KUKAMI AKINIU 13 - BAIBEL (BSI)

Jehoahaz no Israil Kukau Shilu

¹ Joas Ahazia nuno Juda lo kakeu mipe muku akuthuu shi akelono Jehu nu Jehoahaz no Israil lo akukau shilu eno paye Samaria lo ampe chighi tsuni ayehpelu.

² Pa zuu akukau Jeroboam toi pa ghi AMPEU zulo axine shive eno Israilmi sasu axinelo sailove; paye khilemu alhoksa laghiqo hu phemlave.

³ Tighenguno AMPEU no Israilmi shou amlo ideveno Siriyami kukau Hazael eno pa nu Benhadad pelono ghuthu kutomolo Israilmi shou tolu auvepe.

⁴ Tileno Jehoahaz no AMPEU vilo inikhu eno AMPEU no Siriyami kukauno Israilmi aloqhi shikimghi akeu ithuluno pa kighini khochile tsu.

⁵ AMPEU no Israilmi lau sakiphetou lakhi puwutsukeu vechewo Siriyami ulono lekholu eno Israilmi ye azuu toi alokughuno shi xulu.

⁶ Ikemu panonguye akukau Jeroboam no panongu sasu axine lo ilovekeu xine hu phevemlano tamomithe kuqu auve; eno alhou liu Ashera julho hu Samaria lo acheuve.

⁷ Jehoahaz ye ghushimi kuha ipuzu khurshi kusami lhopungu, khurkulu chighi apukhu lono chewuni kemi 10,000 likhi ae, kughengu Siriya kukauno kutomo heqhi khavetsu eno ayeghi mukhu toi kughulhovetsu.

⁸ Jehoahaz no mlakeu kumtsu eno pa mlokivi kumla jeli kumtsu Israilmi Kukami Xughililo yekutsupe qhipu ani.

⁹ Paye thive eno Samaria lo qhove eno panu Jehoas no pa zuqhushi akukau shiluve.

Jehoas no Israil Kukau Shilu

¹⁰ Joas no Juda lo kakeu mpe shighi akutsuniu shi akelono Jehoahaz nu Jehoas no Israil lo akukau shiluve eno Samaria lo ampe chighi tsugho ayehpelu.

¹¹ Pa ghi AMPEU zulo axine kumla shive eno akukau Jeroboam no Israilmi sasu axinelo sailove keu kumla lhoksa papewuve.

¹² Jehoas no mlakeu eno pano amlo kumto shi Juda lo akukau Amazia sasu aghushikeu hi kumtsu Israilmi Kukami Xughili lo yekutsupe qhipuani.

¹³ Jehoas ye thive eno Samaria lo kijemi qhochekeu alo qhove eno panu Jeroboam Akiniu no pa zuqhulo akukau shiluve.

Elisha Kithi

¹⁴ Tungkupuu Elisha ye ighono akithi kusu suve, pano thiveniye akelono Israil kukau Jehoas no pa xuju ighi. “Ipuo, Ipuo!” ipi igha pano qathu. “Noye Israilmi sakuphuu atou shicheke!”

¹⁵ “Asuzu lakhi eno apiji hami ikhilulo,” pi Elisha no ahza tsu. Jehoas no tipaqo ikhiluve,

¹⁶ Elisha no pa vilo kapuwukepu shi aghili kutolulo ipi. Akukauno kutoluve, eno Elisha no pa-u pesu akukau u shou betsu.

¹⁷ Tishino tungkupuuno mije tsukeu kiqi lono akukauno alashe khikhi Siriya kudau shephe puakeno tipau khaqhi. “Apiji kapuwulo!” ipi Elisha no ahza tsu. Kuchono akukauno apiji kapuwuve kemtsa tungkupuu no igha pi, “Noye AMPEU wu apiji kena, tipau huno pano Siriyami shou tokulu shilu nani. Nono Afek lono Siriyami sasu aghushiano nono panongu theqhilu nani” ipi.

¹⁸ Itaghi Elisha no akukau vilo apiji hami ikhiluno ayeghilo kasulo pi. Akukauno ghuthu kuthu ayeghilo vesuno ngove.

¹⁹ Tishive keu lono Elisha ye amlo ideveno akukau vilo pi, “Noye ghuthu pungua tsughoa kutolo vesukepu shi ae, tishi aye nono Siriyami shou kumtsu tokulu shiluve niche; ikemu itehiye noye ghuthu kuthu likhi panongu shou tokulu shiluniae.”

²⁰ Elisha ye thive eno qhove. Mpe atsutsu Muabmi aloji aloji ighino Israilmi yeghi le ighiche.

²¹ Ghuthu lakhilo Israilmino timi lakhi kumo shiqho akelono paikhavi lono aghumino leniye cheghikeu panonguno ithuluve; ike panonguye timi kumo hu pesu Elisha kumolo vesuve. Kughou timi kumo no Elisha saghi dilukeno timi huye akuxu shive eno puthugho ithughive.

Israilmi ngo Siriyami Aghushi

²² Siriyami kukau Hazael no Jehoahaz no kake thaqhu kutolo Israilmi ghime che,

²³ ikemu AMPEU no panongu lau kimiye eno kupukeu ache. Panongu pelono puhavepeni keu pano pulomoe tighenguno panongu kuphutsu, tiye pano puloshoqhi Abraham, Isak eno Jakob lau shipe puakehu paye khilemu pawu timiqo kumsumavemoe.

²⁴ Siriya kukau Hazael no thiveke lono panu Benhadad no akukau shiluve.

²⁵ Tileno Israil kukau Jehoas no ghuthu kuthu kutolo Benhadad toluve eno aphughi khipaqo Benhadad no Jehoas papu Jehoahaz no ka akelono leluvekeno tipaqo kumtsu hakhochileluve.