JOSHUA 5 - BAIBEL (BSI)

¹ Jordan ghoki kulolau Amarimi kukamiqo eno Kananmi kukami qo Mediteriya muku lo kuamiqo hu AMPEU no Jordan qhai shi vetsuno Israilmino kathalupe keu chilu khave. Panonguno msave eno Israilmi ghili kumsupe amlo kuloghi mlave.

Gilgal lo Aphighu yiko Ghakeu

² Tithiu AMPEU no Joshua vilo pi, “Ayi kumka pe azutachi hami iqilo eno Israilmi yiko ghathalo.”

³ AMPEU no ahza tsuke toi Joshua no tishi eno pano Ayiko Ghakuthato ipi a-a lakhi lono Israilmi yiko ghathatsu.

^4-6 Israilmino Ijip lono ipeve kelo kiptimi thaqhuye puzuuno ayiko ghathave. Tishikemu timi qono ampe lhobidi asayeqha veche chekelo anu kiptimi lakhimu ayiko ghathamo. Tinguno alaughi ampe lhobidi tokelo timi aghu shikuthuqoye Ijip lono ipekeqoye panonguno AMPEU gho lumoveke ghenguno thikhave. Pano panongu puasu lau ghi piqhi puakeu toi panongu pelo kinikulu eno aghuma yeghi ithulu pemove.

⁷ Panongu nuliqoye khilemu ayiko ghathamo eno Joshua no ayiko ghathatsu keuye tiqheli akitheuke.

⁸ Ayiko ghatha khaveke thiu aqoaho kumtsu ghakuthaku vimphi kuto apusholo ngo a.

⁹ AMPEU no Joshua vilo pi, “Ino ishino nongu launo Ijip lo aqemi shi akeu mlo ghime hu ikhive tsuae. Tighenguno tipa-a je pe Gilgal kutsue, aje tipau itehi ghi ani.”

¹⁰ Kughou Israilmino Jerikho phivilo Gilgal alo aqalo aghazu shi akeno panonguno tipau qhi chighi abidiniji Hechekulu ikhilu a.

¹¹ Thoghiu tsala huno Kanan yeghilo ipeghi tughiu kuchu kini chuphe. Aqhi sumokeu athi eno ashoqo sachu.

¹² Tithiuno Mana hu ikiqighi move eno Israilmino Kanan lono ipekighiqo chuveno tipathiuye mana ye qimove.

Joshua Ngo Azutakihi Kipeu

¹³ Joshua no Jerikho kupunulo akelo timi lakhi paikhavi pa zulo puthugho aghike ithulu eno azutakihi pe aghi, Joshua no pa lau wuno, “Noye niwu ghushimi gholo lakhi keo nighumi kya?” pi iniju.

¹⁴ Timi huno khochile, “Khi khiumu kumoe, niye AMPEU ghushimi sakipheuke.” Joshua no pa zulo ikiqi pa mlla eno pi, “Akijeu, niye oqeuke, noye ipelo kiu shipe nishi ania?”

¹⁵ AMPEU ghushimi sakipheuno pa vilo pi, “Opukhu kuqho ikhivelo, noye akimthe yeghi shou puthugho anie.” Pa vilo pike toi Joshua no tishi.