John 2 - BAIBEL (BSI)

Kana Phulo Kulakupu

¹ Atsala akuthuni Galil yeghilo Kana ipikeu phulo kulakupu lakhi shia eno Jisu paza ghi tile ae,

² Jisu ngo pa khopemi ghi kulakupulo ku-sue.

³ Kughou atsayiji peitha zulave keno Jisu pa zano pa vilo pi, “Panonguye atsayiji kuhavae.”

⁴ Tile Jisu no li khochile. “Totimi-o noye ivilo kiu pi kepu ani kya? Ido tomphie.”

⁵ Tishive puzu pa zano lokijimi vilo pi, “Pano nongu vilo kiu shilo pini keno ti shilo.”

⁶ Judami chineyehlo qhukimthe chekeu ghenguno azutughuko tsugho tilehi ghope pua, atughuko lakhi khilo azu ahughi shighiano chhilukepuke.

⁷ Jisu no lokijimi vilo pi, “Atughuko hipaqolo azu puwo chhitoi lesulo.” Ike panonguno tipaqolo chhitoi lesu.

⁸ Jisu no panoqo vilo pi, “Itehiye tipau lono kitila shophe puzu aghulhu peithatsuakeu lau pesu wulo.” Ikelo panonguno pa lau tipau pesu wu.

⁹ Aghulhu peitha tsuakeuno azuno atsayiji ilhovekeu michejuno tiye khilano ighikeno paye mthae, lokijimi khunoqono azu shopesu wukeno tipaqoye ithiae, ike aghulhu peithatsu akeu huno kulapuu ku puzu

¹⁰ pa vilo pi: “Timi kumtsuno atsayiji akiviu paghi peitha cheni eno timiqono khenguyi shove kethiuno shokusa tsayiji peitha cheni. Ikemu noye itehi kutolo atsayiji akiviu puaphi.”

¹¹ Jisu no amchipu kumla shikeu gholo hino atughushi Galil yeghi lo Kana phu lono shike, eno pa kimthe jukuvu pephepiyeno pa khopemino pa puluve.

¹² Hipa thiu Jisu no pa za ngo pa thikuzumi eno pa khopemi sasu Kapernaum lo iqive, eno tilau ghulo kinia-kuthua ngove.

Jisu Achinekilo Wukeu

¹³ Judamino Hechekulu Ghulhu shichekeu ghuloki kupunuve kehu Jisu no Jerusalem lo iqho.

¹⁴ Tile achinekilo amshi jekemi, bheri jekemi, kobutur jekemi eno pisakilitsu akemino kibepu-alo ngo aghikeu Jisu no ithulu.

¹⁵ Ike ghaqhikepu kichhe-kighi lakhi pesu Jisu no achineki lono tipaqo kumtsu haphe, eno tipaqo gholono bheri ngo amshi ngo ishi haphe, eno pisa kilitsu akemiqo pisa muno pano kuzalevetsu eno panongu kibepu-a tukulovetsu.

¹⁶ Eno kobutur je akemi vilo pano pi, “Hileno tipaqo suwuvelo, iPuh ki pesu nonguye alhikishiki shitsu kevilo!”

¹⁷ Kuchoyesulo ishi pipuakeu pa khopemino kumsuchilelu: “O Alhou, ino ochineki ghenguno alokumsushi akeu huno ami toi ipitiqhike.”

¹⁸ Ikelo Judamino pa ghechileghi iniju, “Noye amchipu kiu ni piyelukepu ani keno hikithipu shi ani kya?”

¹⁹ Jisu no khochile: “Achineki hipau xavelo eno ghulo kuthu dolono ino shipuku kitheve nike.”

²⁰ Tileno Judamino ishipi, “Achineki hipau shikelo ampe lhobidi tsugho luke. Noye ghulo kuthu dolono hipau shipuku kitheluni kesha?”

²¹ Ikemu Jisu no achineki piakeu huye pa phimpi piake.

²² Tighenguno kughou akithi lono pa xuputhuve keno paye hipau piakepi pa khopemi no kumsuchilelu, eno panonguye kuchoyesu eno Jisu no pipuakeu tsa pululuve.

Jisu ye Timi kumtsu Ithi ani

²³ Hechekulu Ghulhu lo Jisu no Jerusalem lo akelo, timi kutomono pano amchipu kumla shikeu ithulu puzu panonguye pa shou pulubeluve.

²⁴ Ikemu Jisu ye timi kumtsu akivishi ithi ake ghenguno panoqo shou pulukibe kuhae.

²⁵ Khunomu timi vehu pesu pa vilo piakepu avehupu kuhae, kughengu timi lolo kiu anikeno pano akivishi ithiae.