JOSHUA 24 - BAIBEL (BSI)

Joshua no Shekhemmi Putsa

¹ Joshua no Israil shiyeh kumtsu Shekhem lo ku kutsu. Pano kichimi sakiphemi, atsakukughami kukutsumi eno panonguno Alhou zulo ighilu.

² Joshua no timi kumtsu vilo pi, “AMPEU Israil Lhou no hi piniye anie, ‘Nopu asu ye Eufrati ghoki kukuu akeu ado jushuwa shivae eno kutau lhouqo mlla cheke. Apu asu gholo lakhiye Tera ke, Paye Abraham ngo Nahor noqo papuke.

³ Tithiu ino nosu Abraham sasu Eufrati veche ighino Kanan yeghi kumtsu heche ighi. Ino pa vechewo ati anu kutomo kughuko tsuke. Ino Isak pa tsue,

⁴ Isak phi lono Jakob ngo Esao kughuko tsue. Ino Edom yeghiqha to pesu Esao mheghi shitsue, ikemu nosu Jakob ye Ijip lo iqiveke.

⁵ Athiuno ino Muse ngo Arom pama puwuno aghime kije Ijip lo sughi, ikemu ino nongu saipeghive.

⁶ Ino nopuasu noqo Ijip lono saipeghive eno Ijipmino khurkulu qo eno khurshi ghushimino panongu haighi, ikemu kughono nopu asunoqono Akuhu Zughi lo ilovekeno

⁷ panonguno kuphu tsulopi ivilo igha khu eno ino akuzu pe panongu dolo qhivetsu. Ino azughi pelo Ijip shou qoikuvepe eno panongu putsuqhive. Ino kiu Ijipmi lau shikeno nonguno ithivae. “‘Nonguye asayeqha lo ado kushuwa acheke.

⁸ Tithiuno ino nongu sasu Amarimi yeghi Jordan kipelau ighie. Panonguno nongu sasu aghu shie, ikemu ino nongu pelo panongu shou tolupeke. Nonguno pano yeghi luveno nonguno azuu hawoke thaqhulo ino panongu pithivetsue.

⁹ Tithiu Zipor nu Balam vilo nongu ghushove lopi atsa pi puwue.

¹⁰ Ikemu ino Balam tsa initsumoe, tighenguno pano no shou kumghavetsue eno titoi ino Balak launo xaphetsue.

¹¹ Nonguno Jordan kathawo Jerikho toluve, Jerikhomino nongu sasu aghu shie, Amarimi no shikeu toi, Hatimi, Girgashimi, Havimi, Jebusimi no nongu sasu aghu shike. Ikemu ino panongu kumtsu shou nongu pelo tolupeke.

¹² Nonguno azuu hawokelo Amarimi kukau pama pelo imeve peno havepeke. Nongu zutakikihi ngo asuzuye kumu shikepu kuhave.

¹³ Nonguno khilemu mlamo eno shimokeu phughi yeghipe ino nongu tsuke. Itehi nonguye nonguno shomokeu tsaibolo eno khughuthibo lono athixochu auvae.’ ”

¹⁴ Joshua no pikibe ghi pi, “Tishiaye itehiye AMPEU sumsa eno kuchouno pa qelo. Nopu asunoqono Mesopotamia eno Ijip lo mllachekeu lhouqo hu phevelo eno AMPEU likhi qelo.

¹⁵ Nono paqenishimo aye, nono khuu qeni keno ishino kughathavelo, nopu asuqono Mesopotamia lo mllachekeu lhouqo keo Amarimi khuno yeghilo nonguno itehi ngo anikeno, pano lhou mllani kya? Ni eno nikiboye AMPEU qeni.”

¹⁶ Timiqono khochile “Ninguno kutau lhouqo qeniaye khilemu ni MPEU phevemoe!

¹⁷ AMPEU no nipu asuqo eno ningu Ijip lo aquaxe lono saipeghike eno pano akumzapu kumla shipe piyechekeqo ithulue. Nino khile wukeno ililai shiyehqo gholo wulupeke.

¹⁸ Nino hipa yeghilo le ighikelo, AMPEU no hile akemi Amarimi kumtsu hapheve tsuke tighenguno ningu ghi AMPEU qenie, pano ni MPEU ke.”

¹⁹ Joshua no timiqo vilo pi, “Ikemu nonguye AMPEU qelumo nani keni. Paye akimthe Lhou lakhike eno akipimi qhitsumo nanike. Paye pa ghumi lau kutuumo nani,

²⁰ eno nono tusumi lhou mllaniye pa qhive aye pano oshou ideighi nani eno oghime nani. Pano opithive nani, paye puzuu ye oghenguno akivishi aghi luvi.”

²¹ Timiqono Joshua vilo pi, “Moe, nino AMPEU qenie.”

²² Joshua no panongu vilo pi, “Nonguno AMPEU qenike kishekeu huno nongu likhi nongu thopike.”

²³ “Tishiaye ti tusumi lhouqo nongu gholo akeu pevelo eno AMPEU Israil Lhou lau amikucho shinipi piqhivelo, “ ipi pano panoqo vilo tsatsai pi.

²⁴ Timiqono tithiuno Joshua vilo pi, “Ninguno ningu MPEU Alhou qenie, ninguno pa zah kutsuqo gholunie.”

²⁵ Tighenguno Joshua no timiqo sasu tipa tsala lono ashoqhi lakhi shiveno tile Shekhem lo pano ayezahqo papelu penike panongu tsuve.

²⁶ Joshua no Alhou yezah kakulo hipaqo yesu. Tithiu pano atuqu kije lakhi ikhilu eno AMPEU wu akimthe alo aphisubo qholo shosuve.

²⁷ Pano timi kumtsu vilo pi, “Atu hipau no ningu wu thopi ke. Hino AMPEU no ningu vilo pikeqo tsa kumtsu chiluvae.

²⁸ Tighenguno hino nonguno Alhou hebide nikelo lakhape anani.” Tithiu Joshua no timiqo puwoveno timi kumtsuno pututa yeghilo idewove.

Joshua ngo Eleazer Thive

²⁹ Tipathiu AMPEU qeu Nun nu Joshua ye ampe 110 shiveno thive.

³⁰ Panonguno Efraim yeghiqha tolo Gash naghuto ahuu pa yeghi Timnat Sera lo qhove.

³¹ Joshua no xuake tivilo Israilmi ye AMPEU qeche eno pano thiveke thiu panongu sakiphemi kuxu tivilo tishi ache, kughengu panonguye AMPEU no Israilmi ghenguno shitsukeu kumtsu ithi acheke.

³² Josef sukumoye Israilmino Ijip lono peighi eno Shekhem lo qhove, tipa yeghiye Jakob no Shekhem papu Hamor nuliqo launo ghuka 100 pe qhukeu yeghike. Tipau yeghiye Josef tianuliqo mheghi shive keuke.

³³ Aron nu Eleazer thive eno Efraim yeghiqha tolo Gibea taun khikhi panu Fineha tsuvekeno tipa yeghilo qhove.