu shi akelono Menahem nu Pekahiya no Israil lo akukau shilu eno paye ampe kini Samaria lo ayehpelu.

²⁴ Paye AMPEU zulo axine shive, akukau Jeroboam Nebat nu no Israilmi sasu axine lo ilovekeu kumla lhoksa laghiqo papeuve.

²⁵ Pekahiya ghushimi gholo kijemi lakhi Remaliya nu Peka ipikeu no Gilead lono timi lhopungu sasu kuchughu no Samaria lo akukaki sholokuuno Pekahiya ghiqhive eno pa zuqhulo akukau shiluve.

²⁶ Pekahiya no kiu mlakeno ti kumtsu Israilmi Kukami Xughili yekukutsulo yepe qhipu ani.

Peka no Israil lo Kalu

²⁷ Akukau Uzia no Juda lo kakeu mpe lhopungu akiniu shi akelono, Remaliya nu Peka no Israil lo akukau shiluveno Samaria lo ampe muku ayehpelu.

²⁸ Pa ghi AMPEU zulo axine shive, Nebat nu Jeroboam no Israilmi sasu axine lo ilovekeu kichekipiye laghilo papeuve.

²⁹ Peka no ka ake ghuloki lono Asiriya lo akukau Tiglat Pilaser no aphughi hipaqo leluvetsu, tiye Ijon, Abel Beth Maaka, Janoa, Kedes, Hazor, Gilead, Galil eno Naftali ghakhulo akeqo ghi leluvetsu puzu timiqo kugha sasu Asiriya lo akughushi sawuve.

³⁰ Uzia nu Jotham no Juda lo kakeu mpe amukuu shi akelono Ela nu Hoshea no atheshino akukau Peka ghiqhiveno pa zuqhulo kaluve.

³¹ Peka no kiu mlakeno ti kumtsu Israilmi Kukami Xughililo yekutsupe qhipu ani.

Jotham no Juda lo Kalu

³² Remaliya nu Peka no Israil lo kakeu mpe akiniu shi akelono Uzia nu Jotham no Juda lo akukau shilu

³³ apunu mpe muku pungu shi akelono eno Jerusalem lo ampe chighi tsugho ayehpelu. Pa zaye Jerusha, Zadok ngake.

³⁴ Papu Uzia papeghi Jotham no AMPEU pulou kiu keno ti mlatsu.

³⁵ Ikemu asu-atu kumlla a-a qoye shipsamono achekehu timiqoye ishokibe a-a tipaqo lono aghakishi eno piti kumnakeu tsuche. Jotham vechewo Achineki lo Ahuu Khagho mlasutsuluke.

³⁶ Jotham no kiu mlakeno ti kumtsu Judami Kukami Xughili yekukutsulo qhipu ani.

³⁷ Pano ka ake ghuloki lono AMPEU no atughushi Siriya kukau Rezin ngo Israil kukau Peka pama puwuno Juda le thu.

³⁸ Jothem ye thive eno Kukami qhochekeu alo David phughilo shiqhove, eno panu Ahaz no azuqhulo akukau shiluve.