JOSHUA 6 - BAIBEL (BSI)

Jerikho Ikiqive

¹ Israilmi pelo ighi kumlapu shi Jerikho khagho khaveno ache.

² AMPEU no Joshua vilo pi, “Ino Jerikho ngo tile kukau eno ghushitomi kijemi pe oulo suvae.

³ No eno owu ghushimi tsala tsugho dolo tsala lakhilo ghuthu lakhi aphughi hu homxalo.

⁴ Achinemi tsuni no afuko lakhi pesu Puloshoqhi Bohu zuu chenani, atsala akutsuni niye no eno owu ghushimi no aphughi hu ghuthu tsuni homxani eno achinetomi no afuko igha nani.

⁵ Tithiu panongu no ashekhalo atuthu kushuwo lakhi fuchho igha nani eno nonguno ti chiluke mtsa kumtsuno ighono igha ighuni eno ti aphughi liwo huno ilaqive nani tishi aye ghushimi kumtsuno vejoi aphughilo ilove nani.”

⁶ Joshua no achinemi kuno pi, “Puloshoqhi Bohu khape lo, no tsunino azuu shino afuko pelo.”

⁷ Tithiu pano pawu timiqo vilo aphughi homxaluvelo pi eno panongu zuu AMPEU wu Puloshoqhi Bohu eno akhemiqo vilo wulepive.

^8-9 Joshua no ahza tsuketoi achinemi zuu akhemino cheve eno achinemino afuko igha pape wuve eno tipathiu Puloshoqhi Bohu gholono akhemino papeche. Ado kumtsulo afuko igha cheuve.

¹⁰ Ikemu Joshua no pa timiqo vilo ighakevelo pive, pano ahza tsumokeloye atsa lakhimu pikevilo pive.

¹¹ Titoi pano AMPEU wu Puloshoqhi Bohu gholono ghuthu lakhi tipa phughi homxaveno tipaji apusholo ngove.

^12-13 Joshua no thanau inaqheno ithuve, achinemino Puloshoqhi Bohu peluve. Panonguno bheri kibono shikeu afuko tsuni peno Puloshoqhi Bohu kipemi shekha shi che.

¹⁴ Atsala akinini itaghi panonguno ghuthu lakhi aphughi homxaveno apusholo ideghive. Panonguno titoi atsala tsugho homxave.

¹⁵ Akutsunini inaqhe vu ipeghi kemtsa aphughi tipau ghuthu tsuni homxave, tipa tsalalo likhino panonguno ghuthu tsuni homxave.

¹⁶ Akutsuniu homxake mtsa achinemino afuko ighano Joshua no timiqo vilo pi, “Ighalo, kughengu AMPEU no aphughi hu pe nongu tsuvae.

¹⁷ Aphughi eno tile akeqo jeli kuchopu pe AMPEU mllakeu kiqi lono kutsa velo. Rahab kutuqhaliu eno li kibolomi likhi qhivelo kughengu lino niwu pukujumi kusu tsuke.

¹⁸ Ikemu nonguno kutsavekeu nhemgha lakhimu lumo nani, nonguno luve aye nonguno aghime eno shiluksa Israilmi pusho alo sughi nosae.

¹⁹ Thime jeli, ayi, shuna eno tsandi nhemghaye AMPEU ghenguno pa kutashi velo. Tiye AMPEU wu kini kukutsu alo qhiveni.”

²⁰ Achinemi qono afuko igha. Timi qono ti chilu kemtsa iqha ighu eno aliwo ye ilaqi ve. Tishino ghushimino vejoi ala chesu ato phughilo ighino tipau khasuno leluve.

²¹ Panongu zutakihi pe aphughi lo timi kiptimi, totimi, kichimi itimi kumtsu ghiqhive. Panonguno amshi, gadaha eno bheriqo ghiqhive.

²² Tithiu Joshua no puzuu pukujumi aphughi tipaulo wukeu pama vilo pi, “Ti kutuqhaliu kilo wulo, li lau tushoqhi puakeu toi li eno libolomi saighilo.”

²³ Tighenguno pama no wuno Rahab eno apu aza ngo lino bolomi kumtsu saighi. Pamano li bolomi kumtsu gholo aqemiqo sasu Israil pusho alo xaphe saighive.

²⁴ Tipathiu panonguno aphughilo ami suvetsu eno thime jeli kuchopu pitipe amkhu shivetsu eno shuna tsandi eno ayi jeli ye pesu AMPEU kini kukutsu alo qhive.

²⁵ Ikemu Joshua no Rahab kutuqhaliu eno li bolomi kuxu xaphevetsu kughengu lino pukujumi Jerikho lo puwu keu pama pe kusu tsu ke. (Lino lagha ishi kutolo Israil yeghilo ani.)

²⁶ Tipa ghulokilo Joshua no ashoqhi tsa lakhi pe timiqo lau kutughuve. “Khuno Jerikho phughi mlakithenike pukaputsani keno AMPEU no angsu pa shou apeni. Khuno aboqha tu shosuni keno panu kiptimi anoghiu puhave peni. Khuno aliwoqo mlanikeno panu anupau puhave peni.”

²⁷ Tighenguno AMPEU ye Joshua gholo ae eno pa jekipi no ayeghiqha kumtsulo kulhave.