JONAH 3 - BAIBEL (BSI)

Jona no AMPEU gholu

¹ Itaghi AMPEU no Jona putsa kithe.

² Pano pi, “Nineve lo wulo, ti aphughi kuloghilo wulo eno timiqo vilo ino atsape otsu puakeu pesu asheshulo.”

³ Ike Jona no AMPEU gholuve eno Nineve lo wu. Nineveye aphughi kuloghi kehu tipau kathawuni keloye ghulo kuthu lacheke.

⁴ Jona no aphughi kathasu wuno ghulo lakhi lache thiu pano ishi asheshu, “Atsala lhobidi dolono Nineve ye kutsaleveni cheni!”

⁵ Nineve lo akemiqono Alhou tsape puluveno kumtsuno kumvu nikeu asheshuve; eno akijeu lono akitilau kutolo panoqo kuxu xachile ighivekeu kiqishi yeqhiye phi uke.

⁶ Kughou Nineve lo akukauno tipa sutsa chilu keno, akukalakhu lono ithuve pa kukaphi lhaqhive yeqhiye phi upuzu ayevulo iqaluve.

⁷ Pano Nineve lo akemiqo lau ishi asheshu wupe, “Hiye akukau ngo paw kijemi launo tsukeu zah ke. Khunomu kiumu chushomla, timi ngo pichepighi kumtsu chushopemo nike lakha ani.

⁸ Timi ngo pichepighi kumtsu yeqhiye phi umasake. Timi kumtsuno Alhou vilo amlo tsuqhiyi inikhu masa eno pawu ghushoghili lhoksa eno akumla lhoksa phevemasa.

⁹ Ishiake, Alhou no pano kumsupu akeu kilive luvi; paye aloghu ide akeu tave luvi eno ninguye thimove luvike!”

¹⁰ Panonguno kiu shikeno Alhou no ithulua; panoqono ghushoghili lhoksa shichekeu qhivekeu pano ithuluve. Tighenguno pano kumsupu akeu kiliveno panongu ghimeqhini pipuakeu shimove.