JOSHUA 13 - BAIBEL (BSI)

Ayeghi Lukepushi Akeu

¹ Joshua ye ighono kichimi shive. AMPEU no pa vilo pi, “Noye ighono lhovae, ikemu ayeghiye kutomo lukepu aphie.

² Filistiya ngo Geshur yeghiqha kuchopu,

³ Avim yeghiqha lono apeu kudau ghi lukepu aphi, tiye Shihor ghoki Ijip kipelauno Ekron lughi ahuu do pe Kananmi wu kepi kihi chekeu yeghi, tile Filistiyami ayepemi pungu ache, Gaza, Ashdod, Ashkelon, Gat eno Ekron hipaqo.

⁴ Tinguno alaughi Kanan ghakhuqha aphike, tiye Amarimi lughi lo Afek kuto aphike.

⁵ Gebalai shiyeh yeghi, Libanon kuchopu lono wo kipelau Balagad kuto khikhi Hermon naghuto lono Hamat la kuto aphike.

⁶ Tiye Sidonmi yeghi kumtsu sukuqha ani, tipaqoye Libanon naghuto ngo Misrefot, Maim kuma dolo ato yeghilo kuami ke. Israilmino azuu hawoke kumtsu timi kumtsu ino hapheveni eno ovilo piketoi noye ayeghi pe Israilmi dolo kijeve tsumaye saputsae.

⁷ Itehi noye tipa yeghipe shiyeh tuxaqo panongu wu shi kijeve tsulo.”

Jordan Kipelau Yeghi Kijeve

⁸ Ruben shiyeh, Gad eno Manase shiyeh lo kutau tuxaqoye AMPEU qeu Muse no puzuuno kijevetsu, tiye Jordan kipelau yeghi.

⁹ Panongu yeghi qhaye Arnon khila cheku Aroer lono eno tipa phughi akhila mtalo akeu eno Medeba yeghiqha lono Dibon kuto.

¹⁰ Tiye Amunmi lughi kuto lo ke eno Amarimi kukau Sihon, Heshbon lo ayekipeuno aphughi khipaqo shou ayepe ache keno tipaqo kumtsu sukuqha ani.

¹¹ Tiye Gilead, Geshur ngo Maka hokumxa Hermon naghuto kumtsu, Bashan yeghi kumtsu lono Saleka kutoke.

¹² Bashan lo Og khuu Ashtarot eno Edrei lo ayeh pe akeno Refaim no haleve.

¹³ Tishinamu Israilmino Geshurmi ngo Makami haphe move, panonguye Israil lo achephi.

¹⁴ Levi lagha qoye Muse no ayeghi tsumove, tiye AMPEU no Muse Israil Lhou mllakeu saje lakhiye panonguw shive.

Ruben Tsukeu Yeghi

¹⁵ Muse no Ruben shiyeh bolomiqo ayeghi saje lakhi panongu tsu.

¹⁶ Pano yeghi bochoye Arnon khila cheku Aroer kuto eno tipau phughi khila mta eno Medaba hokumxa lo atoqa qoke.

¹⁷ Tiye Heshbon eno atoqa lo aphughiqo hipaqo kumtsu sukuqha, Dibon, Bamot Bal, Bet Balmeon,

¹⁸ Jahaz, Kedemot, Mefat.

¹⁹ Kiriathaim, Sibma, Zeret, Sahar khilalo atolo akeu phuqo,

²⁰ Bethpeor, Pisga naghuto qhe qolo kuaqo eno Bet Jeshimot.

²¹ Atoqa phughiqo kumtsu sukuqha eno Amarimi kukau Sihon no Heshbon lo ayeh pe akeu phughiqo Muse no pa shou toluve eno Midiami yehpemi qo Evi, Rekem, Zur, Hur ngo Reba qoghi toluve. Hipaqo yeghi kumtsu akukau Sihon qholono ayeh pe ache.

²² Israilmino ghiqhive kemiqo dolo anguye kujumi Beor nu Balam ae.

²³ Jordan ye Ruben shiyeh wu kulolau lughi. Aphughi hipaqo pe Ruben shiyeh lo pano kiboqo wu shivetsu.

Gad Tsukeu Yeghi

²⁴ Muse no ayeghi sajepe Gad shiyeh kibolomi wu shive tsu.

²⁵ Panongu yeghi bochoye Jazer eno Gilead lo aphughi kumtsu eno Aroer kutolo Amun yeghi tuxa Raba kipelau yeghi kuto.

²⁶ Panongu yeghiye Heshbon eno Ramat, Mizpa eno Betonim kuto Mahanaim lono Lodebar lughi kuto.

²⁷ Jordan khilalo Betharam, Bethnimra, Sukot, Safon eno akukau Heshbon yeh kipeqha kuchopu sukuqha. Panongu wu kulolau lughiye Jordan lono ahuu Galil zughi kuto.

²⁸ Tipaqo phughi eno taun qo pe Gad shiyeh kiboqo wu shivetsu.

Kipelau Manase Tsukeu Yeghi

²⁹ Muse no ayeghi saje lakhi pe Manase shiyeh tuxau shivetsu.

³⁰ Pano yeghi bochoye Mahanaim kuto eno Bashan qha kumtsu, Og kukau yeh kipeqha kumtsu Bashan kukau eno Bashan qhalo Jair phu lhotsughoqo.

³¹ Gilead tuxa, Ashtarot ngo Edrei, Bashan lo Og kukau yehpeqhalo aphughiqo tipaqo kumtsu pe Manase nu Makhir polo kiqiqo wu shivetsu.

³² Titoi Muse no kughono Muab yeghiqhalo akeno Jerikho eno Jordan kipelau yeghi kijevetsu.

³³ Ikemu Muse no Levi laghaqo ye ayeghi tsumo. Pano panongu vilo pikeuye panongu ye Israil Lhou AMPEU lau agho tsukeulo saje lakhiye panongu wuke pive.