JOSHUA 8 - BAIBEL (BSI)

Ai Khatha pe Shipsave

¹ AMPEU no Joshua vilo pi,” Ghushimi kumtsu ogholo sasu Ai kutolo wulo. Msakevilo momu amlo loti kevilo. Ino opelo Ai lo akukau shou tokulu shipeni, pawu timi, pa phughi eno pa yeghiye owu shive nani.

² Nonguye Jerikho lau kiu toi shikeno Ai lau shinani, ikemu ishiye nonguno tile anhemgha eno lhoxuqo lulu nani. Ai phughi tipau zuleno azupouno lenike kutolo.”

³ Tighenguno Joshua no pawu ghushimi sasu Ai lenike wuve, pano pawu ghushimi dolo akiviu 30,000 ikhipheno puthono puwuve.

⁴ Hitoi ahza tsu, “Aphughi tuxau itshu alo ikemu aphughi lono putosu kevilo, lenike kutope ngolo.

⁵ Iwu timi sasu ino aphughilo ipeni. Kughono Ai lo kuamino ni haighini keno shothisu puzuu toi pochile ighiveni.

⁶ Panonguno aphu lono kushuwo kutolo niha nani. Panonguno ninguye puzuu poveketoi ishighi pove chea pi kumsu nani.

⁷ Tishi kelono nongu kughutshua lono ipeghino aphughi bothaluvelo kughengu AMPEU no ti nongu tsuve nani.

⁸ Nonguno aphughi leluve kemtsa ami suvelo AMPEU no ahza tsuke toi, julo ino ahza tsuvae.”

⁹ Tishino Joshua no panongu puwuve eno panonguno Ai kulolau Ai ngo Bethel kuma dolo itshu khea. Joshua ye tipaji apusholo ngove.

¹⁰ Thanau inaqhe Joshua no ghushimi kukutsu eno pa eno Israilmi sakiphemi sasu Ai lo wu.

¹¹ Pa gholo ghushimino aphughi ikulo laghila lo ahuu kudau apusho shi, panongu eno Ai dolo akhila lakhia.

¹² Pano pawu timi 5000 sawo Ai ngo Bethel kuma dolo aphughi kulola kudau kughutshuve.

¹³ Titoi ghushimi pelo aphughi ahuu ngo vepe eno athiu kichemi ashekhau qoye aphughi kulolau ngove. Ikemu Joshua ye tipaji akhilalo ngove.

¹⁴ Kughono Ai lo akukauno ti ithive keno pa eno pawu timiqo kumtsu aphughi lo timiqo mighi chhochho shi Jordan khila kudau Israilmi sasu puzuu shike alo aghushi nike wuve, paye pa thiuno pala khe anipi mthave.

¹⁵ Joshua ngo pawu timiqoye msano shothi chile wuve cheke ghilishi ayeghi asutsuni kuhakeu yeghiqha kudau pove.

¹⁶ Ai phughilo timiqo kumtsu kukutsu sasu panongu hache kelo pano phughi lono putosu wuve.

¹⁷ Timi kumtsu Israilmi thiu poche eno aphughihu khaqhipe kumsa shive eno khumu lakhachile kulupu kuhave.

¹⁸ Tithiu AMPEU no Joshua vilo pi, “Ongu pesu Ai kudau chhopuwulo, ino pe otsu ani.” pa vilo piketoi Joshua no tishi.

¹⁹ Pano pau peqhe kemtsa timi ithsu akemi kumtsu ilhethughino aphughilo kuha ilono bothaluve. Panonguno mtazu ami suveno aphughi pitivetsu.

²⁰ Kughou Ai lo timiqono athiu jupuwo keno amichhino atsutsu tove aghi. Panonguye pokulupu laghi kuhave, kughengu Israilmi khunoqo asutsuni kuhake kudau povechekeno panonguno idechile panongu sasu kumjouve.

²¹ Kughou Joshua no pishipuhu ami ithulu eno aphughihu luvae ipi ithive keno pawu timiqo sasu Ai mi ghiqhi thuve.

²² Aphughilo ilove kemi Israilmino ide iqighino aghushi thuve. Aimiqoye Israilmino bothaluvekeu ithive eno panongu kumtsu pithi khave.

²³ Ai kukau nguno alauye khumu pomlave. Pa ghi kughaluve eno Joshua lau sawuve.

²⁴ Israilmino ti ayeghi asutsuni kuhakeu khipa alo panonguno ha ighikeno tipa-alo no panongu ghiqhi khave eno panonguno Ai phughilo wuno tile aghikemi ghiqhive.

^25-26 Joshua no pa ngupa Ai kudau chhopuwope auve eno tile kuami kumtsu pithive moke kutolo pheqhimove. Tipatsala lo Ai lo kuami lhoxu kumtsu pithive, kiptimi totimi 12,000 pithive.

²⁷ Israilmino AMPEU no ahza tsuketoi Ai phulo aghikeu jeli eno tinhemgha jeli pe panongu wu shiluve.

²⁸ Joshua no Ai phughi pitivetsuno ayeghi kumsa shivetsu. Ishikutolo a-a titoi aphi.

²⁹ Pano Ai kukau asu lono tshuqhive eno avela kutolo tishi puave. Tsukinhe ilove kemtsa pa kumo ikhiqhi penike Joshua no ahza tsu eno pesu pano phughi liwo khagho lo vesuvetsu. Panonguno atu kutomo kiche kumqo pe pa kumo shou bevetsu eno ishi kutolo tishi ani.

Ebal Tolo Ayezah Phisu

³⁰ Tithiu Joshua no Ebal naghutolo AMPEU Israil Lhou ghenguno akumlla a lakhi mla.

³¹ AMPEU qeu Muse no Israilmi vilo shilo pi Ayezah lo ishi yepuakeu toi Joshua no shike: “Akiptia tipauye ayi nhemghano hethamo keu tuno mla.” Tipau shouno panonguno AMPEU lau piti kumllache eno kuposhukulu gho pe tsuche.

³² Tile, Israilmi nhethe lono pano Muse yezah apa lakhi atulo yepuku.

³³ Israilmino pano sakiphemiqo, kijemi atsa kukughami eno shonami gholono ajo kini shi puzu AMPEU wu Puloshoqhi Bohu hula hila puthughono Levi lagha achinemi Puloshoqhi Bohu pe akemiqo kudau jua. Timi tuxano panongu zupo pe Ebal naghuto tsu eno tuxano panongu zupo Gerizim naghuto tsuno puthughoa. AMPEU qeu Muse no panongu kukumgha ithulu nike kupunuve kehu tishilepi ahza tsuve.

³⁴ Tithiu Joshua no ighono igha ayezah kuchopu phipiye tipa gholo kukumgha eno angsu ghiliqo phipiye.

³⁵ Ahoholo akemi totimi itimi shoinami kumtsu lau Joshua no ayezah kumtsu phipe piye.