JONAH 1 - BAIBEL (BSI)

Jona no AMPEU hebide

¹ Ghulo lakhi AMPEU no Amitayi nu Jona putsa.

² Pano ishi pi, “Noye Nineve lo wulo, ti aphughi akijeulo wuno ighamuku piwulo; kughengu panoqo lhoksa kumlaye izulo auveake.”

³ Ikemu Jona ye AMPEU launo pove nike ghenguno tipau ghungu lo wuveniye shive. Pano Jopa lo iqighi kelo zukilu lakhi Tarshis lo wucheghi, Ike pa kupume tsuveno Tarshis kudau wuveniye tile sachekemi gholono zukilulo ikuno AMPEU zulono poveniye shike.

⁴ Ikemu AMPEU no amlhu kuloghi lakhi azughilo mulhu puwu, ike azughilo pasapagha ihulokeu shive eno zukilu ipopinyive keputoi akumsapu shive.

⁵ Zukilu sakichemiqoye kichimamave eno pututa muzulo pututa lhou vilo ighamuku wuve. Tipathiu zukilu kumthu nike ghenguno zukilulo xapuchekeu nhemgha pesu azughilo vesu. Tishiakelo Jona ye zukilu jolha aqhou iqive no zuchei aghive.

⁶ Tileno keptein no pa ithuluno pa kuda ghi pi, “Noye kiu shiepi zuani kya? Ithulo eno olhou pelo kuphu penike khulo. Ishiake paye nighenguno amlo sa puzu nikuxu puhatsumo luvike.”

⁷ Zukilu sakichemino lakhino lakhi vilo ishi pikilea, “Ningu asaqhiju puzu khuuno akumsapu hipau ningu pelo sholu anipe keno pa ngukubeni.” Panonguno tishiju kelo Jona shou asaqhi belu.

⁸ Ikehu panonguno pa vilo pi, “Nivilo pijulo, khuuno kiu shive puzu alhoksa hipau nishou ighi anipe kya? Noye kiu shichekemi kya? Noye khuno ghakhu lono ighi kya? Noye khuno shiayeh kya?”

⁹ Jona no khochile, “Niye Ibrimi lakhike. Niye AMPEU, kungugha Lhou ayeghi ngo azughi lhokeu mlla chekemike.”

¹⁰ Jona no panoqo vilo paye AMPEU launo posu wuve chekeu ghili pi. Zukilu sakichemiye kichimamyive eno pa vilo pi, “Noye hiye kiu shivetsu ani kya?”

¹¹ Pasapaghano ado shemono alau alau shikitheuve, ike zukilu sakichemino pa vilo iniju, “Pasapagha tavepe nike ghenguno ninguye okughape kiu shivelo pikya?”

¹² Jona no pi, “Ikughape azughilo vesuvelo eno tiye iquneive nani. Ino ithi anike, ikipimi ghenguno nongu shou pasapagha lhoksa hipau ighi ani.”

¹³ Tishianamu, zukilu sakichemino axusa kudau zukilu sawuniye pukaputsa, pano kuka kumtsu pephe puzu azu hekide che. Ikemu pasapaghano akusa akusau shiveno panonguye kiumu shimlave.

¹⁴ Tighenguno panonguno AMPEU vilo ighamuku pi, “O AMPEU, nino khuini anike timi hipau kuxu puhavetsu keu ghenguno ni-pithi kevilo! O AMPEU, hipau kumtsu opulou lono shianike.”

¹⁵ Tithiu panonguno Jona khapeqhe puzu azughilo pa vesuve eno paikhavino azughiye iquneive.

¹⁶ Hipauno zukilu sakichemi pelo shishe AMPEU musavepeno aghashipe akumllagho pa tsuno pa qenikeu shi tushoqhi.

¹⁷ AMPEU no ahza tsukeu kiqi lono akha kije lakhino Jona munoluve eno paye akha polo atsala kuthu putho pucho ngove.