JOSHUA 3 - BAIBEL (BSI)

Israilmino Jordan Katha

¹ Thanau inaqhe Joshua ngo Israilmi ithughi eno Akasia pusho pheveno Jordan lo ighi eno ti puthasu wumphiloye tile aghazu shia.

² Atsala kuthu thiu sakiphemi no apusho veche ighi

³ no ahza timiqo tsu, “Kughou achinemino AMPEU nongu Lhou wu Puloshoqhi Bohu pechekeu nonguno ithuluni keno nongu pusho xaveno panoqo pape wulo.

⁴ Tishikeuno nonguno wukepu la kiche piye nani kughengu nonguye puzuu hipala ighi mphi. Ikemu ti Puloshoqhi Bohu kupunu kevilo tipaubo lono kilomiter lakhia toi keuno bidighi wulo.”

⁵ Joshua no timiqo vilo pi, “Nongu shikimtheve lo kughengu AMPEU no thoghiu nongu gholo akumzapu kumla mla nani,”

⁶ Tithiu pano achineu vilo Puloshoqhi Bohu peno timiqo zuu chelo pive eno pano pikeu toi panonguno tishi.

⁷ AMPEU no Joshua vilo pi, “Ino ishi kiu mlanikeno tino Israilmi kumtsuno okughape kijemi lakhi shi ogihu sumsa thuniae eno ino Muse gholo acheke toi ogholo anipi ithive nani.

⁸ Nono Puloshoqhi Bohu pechekeqo achinemi vilo pilo, Kughou nonguno Jordan tovekeno tile puthugho ngo khavelo.”

⁹ Joshua no Israilmi vilo ishi pi, “Hila ighino nongu Lhou AMPEU tsa inilo.”

¹⁰ Joshua no pi, “Nonguno chewukelo pano Kananmi, Hatimi, Havimi, Perizimi eno Jebusimi qo haphevetsuni putsae.

¹¹ Julo, ayeghiqha shou AMPEU wu Puloshoqhi Bohu no nongu zuu Jordan kuto wuve nani.

¹² Tighenguno Israil lagha chighikini dolono alagha lakhilo lakhikhi kishelo.

¹³ Kughou Puloshoqhi Bohu pekichemi no azulo apukhu nesu keno Jordan huno qowu move nani, qoiqi chekeu zuno kuchope kunguu ikuve nani.”

^14-15 Tiye ghile tsala shia eno aghoki ye atshunazu qoa. Timi qono apusho qhiveno Jordan puthanike wukelo achinemino panongu zuu Puloshoqhi Bohu pesu che.

¹⁶ Achinemino azulo nesuke mtsa azuno qomono kucholuve eno Zarethan thiu aphughi lakhi Adam kutolo azu choluve. Akithi Zughi kutolo qoiqi akeu hu suthave eno timiqo huno Jerikho ghungulo katha ipeghi luve.

¹⁷ Timi kumtsu aghoki katha ipeghimoke kutolo achinemi qoye AMPEU wu Puloshoqhi Bohu pe Jordan mtalo qhaikeu yeghilo ngo a.