KUKAMI AKINIU 1 - BAIBEL (BSI)

Elija eno Akukau Ahazia

¹ Israilmi kukau Ahab thivekethiu, Muab ghakhumino Israil sasu kumjothuve.

² Israilmi kukau Ahazia ye Samaria lo akukaki kunguu khachelo ake lono ikiqiveno aloqhi izave. Tileno paye aghinimi khami hapesu Ekron phughilo Filistiyami lhou Baalzebub lau paye vilu nani keo mokeno ithi sughi peniye hapuwu.

³ Ikemu AMPEU wu kungumino Tishbe lono ighikeu tungkupu Elija pelono akukau Ahazia ghinikishimiqo kushiniye wucheni keno iniju peniye sasu kusholo pi ahza tsu eno ishi inijupe: “Nonguye kushi niye Ekron phughi lhou Baalzebub putsau cheni kya? Israil lo Alhou kuhaveapi nonguye kumsu ani kesha?

⁴ Akukau vilo AMPEU no ishi pi ani pilo, ‘Noye izavekeu lono vilumo nani; ikemu thive nani ipilo!’ ” AMPEU no ahza tsukeu kiqi lono Elija no pivetsuno,

⁵ aghini kishimiqoye tileno akukau lau idewove. “Nonguye kushiye ide ighivea kya?” pi akukauno iniju.

⁶ Panonguno khochile, “Timi lakhi ningu sasu kusholu keuno ningu vilo idewoveno AMPEU no ishi ovilo piani pilo pie, ‘Noye kushiye Ekron phughi lhou Baalzebub putsau cheni kya? Israil lo Alhou kuhaveapi nonguye kumsu ani kesha? Noye izavekeu lono vilumono thive nani!’ ” ipie.

⁷ Akukauno iniju, “Timi ju huye kiutoi ithulu kya?”

⁸ Panonguno khochile, “Paye tughashi yikono shikeu chijeboboi keu phikuzu ucheni, amhi ghoghoi eno ashiyiko pokha pucheni,” ipi. “Tiye Elija kena!” ipi akukauno akichiqhi pi.

⁹ Tileno pano kijemi lakhi gholo timi lhopungu kuto tsuno Elija saghi lopi pipuwuve. Kuchono akijeu huno Elija ye ato lakhilo iqa aghikeu phuluno ishi pa vilo pi, “Alhou wu timio, akukauno ovilo hilau iqighilopi ahza otsu ani.”

¹⁰ Elija no khochile, “Ino Alhou wu timi shi aghiaye kungugha lono ami iqighino no eno owu timiqo pitiqhive peniu!” ipi Elija no tipike mtsa lono ami iqighino akijeu eno pawu timiqo pithiqhive.

¹¹ Akukauno itaghi kijemi lakhi gholo timi lhopungu puwu, panonguno iqhoghino Elija vilo pi, “Alhou wu timi, akukauno ovilo mtazu iqighivelopi ahza otsu ani!”

¹² Elija no pi “Ino Alhou wu timi shi aghiaye, kungugha lono ami iqighino no eno owu timiqo pitiqhive peniu!” ipi. Kuchono paikhavi lono Alhou mino iqighino akijeu ngo paw timiqo pitiqhive.

¹³ Itaghi akukauno kijemi lakhi gholo timi lhopungu hapuwu. Pano atolo iqhoghino khonhequ Elija zulo itsaqi eno hitoi inikhuthu, “Alhou wu timio, ikimiyetsulo eno iwu timiqo kuputsulo. Ningu kuxu pukhalu tsulo!

¹⁴ Puzuu kijemi pama eno pama wu timiqoye kungugha lono ami iqighino pitikhavetsua; ikemu kimiyeno ikuxu kuputsulo!”

¹⁵ AMPEU wu kungumino Elija vilo pi, “Pa sasu iqilo eno kumu msakevilo.” Tileno Elija no akijeu sasu akukau lau wu

¹⁶ eno pa vilo ishi pi, “AMPEU no ishi pi ani: ‘Kughengu, nono Israil lo Alhou kuhake toi Ekron phughi lhou Baalzebub putsau peniye oghinimiqo hapuwuke—tighenguno noye vilumono thive nani ipi anie!’ ”

¹⁷ Ahazia ye AMPEU no Elija vechewo pitsuketoi kuchono thive. Ahazia ye atianuli kuha tighenguno pa thikuzuu Joram no pa shelo akukau shiluve tiye Jehosafat nu Jehoram no Juda yeghilo kakeu mpe akiniu shi akelonoke.

¹⁸ Akukau Ahazia no kiu shikeno kumtsu Israilmi Kukami Xughili kakulo yekutsupe qhipu ani.