JOSHUA 21 - BAIBEL (BSI)

Levi Lagha Phughiqo

¹ Levi lagha bolo sakiphemi qono achineu Eleazer nu Joshua eno Israil shiyeh bolo akichiu noqo lau wu.

² Tile Kanan yeghi Shilo lono panongu vilo pi, “AMPEU no ningu pelo ngope nike aphughiqo eno nipighi jeliqono mzakepu ghenguno hokumxa yeghiqo Muse veche ahza tsuvae.”

³ Tighenguno AMPEU zah kutsu lono Israilmino Levi lagha sala atsaneghu hami yeghi pano yeghiqha lono kophepe tsuve.

⁴ Levi lagha dolo Kohat bolo paghi aphughiqo ithuluve. Achineu Aron bolomi kughuko lono ighikemi eno aphughi chighikuthu Juda, Simon eno Benjamin phughiqo lono kijetsu.

⁵ Kohat laghalo kutamiye Efraim, Dan eno Manase kulola kudau yeghiqha lono aphughi chighi panongu tsu.

⁶ Gershon laghaqoye Isakhar, Asher, Naftali eno Manase kipelau yeghiqha qo lono aphughi chighi panongu tsu.

⁷ Merari laghaye Ruben, Gad eno Zebulun yeghiqha lono aphughi chighikini pe panongu tsu.

⁸ AMPEU no Muse lau ahza tsuke toi Israilmino aphughi hipaqo eno atsaneghu mzakepu yeghiqo pe asaqhieno kijevetsu.

^9-10 Juda eno Simon yeghiqha lono ikhiphepe Levi lagha lo Aron lono ikhiphepe Levi lagha lo Aron kughukolo Kohat polo kiqiqo tsukeu phughi hipaqoke. Panongu paghi ithulu kepushi qhibelu.

¹¹ Arba (Arba ye Anak papu) phughipe panongu tsu, itehi tipau phughi pe Hebron ipi kucheni, tiye Juda yeghiqha tolo aghasano homxape akeu yeghike.

¹² Tishimu tipau phughilo aluzaqoye eno taun qoye puzuuno Jefune nu Kaleb yeghi shivetsuke.

¹³ Hebron, khikhi sukusho phughiqo keno, tipau sukuqhano aphughi hipaqo pesu achineu Aron laghami tsuve:

^14-16 Libna Jatir, Esthemoa, Holon, Debir, Ain, Juta eno BethShemes eno tile atsuni kumza yeghiqo ae. Juda ngo Simon shiyehqo launo aphughi tokupe panongu tsu.

^17-18 Benjamin yeghiqha launo aphughi hipano bidi eno aghasa yeghiqo pe panongu tsu: Gibeon, Geba, Anathot eno Almon hipaqo.

¹⁹ Kuqhakelo aphughi chighi kuthu eno aghasa yeghiqo pe Aron polo kiqiqo achinemi tsuve.

²⁰ Levi laghalo Kohat kibolomi khami ye Efraim ghakhu lo aphughi hami akeqo kutotsu.

^21-22 Aphughi bidi pe panongu tsu: Efraim yeghi tolo sukusho phughi gholo Shekhem ye lakhi eno tipau hokumxa ghasa yeghi Gezer, Kibzaim, eno BetHoron eno tipaqo ghasaqo.

^23-24 Dan yeghiqha lono aphughi hipano bidi eno tipau ghasaqo pe panongu tsu: Elteke, Gibithon, Aijalon eno Gethrimon.

²⁵ Manase kulola yeghiqha lono aphughi gholo aghasaqo pe panongu tsu: Tanak ngo Gethrimon.

²⁶ Kohat lagha bolomino aphughi chighi eno tile aghasaqo ithulu.

²⁷ Gershon laghalo Levi lagha aqo lakhino Manase yeghi kipelau aphughi kini eno tipa ghasaqo ithulu. Bashan lo Golan, sukusho phughi shitsuke eno Beshtera.

²⁸ Isakhar yeghi qha lono aphughi bidi eno tipa ghasaqo ithulu: Kishion, Deberat,

²⁹ Jarmut eno Enganim.

^30-31 Asher yeghiqha lono aphughi eno tipa ghasaqo ithulu: Mishal, Abdon, Helkat eno Rehob.

³² Naftali yeghiqha lono panonguno aphughi kuthu eno tipa ghasaqo ithulu: Galil lo akeu Kedes, (Sukusho phughi lakhi) Hamot Dor eno Kartan.

³³ Gershon lagha bolomi qoye kuqhakelo aphughi chighi kuthu eno tipa qo ghasa ithulu.

^34-35 Merari laghalo Levi lagha kutamiye Zebulun yeghiqhalo aphughi bidi eno tipa ghasaqo ithulu: Jokneam, Karta, Dimna eno Nahalal.

^36-37 Ruben yeghiqha lono panongu no aphughi bidi eno tipa ghasaqo ithulu: Bezer, Jahaz, Kedemot eno Mefat.

^38-39 Gad shiyeh launo aphughi bidi eno tipa ghasaqo ithulu: Gilead lo Remot (sukusho phughi), Mahanaim, Heshbon eno Jezer.

⁴⁰ Tighenguno Merari lagha qoye kuqhakelo aphughi chighi kini ithulu.

^41-42 Tipa yeghi lono Israilmi no lulukeu kuqhakelo aphughi lhobidi tache eno tipa ghasaqo pe Levi laghaqo tsuve.

Israilmino Ayeghi Lukhave

⁴³ Titoi AMPEU no ayeghi kumtsu pe pano puasu zulo piqhi pua keu toi Israilmi tsuve. Panonguno ayeghi tipaqolo iloveno tsaqui ngoluve.

⁴⁴ AMPEU no ayeghiqha kumtsulo pano puasu lau piqhive ketoi panongu lokughunotsu. Panongu ghumi lakhinomu panongu shou puthugho mlave, kughengu AMPEU no Israilmi pelo pano ghumi shou tokuluu pe tsuke.

⁴⁵ AMPEU ye pano Israilmi lau ashoqhi shikeu lakhi khino shikupuke.