JOSHUA 10 - BAIBEL (BSI)

Amarimiye Tomove

¹ Jerusalem lo akukau Adonizedek no Joshua no Ai phughi leluveno ti shipsavetsu eno tile akukau shou mlakeu chiluve. Gibeon timiqo ghi Israilmi sasu visho shiveno pano gholo xu auvekeu chiluve.

² Jerusalem timiqono ighono thughuive kughengu Gibeon phughiye kukami phughi dolo kije lakhi kehu. Tipa phughi ye Ai phughi nguno akijeu eno timiqoye aghukivimi ke.

³ Tighengu no akukau Adonizedek no hitoi yesu yepe Hebron lo akukau Hoham, Jarmut lo akukau Piram, Lakis lo akukau Jafia eno Eglon lo akukau Dibir noqo lau puwu.

⁴ “Ipelo Gibeon leve penike ikuphulo kughengu tile timiqono Joshua eno Israilmi sasu visho shivae.”

⁵ Ti Amarimi yeghiqha kukami pungu Jerusalem kukau, Hebron, Jarmut, Lakis, eno Eglon lo kukami qono kuqhano Gibeon le.

⁶ Gibeon lomino Gilgal pusholo Joshua lau asutsa puwu. “Noye ni kughucho kevilo. Mtazu ighieno ni kuphulo. Ni xalulo. Amarimi yeghiqhalo kukami kumtsu kuqhano ile auvae.”

⁷ Tileno Joshua eno pawu ghushimi kumtsu akiviuqo kuqhano Gilgal lono ala cheve.

⁸ AMPEU no Joshua vilo pi, “Panongu msakevilo. Ino opelo luvea peke. Milakhimu ozulo puthugho lumo nani.”

⁹ Joshua ngo pawu ghushimi qoye puthotsu ala chesu Gilgal lono Gibeon lo ighi eno zuleno Amarimi le.

¹⁰ AMPEU no Amarimi pelo Israilmi ghushimi zulo amlo ithuvepe. Israilmino Gibeon lo ghiqhi eno hasusu Bet Horan naghuto la kuto iqive eno Azeka ngo Makeda apeu kuto hauve.

¹¹ Amarimi no Israilmi zulo posu naghuto lalo pochekelo AMPEU no murasu kuloghi Azeka laghi kutolo ghuqhipuku. Israilmino heqhivetsu keu nguno akichiu no murasuno veqhive.

¹² AMPEU no Amarimi shou tokulu pe Israilmi tsuveke tsalalo Joshua no AMPEU putsa. Israilmi nhekithe lono ishi pi,” Tsukinhe noye Gibeon shou ngo auvelo, aqhi, noye Aijalon khila shou ngovelo.”

¹³ Tsukinhe no ngo auve eno pano shiyeh no aghumi levemoke kutolo ithamove. Tipatsa Jashar kakulo yepuani. Tsukinhe no atsutsu mtalo ngoauve eno ilovemono tsala kupuju lakhi ngove.

¹⁴ AMPEU no timi lhoxu gho lukeu puzuu pina momu ishikutolo pinamu tsala lakhimu hitoi keu shimphie. AMPEU no Israil kudau suno aghu shie!

¹⁵ Tithiu Joshua ngo paw ghushimino Gilgal ghazulo idewove.

Amarimi Kukami Pungu Leve

¹⁶ Amarimi kukami pano punguye pojosu Makeda tukilo itshua.

¹⁷ Khualano panongu ithulu eno khile itshua keno Joshua vilo pive.

¹⁸ Pano pi, “Atukilo ikuloa zulo atu kije je hami kuluqhilo tile aghukhemi khami qhilo,

¹⁹ ikemu nonguye tile ngo kevilo aghumi thiuno jughi panongu halo, panongu pelo aphughilo ilolupe kevilo, AMPEU no panongu shou tokuluu pe nongu tsuvae.”

²⁰ Joshua ngo Israilmino panongu ghiqhive, ikemu khamiye aphughi liwo alou ilove no xuluve.

²¹ Joshua wu timi qoye kumtsu Makeda pusholo ideighive. Tipa yeghilo khunomu Israilmi shou atsakumo pinike shove.

²² Tithiu Joshua no pi, “Atukilo ikulola khaqhilo eno tile kukami punguqo hu ilau saipeghilo.”

²³ Atukihu khaqhi, eno Jerusalem, Hebron, Jarmut, Lakis, eno Eglon lo kukamiqo hu khalau saipeghi no

²⁴ Joshua lau sawu. Joshua no pa qholo kijemi kukutsu eno panongu vilo kukami kuobo shou nepukupe ngolo pive. Panonguno titoi shi.

²⁵ Tithiu Joshua no kijemi vilo pi, “Msakevilo momu amlo tulalo kevilo ikemu amlo kuloghilo kughengu AMPEU no nongu ghumi kumtsu shou titoi shiniye anie.”

²⁶ Tithiu Joshua no akukau pano pungu kumo avela kutolo tishi pua.

²⁷ Tsukinhe iloveke thiu Joshua no panongu kumo kuqhope panongu puzuu itshu akeu tukilo vesuvepe. Atu kijeje pe ikulolalo mikeve eno ishi kutolo tishi acheni.

Amarimi Yeghi alau Leve

²⁸ Joshua no tipa tsala lono Makeda leveno akukau kughaluve. Aphughi tile kuami kumtsu pithive, khumu puxumo. Pano Jerikho kukau lau shiketoi Makeda kukau shou shi.

²⁹ Tithiu Joshua no pawu ghushimi sasu Makeda lono wuveno Libna leve.

³⁰ AMPEU no tipa phughi eno akukau pe Israilmi tsuve. Panonguno lakhimu ghumono kumtsu pithive, panonguno Jerikho akukau laushike toi tipau kukau lau shive.

³¹ Tithiu Joshua ngo pawu ghushimino Libna lono Lakis lo wuno homxa luveno leve.

³² AMPEU no atsala akiniu lo Lakis shou tokuluu shivepe eno Libna lo toi leluve, panongu no timi lakhimu phemove ikemu aphughi tile akemi kumtsu pithive.

³³ Gezer lo akukau Horam no Lakis kuphu ighi ikemu Joshua no pa shou toluve, pa eno pawu ghushimi kumtsu pithive.

³⁴ Tipashelo Joshua eno pawu ghushimino Lakis lono Eglon lo wu eno tipau le.

³⁵ Tipa tsala lono leve eno Lakis lo toi kumtsu pithive.

³⁶ Tithiu Joshua ngo pawu ghushimi Eglon lono Hebron tolo ighieno leve.

³⁷ Panonguno akukau pithive eno tipau hokumxa phu qolo timi kumtsu kuxu pukave tsu. Joshua no Eglon yeghi puhavetsuke toi tipa phughi puhavetsu. Tile timi khumu puxumove.

³⁸ Tithiu Joshua ngo pawu ghushimino idesu Debir lo ighi eno ti leve.

³⁹ Pano aphughi gholono akukau eno pawu hokumxa phuqo luve. Panonguno timi kumtsu pithive. Joshua no Hebron ngo Libna qo shou toi Debir eno akukau shou ghi tishive.

⁴⁰ Joshua no ayeghiqha kuchopu luve. Pano ato phughilo kukamiqo shou toluve, kipelau aqhelo akemiqo yeghilo, kulolau naghuto pukhulo akemiqo luve. Pano khumu phemono kumtsu pithive. Tiye AMPEU Israil Lhou no ahza tsu keuke.

⁴¹ Joshua yeghiqhaye apeu Kades Barnea lono Gaza zumku Goshen bocho sukuqha ghi shive.

⁴² Joshua no aghu lau khavi lono ayeghi tipaqo kuchopu luve kughengu AMPEU Israil Lhou no Israilmi ghenguno aghu shitsua.

⁴³ Tipathiu Joshua ngo pawu ghushimi no Gilgal ghazulo ide ighive.