KUKAMI AKINIU 10 - BAIBEL (BSI)

Ahab Lagha Pithikhave

¹ Ahab lagha lono ikowokeqo pano lhotsuni Samaria phughilo ache. Jehu no yesu lakhi yepe aphughi lo ayehkipemi lau, atomi aghakhumi lau eno Ahab lagha lo ampi atomi kumtsu lau kulha tsupuwu. Yesulo hitoi yepua:

² “Nonguno akukau lagha kughukoqo lau ampi shitsu ani eno nongu u bokhulo, khurkulu, khurshi, aghunanu eno aliwo hothapuakeu phughi ishi ani. Tighenguno nonguno yesu hipau ithulu kemtsa

³ akukau laghalo juno akiviu kishephelulo, pa pesu akukau shilulo eno pa saphu kepushi aghushilo.”

⁴ Samaria lo ayehkipemiye kichimamaive. “Ninguye kishi puzu Jehu mujochile lunikya?” pi panonguno pi, “Kughengu akukau Joram ghi akukau Ahazia ghi shimlave keno kiu?”

⁵ Tighenguno kukakilo ampi shitsu akeu kijemi eno aphughilo ampi shitsu akemiqo gholo atomi aghakhumi eno ampi shikutsumiqo kuqhano asutsa hipau Jehu lau tsupuwu: “Ninguye oqemiqo eno nono kiukiu pimu shitsunike kutope ani. Ikemu ninguye khumu pesu akukau shitsumlae; nono kiuno akiviu pi kumsulu anikeno tiu shilo.”

⁶ Jehu no yesu kutau lakhi panongu lau yeh: “Nonguno igholo su ani aye eno ino ahza tsukeu papemi aye thoghiu hipa ghulokilo akukau Ahab laghalo kughukoqo akutsu lupesu ilau Jezril lo sughilo.” Akukau Ahab lagha lono ikowokeqo lhotsuni huye Samaria ghakhulo atomino tuchohejua, panonguno tipaqo saputhuke.

⁷ Kughou Jehu yesu ithulukeno Samaria lo sakiphemino Ahab laghami pano lhotsuni kutsu miche pesu ashoghi lakhilo suno Jezril lo Jehu lau tsupuwu.

⁸ Kughou Ahab lagha kutsuqo pa lau sughi aniepi Jehu vilo pithikeno pano akutsu tipaqo amqo kini shino aphughi khagholo thoghiu kutolo qhivelopi ahza tsu.

⁹ Thanau pano ti khalacheu ipeno tile ngo akemi vilo ishi pi, “Ino amuqu shipuzu akukau Joram heqhi pithive; tipaulo nonguye kumu amakho kuha. Ikemu khuno hipaqo heqhi khave kya?

¹⁰ Tishikeu huno AMPEU no Ahab lagha ghenguno pipuakeu kumtsu shikupuve ipi ithive. AMPEU no Elija tungkupu vechewono kiu piqhi puakeno tipau kiqi lono mlavae.”

¹¹ Tishieno Jehu no Ahab lagha achili kutau Jezril lo akemi ghi, pawu kijemi ghi, pa kusami kuchomi ghi eno achinemi kutolo lakhimu puxumono pithi khavetsu.

Akukau Ahazia Lagha Pithive

¹² Jehu ye Samaria lo wunike ghenguno Jezril qhive. Wuchekelo alaghilo “Bherikhemi Ghuno-a” ipikeu-a lono

¹³ paye Juda lo kukau akithiu Ahazia laghamiqo sasu kusholu eno pano panongu vilo iniju, “Nonguye khunoqo kya?” Panonguno khochile, “Ninguye Ahazia laghaqoke. Ninguye Jezril lo kukaliu Jezebel nuliqo eno akukau bolomi sukumsa tsukeu michishi putsawu niye cheni.”

¹⁴ Tileno Jehu no pawu timiqo ahza tsupuzu akuxuno panongu kughalulo pi! Kuchono panonguno tipaqo kughaluve, tishino pano tipaqo kumtsu Beth Eked aqokuchu-a phivi lono pithi khave. Panongu kumtsu kuqhakelo pano lhobidi kini lakhimu puxumono pithi khave.

Ahab Lagha Xukuluqo Pithive

¹⁵ Tishive kethiu Jehu ye tipau-a qhiveno wucheke lono Rekab nu Jonadab no pa sasu kusholu. Jehu no petha pa tsulu eno pi, “Nikujoye akukumsu aphiphie ikehu noye ikuphu tsunima?” Jonadab no khochile, “Tishinie” ipi. Pama au petha shikilelu eno Jehu no pa sunhe pesu khurkulu lo sulu no

¹⁶ ishipi, “Igholo ighilo niye kiutoi AMPEU lau amlo kutsumi keno nono okutoshino ithi nani.” Tishi pama kumtsa chesusu Samaria kutolo ighilu.

¹⁷ Kughou pama no Samaria tolu keno Jehu no Ahab lagha lakhi mu ghumono pithi khavetsu. Tishive nani kepi azuuno AMPEU no Elija tungkupu vechewono pipuae.

Baal Kumllami Heqhikhave

¹⁸ Jehu no Samaria lo kuami kumtsu ku-kutsuno pi, “Akukau Ahab ye kitila pesu Baal lhou tsue, ikemu niye kutomo pesu pa huthunie.

¹⁹ Baal tungkupumi kumtsu kulo, pa mllachekemi eno pa chinemi kumtsu kulo. Khumu povemla; niye aghakishi kije pesu Baal mllani cheni, tighenguno khuuno ighimove keno tipauye heqhi pithiveni.” (Jehu no amqu shipuzu Baal kumllami kumtsu pithiveniye pishiqhi ae)

²⁰ Tishino Jehu no ahza tsu, “Baal gihu mllanike atsala lakhi ikhiphe tsunikeu asheshulo!” Ashekushu zah

²¹ Jehu no Israil yeghiqha kumtsulo vekupha puwu. Kuchono Baal kumllami lakhinomu ighimovekeu shimono kumtsu ighikha. Panongu kumtsuno Baal chinekilo ilokha, akicheku kumtsu shekithikhoi ilo ngoluve.

²² Tileno Jehu no achinemi vilo chijeboboi keu phikuzu akumllami kumtsu puulo pi ahza tsu.

²³ Tishive kethiu Jehu ghi Rekab nu Jonadab sasu achinekilo ilo eno tile ngo akemiqo vilo pi, “Mutsuqhei Baal kumllami likhi hilehi ngopelo, AMPEU kumllamiye lakhi mu sasu kevilo.”

²⁴ Tipathiu pa eno Jonadab pamano pitikeu kumllagho Baal tsunikeu shi wu. Pano timi lhotache pesu kishekulu mijeveno achineki khalacheu ngokheluvepe eno hitoi pive: “Nonguye timi hilehi akeqo kumtsu heqhi pithivelo; khuu shemuzu lono phepupoveni keno tipau theli pa kuxulu luve nani!” ipive.

²⁵ Jehu no akipiti kumllagho shitaluve kemtsa, pano ti khalacheu aghukhepe akeqo eno kijemi vilo pi, “Sholokuu ilopuzu panongu kumtsu ghiqhi pithivelo; panongu lakhimu pokavepe kevilo!” Kuchono panonguno azuta sujo pesu ilono panongu kumtsu ghiqhi khavetsu eno akumo sunhe pesu khalacheu ipeghi. Tishi susu achineki alou bologhi panonguno ilo

²⁶ eno achine tsukucho akeu pe ipeghino pitivetsu.

²⁷ Hitoi shi panonguno achine tsukucho eno achineki hexapiniyivetsu, tishino achineki hu pesu kubakupujo a shivetsu, tihu ishikutolo tishi ani.

²⁸ Hitoi shi Jehu no Israil yeghilo Baal kumlla puhavetsu.

²⁹ Ikemu pa ghi akukau Jeroboam, Nebat nu khuuno Israilmi sasu axine lo iloveno shunano shikeu mishitsu kini mlape Bethel lo eno Dan lo qhino mllauve ketoive.

³⁰ AMPEU no Jehu vilo pi, “Nono Ahab laghaqo lau ino shinishi aketoi mlatsu. Tighenguno olaghaqo pelono tiqheli abidiu kutolo Israilmi shou akukau shilu peni.”

³¹ Ikemu Jehu ye pa mlo kumtsu suno AMPEU yezah, Israil Lhou ghokulu shimoe; tipau zuqhulo paye Jeroboam khuuno Israilmi sasu axinelo ilovekeno paw pape wuve.

³² Tipathiuye AMPEU no Israilmi ghakhu kumghu kithewovetsu. Siriya kukau Hazael no Israilmi ghakhu kumtsu leluvetsu

³³ Jordan lo kipela kudau lono wo apeu Aroer phughi ti Arnon ghoki mukulo akeu kutoloke, tihuye Gilead eno Bashan ghakhu Gad, Ruben laghaqono achekeno eno kipelau Manasse laghano acheke.

³⁴ Jehu no kiu mlakeno kumtsu eno pa mlo kivi ghili kumtsu Israilmi Kukami Xughililo yekutsupe qhipuani.

³⁵ Paye thive eno Samaria lo qhove eno panu Jehoahaz no pa zuqhulo akukau shiluve.

³⁶ Jehu ye Samaria lo Israilmi kukau shi ghi ampe muku tache ayehpelu.