KUKAMI AKINIU 14 - BAIBEL (BSI)

Juda lo Kukau Amazia

¹ Jehoahaz nu Jehoas no Israil lo kakeu mpe akiniu shi akelono Amazia Joas nu no Juda lo akukau shilu

² apunu mpe mukupungu shi akelono eno paye Jerusalem lo ampe mukutoku ayehpelu. Pa zaye Jehoadin, Jerusalem lono ighikemike.

³ Paye kiuno AMPEU pulou keno ti shitsu ikemu pa zuu akukau David toiye kumoe, ikemu papu Joas no kiu mlatsukeno pa ghi ti mlatsu.

⁴ Paye asu-atu mllachekeu a-aqo hexavetsumoe ikehu timiqoye tamono a-a tipaqo lono aghakishi eno piti kumnakeu kumlla shiche.

⁵ Amazia no tsaqutsalei akuka peluve kemtsa khuuno papu akukau heqhi pithive keno tipau tsuqhi pithive.

⁶ Ikemu paye pa nuliqo pithi tsumove tiye Muse yezah lo AMPEU no ahza tsupuakeu kiqi lono: “Anuliqono kuquvekeu ghenguno apuaza pithimlae eno apuaza no kuquve keu kumla ghenguno anuliqo pithivemlae; ikemu timi lakhiye pawu kukuqu ghenguno pa pithilu nani.”

⁷ Amazia no amti Khila ipikeu alono Edommi ghushimi 10,000 heqhivetsu eno aghushi puzu Sela phughi hakholuve eno aje tipau pesu Joktheal ipi kukide luvekeu ishi kutolo tishi pi chephi.

⁸ Tishino Amazia no Israil kukau Jehoas khughi aghushi nike aghinikishimi hapuwu.

⁹ Ikemu akukau Jehoas no asutsa hipau khochile, puwo: “Libanon naghutolo asahukupu bo lakhino asutsa lakhi Kedar subo lau pipuwu: ‘Onga pelono inu sasu kulakupu shipenike tsulo,’ ipi. Tughashi lakhino ti vechewu cheke lono asahukupu subo hu neda suve.

¹⁰ Ike Amazia, nono Edommi shou toluvepi noye qhezakeuno chhitoi ani. Tighenguno ojekipi huno lukumkha shiveno inaqhoi akilo alo. Kushiye noye akupuna xukutho anikya? tiye olau eno owu timiqo lau shikupsa sughinikeuke.”

¹¹ Ikemu Amazia no ti initsumove, tighenguno akukau Jehoas no pawu timiqo sasu ighino Juda lo Beth Shemes ipikeu lono pa sasu aghu shithuve.

¹² Amazia ghushimiye tomlave eno paw ghushimi kumtsu panongu kilo powokhave.

¹³ Jehoas no Amazia kughapesu akughu Shive, Jerusalem lo ighino aphughi tupikiye kumtsu kubole khavetsu, tiye Efraim khagho lonowo Acheku Khagho kutoloke, ti kuma dolo miter 200 tohike.

¹⁴ Pano Jerusalem chinekilo tsandi shuna eno achinekilowu aghunanu eno akuka kilo akukakini kumtsu lheluveno xapusu Samaria lo wuve. tipau gholo timi ghi kugha sasu pa gholo wuve.

¹⁵ Jehoas no kiu mlakeno ti kumtsu eno pa mlo kumtoshi Juda lo kukau Amazia sasu aghushikeu ghili hi kumtsu Israil Kukami Xughililo yekutsupe qhipuani.

¹⁶ Jehoas ye thive eno pa kumoye Samaria lo kukami qhochekeu alo qhove eno pa nu Jeroboam Akiniu no pa zuqhulo akukau shiluve.

Juda kukau Amazia Kithi

¹⁷ Judalo kukau Amazia ye Israil lo akukau Jehoas no thive kethiu ampe chighi pungu xu.

¹⁸ Amazia no kiu mlakeno ti kumtsu Judami Kukami Xughililo yepe puani.

¹⁹ Jerusalem lono Amazia yiveniye kughu akeu ithiveno paye Lakis phughilo pove, ikemu pa ghumino pa pape ighino pa heqhive.

²⁰ Pa kumoye khurshi lono xapusu Jerusalem lo ide ighino David phughilo Kukami kumo kuqho alo qhove.

²¹ Juda lo timiqono panu apunu mpe chighi tsugho shiakeu Uzia pesu akukau shiluve.

²² Uzia no papu thive kethiu Elat lekitheluveno mlakitheluve.

Jeroboam Akiniu Israil Kukau

²³ Amazia Joas nu Juda lo kukauno kakeu mpe chighi apunguu shi akelono Jeroboam Jehoas nu no Israil lo akukau shilu eno paye Samaria lo ampe lhobidi lakhi ayehpelu.

²⁴ Paye AMPEU zulo axine shive eno pa zuu akukau Jeroboam Nebat kumla lhoksaqo papeuve, khuno Israilmi sasu axine lo ilovekeno.

²⁵ Pano Israil yeghi ghakhu kumtsu puzuu Israilmi wu shichekeu luchilelu, tiye ahuu Hamat lono apeu Akithi Zughi kutoloke. Tiye AMPEU, Israil Lhou no pa qeu tungkupu Jona Amitai nu Gat Hafer ghami vechewo piqhi puake.

²⁶ Israilmi shishe ime akeu AMPEU no ithulu; khunomu panongu kuphunikeu kuhave.

²⁷ Ikemu Israilmi alhokuthu ghenguno puhapighive penikeu ye AMPEU pulou kumoe, tighenguno pano akukau Jeroboam Akiniu vechewo panongu xaphelu.

²⁸ Jeroboam Akiniu no mlakeu kumtsu aghushiqalo pa mlo kuloghi ghili eno pano kiutoi Damaska ngo Hamat luchile pesu Israilmi tsulu keu hi kumtsu Israil KUkami Xughili yekutsukeulo ani.

²⁹ Jeroboam ye thive eno Kukami qhochekeu alo qhove ipuzu panu Zekharia no pa zuqhulo akukau shiluve.