JOSHUA 14 - BAIBEL (BSI)

Jordan Kulolau Yeghi Kikije

¹ Tithiu Israilmi dolo Jordan kulolau Kanan yeghi kiu toi kije keno pithi puani. Achineu Eleazer, Nun nu Joshua eno Israil shiyeh lo sakiphemi kiboqo dolono kijeve.

² AMPEU no Muse lau ahza tsuke toi ayeghiqha bocho toku eno Jordan kulolau shiyeh tuxaqo yeghi asaqhino kijeve.

^3-4 Muse no Jordan kipelau tipa zuuno pesu shiyeh kini eno tuxaqo lau tsuve (Josef polo kiqi huno shiyeh kini shi kijeve Manase ngo Efraim pama) tishive kemu Muse no Levi lagha ye ayeghi kikijelo panongu tsumove. Tipa zuqhulo, panongu pelo aphughi qolo ngolupe eno lhoxu pighilu pekepu luzaqha ithulupe.

⁵ Israilmino AMPEU no ahza tsuke toi ayeghi kijelu.

Hebron pe Kaleb Tsu

⁶ Ghulo lakhi Juda shiyeh lono timi khami Gilgal lo Joshua lau ighi. Milakhi Jefune nu Kaleb Kenizimino pa vilo pi, “Kades Barnea lo AMPEU no kiu nikujo ghenguno Muse Alhou wu timi vilo pikeno noye ithi ani.

⁷ Kughono AMPEU qeu Muse no Kades Barnea lono ihape tipa yeghi puju peniye puwu keno niye ipunu mpe lhobidi shi ae. Ino kuchou tsa pesu ideighi.

⁸ Isasu wukemi ye ni timiqo shikumsave. Ikemu niye athotsa pe AMPEU iLhou gholue.

⁹ Muse no tipa tsala lono piqhike, ‘Nono khipau yeghilo nesukeno kuchouno pesu no eno otianuqo mheghi shivetsuni kughengu nono AMPEU Alhou akimtheshi papeke.’

¹⁰ Ikemu itehiye julo, AMPEU no Muse vilo pike ampe lhobidi shivae, tiye Israilmino asayeqha veche wucheke ghuloki lono eno AMPEU no piqhiveke toi ipelo ampe lhotache pungu xuaghi peke.

¹¹ Itehi, julo, niye Muse no khalau ipuwuke tsalalo toi itehi ghi mutotoi aphie. Niye aghu shilu momu kiu kiumu shilu kepushi aphie.

¹² Tishi aye itehi ni eno niwu timiqono AMPEU lau asutsa sughike tsalalo AMPEU no piqhiveke toi atoyeghiqo itsuvelo. Nino ovilo pikeuye timi subosughimi Anakim ipikeqo aliwo kuloghino bothape akeu phughilo ani AMPEU no pikeu toi AMPEU no igholo ngono ino panongu haleluve nani.”

¹³ Joshua no Jefune nu Kaleb kumghatsu eno Hebron phughipe pawu shivetsu.

¹⁴ Hebron phughiye ishi kutolo Kenizimi shiyeh lo Jefune nu Kaleb polo kughuko yeghi shi achephi, kughengu pano Israil Lhou AMPEU ghokulu shike.

¹⁵ Tipazuuye Hebron yeghi pesu Arba Phughi ipicheke. (Anakim gholo Arba no akuloghiu shi acheke.) Itehiye ayeghi tipaqhalo iqughaive ake.