John 5 - BAIBEL (BSI)

Ayizukucholo Shipivi

¹ Hipathiu, Judami chineyehlo aghulhu shichekeu lakhi akehu Jisu ye Jerusalem lo iqho.

² Jerusalem lo, Bheri Khagho phivilo khepuchokeu yizu lakhi ae. Ibrimi tsauno tipau pesu Bethsatha ipiche eno tipaulo apusho pungu ajoshi ae.

³ Apusho tipaqolo kusukinimi kutomo zuae, anhethi kighichemi, apukhu kinitavekemi aphi-au kithimi ishi ae. (Panonguye azu kughutha kheae;

⁴ kughengu khani khani lono Ampeu wu kungumino ti ayizukucholo ilono azu xukutho che. Azu xukuthove kethiu kusukinimi khuu paghino tile ilolu nikeno pano kiu kiu kusu aghinamu viluveche.)

⁵ Tilehi ampe shighi tache kutolo suachekemi lakhi ae.

⁶ Timi tipauno tile ihozu akeu Jisu no ithulu eno timi huye ado kushuwa tilehi achekeu ithive, ike Jisu no pa vilo pi,” Noye vivenishi ani kesha?”

⁷ Akusuuno pa khochile, “Akijeu kughou azu xukutho ipeghi nikeno isawo azulo sutsu nikemi khumu kuhae; eno ino iloniye chephi lono kutamino izuuno ilove chenie.”

⁸ Jisu no pa vilo pi, “Ithulo, eno ozua ikhi pesu alachewulo.”

⁹ Paikhavino timi huye vithaive eno pano pa zua ikhipe chesu wuve. Hipau shikeu ye Sabat tsala lono ke.

¹⁰ Ikehu Judamino timi viluvekeu vilo pi, “Ishiye Sabat tsala ke ghenguno noye ozua pesu wunikeu ni yezahlo kuhae.”

¹¹ Pano khochile, “Timi ishipivivekeu huno ivilo ‘Ozua ikhi pesu chevelo’ ipi vae.”

¹² Panonguno pa iniju, “Ovilo ozua ikhi pesu chevelo pi pikeu timi huye khuu kya?”

¹³ Ikemu timi viluvekeu huye khuuno pa shipivive keno muthae, kughengu tipa-alo timi kumzapu kumqoluve kehu Jisu ye cheveke.

¹⁴ Athiuno Jisu no achinekilo timi hu ithulu eno pa vilo pi, “Julo, noye vithayivae! Hinguno hilau oshou kiuwala alhoksau ikughi penishi moaye axine shi kithe kevelo!”

¹⁵ Tileno timi huno wupuzu Judami vilo Jisu no pa shipivitsu kepi pi.

¹⁶ Hipau jeku lono Judamino Jisu thoghakeu huthuve, kughengu pano Sabat tsala lono shipivitsu kehu.

¹⁷ Ike Jisu no Judamiqo khochile, “Ipuh ye itehi kutolo mla ani eno niye mla amasae.”

¹⁸ Jisu no hipau pikeu lono Judamino puzuu nguno alau shi pa pithive nikeu shive, kughengu pano Sabat yezah hexakeu likhi kumono Alhou pesu papuh kepi pie eno pano tipau pikeu huye paye Alhou sasu aqhemi shiakeu ke.

Anu Kuka

¹⁹ Jisu no panoqo khochile: “Kuchouno ino nongu vilo pini, Anu ye pa kutoshiye kiumu shimlae,papuhno shiaghikeu pano kiu ithulu nikeno ti likhi pano shi cheni. Apuh no kiukiu shini keno Anu ghi tishi cheni.

²⁰ Kughengu Apuh no Anu qhuiyivulai ke eno pa ampino shiakeu kumtsu pa piye cheni eno hinguno akumlapu kije akeqo pe pa piye nani, tishianguno nonguno akichiqhi nani.

²¹ Kughengu Apuh no kithimi xaputhupe puxu ketoi Anu ghi pano khunoqo puxu nishi keno tipaqo puxutsu nani.

²² Apuh ye khuu shoumu kughakutha bechemoe, ikemu kughakutha kumtsu pesu Anu tsuvae,

²³ tiye panonguno Apu gihu ketoi kumtsuno Anu gihupeniyeke. Khunono Anu gihumoni keno pa puwu puakeu apuh hu gihumovae.

²⁴ “Kuchouno ino nongu vilo pini, khunono itsa chilu puzu ipuwupuakeu pulu nikeno lhokta kuxu ani. Pa shou kughakutha bemo nani, ikemu paye akithi hechesu akuxulo wuluvae.

²⁵ Kuchouno ino nongu vilo pini, aghuloki hu cheni, kithimino Alhou Nu sutsa chilu nikeu ghuloki hu cheni, eno aghuloki hu ighiva, eno pa sutsa chilukemi qoye xulu nani.

²⁶ Apuh ampino akuxupu laghike, ike titoi pano pa Nu pesu akuxupu laghi shilupeke.

²⁷ Tinguno alau ghi pano Anu pelo kughakutha peithalupe nike akuka tsuvae, kughengu paye Timi Nu ke.

²⁸ Hipau pikeulo akichiqhi kevilo; kughengu akumokilo kithimi kumtsuno pa sutsa chilu nikeu ghuloki cheni,

²⁹ tipaqono panoqo kumoki lono ipeghi nani: akivi mlapuakemiqoye akuxupulo xuputhuve nani, eno alhoksa mlapuakemiqoye kughakutha ghenguno xuputhu nani.

Jisu wu Thopimi

³⁰ “Ika-agho loye niye kiumu shimla; Apuh no ivilo pikeulo likhino ino kughathatsu cheni, ikehu ino kughatha keuye achipi, kughengu niye ighoapulou kumono ipuwupuakeu gho apulou shiniyeke.

³¹ Tsala ino ilikhi ishepe shiaye ishepeye kuchou kepi ikhilutsu kevilo.

³² Ikemu ishepe shiakemi kutami ani, eno pano kiu ishepe shikeno tiye kuchou kepi ino ithi ani.

³³ Nonguno Johan lau aghinimi puwu, eno pano kuchou ghili pesu ashepe shi.

³⁴ Timino thopi tsukeu shou niye pukhube amoe, ikemu ino hipau piakeuye nongu xalupeniye ke.

³⁵ Johan ye akulu lakhi toi vuqayi iquke eno nonguno hitohi ghenguye pa kuvulo alokivi shinishi ache.

³⁶ Ikemu Johan no thopi tsukeu nguno akiqheu ilau thopi shitsupe nikeu anie, iPuh no ipelo shikupupeniye akumla kiu itsukeno, ti khipau kumla ino shiani keno, tipaqono Apuh no ipuwu kepi thopi shi ani.

³⁷ Apu ipuwuakeu ghi thopi shitsu ani. Nonguye khilemu pa sutsa chimla aphi momu pa juakoghe ithumla aphi.

³⁸ Nonguno pa tsa nongu lolo qhimoe, kughengu pano milakhi khuu puwu keno tipau nonguno pulumoe.

³⁹ Nonguno kuchoyesu phukide kudaju cheni, kughengu nonguno tipaqo lono lhokta kuxu phulu nani kepi kumsu cheni. Eno tipaqono thopi shi ani,

⁴⁰ ikeghi nonguye akuxupu alunike ilau ighinishi chemoe.

⁴¹ “Niye timi launo sheqhekeu lunishiyeke kumoe,

⁴² ikemu ino nongu ithianike, nongu lolo Alhou kimiyekeu kuhae.

⁴³ Niye iPuh je lono ighi ani, ikemu nonguno niikhilumoe. Kutamino pututa alikhi ampi ka-agha lono ighi aye nonguno ikhilu cheni.

⁴⁴ Nonguno lakhino lakhi sheqheni shi, ikemu Alhou ye pa likhino Alhou ke pa launo sheqhekeu nonguno phuju nishimoke, nonguye kishi puzu pululuni kya?

⁴⁵ Apu zulo niye nongu nguku nani kepi kumsu kevilo. Nongu ngukuni keuye nonguno pa shou lajupu bechekeu Muse ke.

⁴⁶ Nonguno Muse pulu keaye nonguye ipulu nicheke, kughengu pano ighili yehke.

⁴⁷ Ikemu pano kiu yehkeno nonguno pulumla aye nonguye kishieno itsa pulutsuni kya?”