JOYIL 2 - BAIBEL (BSI)

Tulhaqu no AMPEU Tsala Kutughu

¹ Alhou kimthe toghi Zion lo afuko kuyighalo, kutughukeu sutsa shilo. Juda lo akemiqo, msa khokhoshilo! AMPEU tsalaye itheno chenike.

² Tiye zumoyikeu eno zuchiyikeu tsala lakhike, khumuyikeu eno kimhi kughu tsalake. Tulhaqu no ghushimi loji kije toi hakutsutsu cheni, akuzuno naghuto nhakhaluve keu toike. Khilemu hikithipu toikeu shi ighijumphike, khilemu itaghi tikithipu shimo nani.

³ Ami toi tipaqono asutsuni chuve. Tipaqo zulo ayeghiye Eden ghutu toike, ikemu tipaqo thiu juaye asayeqha toi thoqhaleike. Kiunomu tipaqo zulo pokaumlake.

⁴ Tipaqoye khurshi qo ju toike; tipaqoye aghushi khurshi toi poke.

⁵ Tipaqono naghuto kutsuqalo ikawukelo, khurkulu toi tipaqoye ququshi kughake; Amilo atsuni kithi piti kelo toi tipaqoye zumzumyike. Tipaqoye ghushimi muqo kuloghino aghu launiye kujopesu akeu toike.

⁶ Tipaqono kupunu ighikelo kumtsuno thughuive; kumtsu gi phalayiveke.

⁷ Tipaqoye aghutomi toi leke; tipaqoye ghushimi toi aliwo kuptu mili-ikuke. Tipaqo kumtsu azuu muzuchoi chesuwuke eno hula hila kugho wovemoke momu kutami la vekhakeu shimoe.

⁸ Tipaqoye aghushi nanu aghikeu puxusuwu eno kiunomu tipaqo hakhamlake.

⁹ Tipaqono aphughi shou ikaiku; aliwo kuptu shou poiku; Tipaqono akilo mili ilo eno kupkami toi alashe lono kathauke.

¹⁰ Tipaqono hakutsutsu ighikelo ayeghino ithake; atsutsuno khokhoshike. Tsukinhe ngo aqhino zumoive eno ayepuqono yepuvumove.

¹¹ AMPEU no pawu ghushimi vilo tsutsusu keshi ahza tsuke. Aghushimi pa gholukemi kumzapu eno akuka kughushuke. AMPEU tsala kiutoi akuighupu kela! khuuno tipaulo xu kulupu kya?

Xachileighipenike Kukeu

¹² “Ikemu itehino pinamu amlo tsuqhiyi shipuzu kumvukeu ngo qanimlokeu eno amlo itapinyi shieno xaideghilo eno ilau ideghilo.

¹³ Nongu mlo kughuta shikeu huno nongu mlokusa piyelo; Nongu phimini suxuve keuno lumkhake kumoe.” Nongu Lhou AMPEU lau idechile ighilo. Paye kimiyekini eno kupukeuno chhitoike; paye kheakulu eno pano piqhivekeu pecheni; Paye pulhapujulo axine pevetsunike kutope ani eno ghimeqhimo nanike.

¹⁴ Khuno ithiani kya? noLhou AMPEU ye pa kukumsu kilive nanimu mthake, eno nibonileshi axa jeli nongu kumghape qhitsu luvike. Tileno nonguno athi eno atsayiji pe pa mllalu nanike.

¹⁵ Zion Toghilo afuko kuyighalo; kumvu nikeu zah lakhi tsulo eno kuhokumqo kepushi ku-lo!

¹⁶ Timiqo kuho kumqopelo; kuho ighikemiqo akimthe shi kutokupui pelo; Muchomiqo saghi, itimiqo eno angakughunu ghi hekutsu kumqolo. Anileshi kulaukemiqo ghi pano chebo qhiveno ighimasake.

¹⁷ Achinemi, akumlla kiptia ngo Achineki hukikha dolo AMPEU qe achekemino qanimlo ishi inikhu masake, “AMPEU, owu timiqo shou amlo ighiqhiyikeu atsulo. Ashiayeh kutami pelo nijukunatha eno nithaigha pekevilo. Eno nivilo, ‘no-Lhou khile ani kya?’ ipi pekevilo.”

Alhou no Ayeghi Vikithevepe

¹⁸ Tileno AMPEU no pa yeghi ghenguno kumsujutsu; eno pawu timiqo jupe amlo ighiqhive.

¹⁹ AMPEU no pawu timiqo putsachile pi, “Itehiye ino athi ngo atsayiji eno oliv teli nongu tsuni cheni eno nonguye aghakiqi shi nani. Ashiayeh kutamiqoye nongu jukunatha kithemo nani.

²⁰ Ino tulhaqu loji ahuuno ighikeu ikhive nani eno tipaqo hamiye asayeqha lo hasuve nani. Tipaqo tughiu shichekemiqo Akithi Zughilo hasuve nani, Tipaqo thikucholo chekemiqo Mediteriya Zughilo hasuve nani. Tipaqo kithi kumono tsumunashui nani. Ino panoqo kutsave nani, tiye panoqono nongu shou shipuakeqo ghengunoke.

²¹ ‘Aluzaqo, musa ichi kevilo, ikemu alokivishi amloqilo kughengu AMPEU no nongu ghenguno hikumtsu shivetsuake.

²² Lhoxuqo, musa ichi kevilo, achukumzapuno xuthileyi ani; asubono axathi pithi ani, eno khughuthi ngo atsayithi kumzapushi anike.

²³ “O Zion lo akemiqo, amlo kiqishilo, AMPEU nongu Lhou no nongu ghenguno kiu shivetsu akeno tipaulo alovilo. Pano ghile tsala tsutsughu achipiu pe nongu tsuke; Pano nongu lau susu tsutsughu ghuqhi tsuke eno puzuu toi ghixu tsutsughu tsuke.

²⁴ Aniqalo athi no chhitoi nani ke; Tsughuchekeu-a phivilo atughukolo atsayi ji ngo oliv telino yeliqole niake.

²⁵ Tulhaqu lojino nongu xabo chuvetsukeu mipeqolo nonguno khije amheqive keno ino nongu tsuchilenike. Iwu ghushimi, kighilheu, tsakuthau, shikupusau huye ino nongu shou puwuke.

²⁶ Itehiye nonguno chunike nibonilei ani eno aghaqilu nani. Nongu Lhou AMPEU khuuno nongu ghenguno akumzapushi mlavetsu keno, nonguno pa sheqhe nani. Iwu timiqo khilemu jukunatha kithe pemo nani.

²⁷ Tithiuno, Israil, niye nongu gholo anikepi ithi nani, eno ni, AMPEU no nongu Lhou eno kutau Lhou kuhake. Iwu timiqo khilemu jukunatha kithe pemo nani.

AMPEU Tsala

²⁸ ‘Hithiu timi kumtsu shou ino ighungu lepukutsu nani Nongu nu-noqo eno angano-qono itsape pesu asheshu nani; Nowu muchomiqono asamo pumo nani, eno nowu lhothemino kungunhetsu qo ithulu nani.

²⁹ Tipa ghulokilo ino aqemi, kiptimi ngo totimiqo shou ighungu lepukutsu nani.

³⁰ “Tipa tsala vehu ino atsutsulo ngo ayeghi shou amichipu tsu nani; tilehi aji kuqo, ami eno amichhi phokeu anani.

³¹ AMPEU tsala akuighupu tsala kije ighinike zulo, tsukinheno zumoive nani, aqhino aji toi huchuive nani.

³² Ikemu AMPEU vilo kuphu lepi qhuiniju kemi kumtsu xapheluve nani. AMPEU no piveke toi, ‘Jerusalem lo ngo Zion Tolo khamiye poluve ani; Ino kisheluve kemiqoye xulupe nanike.’ ”