JOSHUA 23 - BAIBEL (BSI)

Joshua Kikini

¹ Ado kushuwa thiu AMPEU no Israilmi pano hokumxa ghumiqo launo pano kulhoqhitsu. Tipa ghulokilo Joshua ye ighono muchomi shive.

² Tighenguno pano Israilmi sakiphemi kichimi atsa kukughami eno timiqo gholo kijemi kumtsu kusuno pi, “Niye itehiye ighono muchomi shivae.

³ Nongu Lhou AMPEU no nongu ghenguno shiyeh kumtsu lau kiu shikeno nonguno itehiye ti ithivae.

⁴ Julo, ino nongu shiyeh ghenguno khipaqo achili aghikeno pe nongu mheghi shivetsuae, tinguno alau ino lelukeqo shiyeh Jordan kipelauno kulolau Mediteriya Zughi kuto pe nongu tsuvae.

⁵ AMPEU nongu Lhou no panongu pelo nongu zulono shothive pe nani eno nonguno azuu hawoke mtsano panongu hapheve nani. Nongu Lhou AMPEU no nongu lau piqhive ketoi nonguno pano yeghi leluve nani.

⁶ Tighenguno kutokupuilo eno aghokulu shi Muse kakulo yepua keu kumtsu pelo kitilamu kughuchove kevilo,

⁷ tishino nongu gholo timi qhivekeqo gholo kutshu kevilo momu tushoqhi kelo panongu jeku kevilo momu tipau lhouqo mlla kevilo momu panongu zulo pishiqho kevilo.

⁸ Tishi nike zuqhulo nonguye puzuu toi AMPEU lau amikucho shilo.

⁹ Nonguno chewu kelo AMPEU no kije eno akuka kumto shiyehqo haphevae eno khunomu nongu zulo puthugho mlavae.

¹⁰ Nongu dolo lakhinomu timi 1000 havelu nani kughengu piqhipua ketoi AMPEU Alhou no nongu ghenguno aghushitsu ani.

¹¹ Tishiaye AMPEU Alhou qhuivu nike kutokupuilo.

¹² Tsalatsa nono agho lumono nongu gholo qhivekemi ghiyeh gholo kutshuluve eno kulakupu shikileve aye,

¹³ AMPEU nongu Lhou ye shiyeh tipaqo nongu zulo hapheve tsumo nani pi tsaqui ithivelo. Tike kumono panonguye alichhe lakhi toi eno aqoh lakhi toi eno omqalo aqheno heketoi momu onhethilo asahutoi nongu ghenguno akuighupu shive nani. Eno tishisu nongu lakhimu hipau yeghi kivi AMPEU oLhou no tsukeu lo ngomove kepu kuto shive nani.

¹⁴ “Itehiye niye thikepu do ighivae. Timi kumtsuno pututa mlono eno nongu ngulhono ithi ani. AMPEU nongu Lhou no tushoqhike toi thwokha jeli kivi pe nongu tsuvae. Piqhikeu kumtsu pano shikupuno lakhimu vezuvemoe.

¹⁵ Ikemu pano pashoqhi lakhikhi nongu lau shikupu ketoi, pano shikumsa pephe nani.

¹⁶ Tsalatsa nonguno AMPEU noLhou no puloshoqhi pelopi ahza tsukeu pemove aye eno tsalatsa nonguno kutau lhouqo qe eno mllauve aye, pa mlo kighideno nongu shikighimeve nani eno kushuwa kumolo nongu lakhimu pano nongu tsuve keu yeghi kivilo ngo mlave nani.”