JOSHUA 9 - BAIBEL (BSI)

Gibeonmino Joshua Pishiqhi

¹ Israilmino toluakeu Jordan kulolau kukami kumtsuno ithive, naghuto ngo naghuto pukhulo kuami, azughi mukuqalo kuami Libanon kutolo ithive, tipaqoye Hatimi kukami, Perizimi, Havimi, Amarimi, Kananmi eno Jebushimi kukamiqo ke.

² Panongu kumtsu kuqhano Joshua ngo Israilmi sasu kumjo nike kutove.

³ Ikemu Gibeon lo Havimino Joshua no Ai lau eno Jerikho lau kiu shivekeno chiluno

⁴ panonguno Joshua pishiqhi nike kutove, panonguno achuqupu kutope gadaha shou pipe tipaqoye thoila phinhe pukhokeuno ghopu eno tipaqo shou aji kukuzu qono jida puku.

⁵ Panonguno aphinhe kuixu pepu eno pukhovekeu apukhu kuqho xapu. Panonguno achuqupu puche keqono thoqhai amno shive.

⁶ Tishi xapusu Gilgal pusho lo Joshua lau wu eno Joshua ngo Israilmi vilo pi, “Ninguye ayeghi kushuwa lono cheni, nongu pelo nisasu visho shi penishi anie.”

⁷ Ikemu Israilmino pi, “Ninguye kughenguno no sasu visho shimoaye sakya? Nonguye akupunu lono ighikemi keni ake.”

⁸ Panonguno Joshua vilo pi, “Ninguye nonguno pikeu shinie.” Joshua no panongu iniju,” Nonguye khilauno ighi kya?”

⁹ Tithiu panonguno hipatsa pi, “Akijeu, ninguye ayeghi kushuwa lono chenie, kughengu ninguno nongu Lhou AMPEU ghili chilue. Pano Ijip lo kiu shikeno ti kuchopu chiluvae.

¹⁰ Pano Jordan kipelau Amarimi kukami pama lau shikeu, Heshbon lo akukau Sihon eno Bashan lo Og, ti Ashtarot lo achekeu akukau pama shou kiu shivekeno chilue.

¹¹ Ni sakiphemiqo eno niyeghilo kuami kumtsuno ningu ghuzulalo chukepu ghengu kutopuno nongu sasu kusholepi, ningu pelo nonguno pikeu shilopie eno nongu pelo ningu sasu visho shilopike.

¹² Ni chuqupuqo julo, nino hi pususu niphu phevekeloye luvui ake, ikemu julo, itehiye qhaiveno amno shivae.

¹³ Ninguno aji kukuzu jida puku keqohu puzuu ye akitheshi ake, ikemu julo itehiye ixupinivae. Kushuwa lono cheighi kehu ningu phinhemgha eno apukhu kuqhoqo ixupiniyivae.”

¹⁴ Israilmi no panongu chuqupu hami ikhilu, ikemu tipau ghili AMPEU sasu kusutsajumove.

¹⁵ Joshua no Gibeonmi sasu shoupau shi kuputsaluve eno panongu pelo tishi xu auvepe.

¹⁶ Visho shiveno tsala kuthu shiveke thiu Israilmino kuchouno timi tipaqoye pano kupunulo achenie pi ithive.

¹⁷ Tighenguno Israilmino chesu tipaqo phughi Gibeon, Chefira, Beerot, eno Kiriat Jarim qolo wu.

¹⁸ Ikemu Israilmiye panongu pithimlave kughengu panongu sakiphemino pano sasu Israil Lhou jelono visho shive kehu timi kumtsuno nhenheshiu khave.

¹⁹ Ikemu panonguno khochile “Nino ni Israil Lhou AMPEU zulono tushokiqhi shivae. Itehi ninguye panongu shipsamlae.

²⁰ Ningu shoqhi ghenguno panongu pelo xu ape masae, nino tishimove aye Alhou no ni ghime nani.

²¹ Panongu pelo xuapelo, ikemu panonguye ningu ghenguno asu ghe eno azu puwo ningu tsumasae.” Titoi sakiphemino pivetsu.

²² Joshua no Gibeonmi pa lau saighilopi ahza tsu eno pano panongu vilo iniju, “Nonguye akupunulo acheniamu kushiye ayeghi kushuwa lono ighi kemi pi ipishi kya?

²³ Nonguno tishike ghenguno Alhou no nongu levae. No timiye kumtsu aqemi shiniae eno iLhou kumllapu ghenguno asu ghe eno azu kupumi shi aniae.”

²⁴ Panonguno khochile, “Akijeu nino tishiveke, kughengu AMPEU oLhou no pa qeu Muse veche ahza tsukeuye nonguno khilau wunikeno tipa yeghi kuchopu pe nongu tsuve eno wuke laghilo timi kumtsu pithiveghi wukeu hu kuchoue. Nino tishi putsae kughengu tino ni shikumsave eno nikuxu puhave nike msave.

²⁵ Itehi ninguye oqholo auvae. Nono nipe kiu achipiu keno ogho shilo.

²⁶ Tighenguno Joshua no hitoi shi, pano Israilmi pelo panongu pithive pemo nike susholuve.

²⁷ Ikemu pano panongu pelo aqemi shivepe, Israilmi ghenguno eno akumlla a ghenguno asu eno azu puighinikeu shivepe. Ishi kutolo AMPEU no khileno pa mlla lepive keno tipa-alo mlla acheni.”