John 19 - BAIBEL (BSI)

¹ Tithiu Pilat no Jisu sawuve eno pa heqhipe.

² Ghushimino asahubo pesu akutsukuqho ghokunano tipau pe pa kutsu qhopipe eno lahuphi lakhi pesu pa pu-u,

³ eno pa lau ighino pi, “Judami shou Akukau, axupushu peniu!” eno pa phivilo ighino panonguno pa gilo ghatsu.

⁴ Pilat no itaghi khalau ideipe timiqo vilo pi, “Ino hila khalau pa sasu nongu lau ipeghinike julo, tishianguno niye pa pithikepu akiqi kiumu phumlakeu nongu pelo ithipenike.”

⁵ Ikehu Jisu ye asahu kutsukuqho qhopu eno hughaikeu phi upuzu khalau ipeghi. Pilat no panoqo vilo pi, “Julo! Timi hu hike!”

⁶ Kughou achinetomi ngo aghukhemi qono pa ithulu keno panonguno ighamuku pi! “Kros lo pa yedavelo! Kros lo pa yedavelo!” Pilat no panoqo vilo pi, “Niye pa pithivekepu akiqi lakhimu phumla. Nongu kutoshino pa sawuno kros lo pa yedavelo!”

⁷ Judami qono pa khochile, “Paye thimasa kepu niyezah lakhi ani, kughengu pano pa likhi pa pesu Alhou Nu kepi chenike.”

⁸ Panonguno pikeu tsa hipaqo Pilat no chilukelo paye shishe msave.

⁹ Pano akighikilo ideilo eno Jisu vilo pi, “Noye khilano ighi kya?” Ikemu Jisu no kiumu khochilemo.

¹⁰ Tighenguno Pilat no pa vilo pi, “Noye iputsamoni kesha? Niye okuqho pheveni kepu kuka eno oyedave penikepu kuka akeu noye mtha kesha?”

¹¹ Jisu no pa khochile, “Alhou no otsumoke aye noye ishou akuka kiumu kuhanicheke. Tighenguno khuuno ikughasawo olau tsu keno pano axine lhoksau shi kuquvae.”

¹² Pilat no hipatsa chilukelo pa kuqho phevenike pukaputsa. Ikemu Judamino igha kithe ghi pi, “Nono timi hipau kuqhopheve aye Rom yehkipeu Kaisar shou kumoe! Timi khuno pa likhi pa pesu Akukau ipini keno paye Rom yehkipeu Kaisar ghumi ke!”

¹³ Pilat no atsa hipaqo chilu kelo, pano Jisu sasu khalau ipeghi eno kughakutha lakhu “Atuqhu khache” ipichekeulo iqae; Ibrimi tsalo tipa-a pesu “Gabatha” ipi cheni.

¹⁴ Ike tipaniye Hechekulu Ghulhu ghenguno kutokupuyipe qhinikeu tsala shia, eno puchomta shive. Pilat no Judamiqo vilo pi, “Nongu kukau julo!”

¹⁵ Panonguno igha kithe pi, “Pa pithivelo! Kros lo pa yedavelo!” Pilat no panongu vilo iniju, “Niye nongu kukau yedavelo pikesha?” Achinetomino khochile, “Ningu kukauye Kaisar likhi ke!”

¹⁶ Tileno Pilat no Jisu ye kros lo yedave penike panongu ulo phesuvetsu. Tighenguno panonguno Jisu sawuve,

Jisu kros lo Yedave

¹⁷ eno paye khalau ipeveno pawu kros xapusu “Aboghe” ipichekeu-alo wuve. Ibrimi tsa loye tiye “Golgotha” ipi cheni.

¹⁸ Tilehino panonguno kros lo pa yedave, eno pa gholo kutami kini, lakhi khino hula-hila shipuzu Jisu no amtalo shino yedape qhive.

¹⁹ Pilat no piputokeu kaku lakhi yepesu kros shou qhi. Ishi yepe pua, “Nazaret no ghami Jisu, Judami shou Akukau.”

²⁰ Judami kutomono hipau philu, kughengu khipa-alo Jisu kros lo yeda puakeno tiye aphughi lono aghachelo kumoke. Piputokeu kaku huye Ibrimi tsau, Rommi tsau eno Grikmi tsauno yepuae.

²¹ Judami achinetomino Pilat vilo pi, “‘Judami shou Akukau’ ipi yekepu kumoe, ikemu ‘Timi hipauno, niye Judami shou Akukau ke, ipi picheni,’ ipi yekepue.”

²² Pilat no khochile, “Ino kiu yeve akeno yevae.”

²³ Ghushimi qono kros lo Jisu yedave kethiu, panonguye pa phimini luve eno saje bidi shi kije, saje lakhino ghushimi lakhi ghenguno; panonguno pa phikuzu ghi luve. Ikemu tipau huye kunguuno aqhou kutolo ala lakhi likhino ghokime keu phikuzu ke.

²⁴ Ike panonguno pi, “Ningu hipau suxukije moni, ikemu tiye khu-wu shikepu kela asaqhinie.” Hiye kuchoyesu shikupuni kehuke: “Panonguno panoqo dolono iphimini kijeluve, Iphikuzu ghenguno panonguno asaqhike.” Ike ghushimino tipaqo shike.

²⁵ Ikemu Jisu kros phivilo paza, paza tsunipu, Kleopa nipu Maria, Magdala noghami Maria ishi puthugho ae.

²⁶ Jisu no paza ngo pano kimiyechekeu akhopeu tilehi puthugho akeu ithulu puzu pano paza vilo pi, “Totimio, hino onuke!”

²⁷ Tishieno pano akhopeu vilo pi, “Hino ozake!” Ike tipamtsano akhopeu huno liye pano kilo auve peniye sawuve.

Jisu Kithi

²⁸ Thwokha shitavekeu Jisu no ithive, eno kuchoyesu shikupuni kehu pano ishipi, “Niye tughuthi ani.”

²⁹ Tilehi akiqhi-ji abohu lakhi chhitoi ake, panonguno aghushi lakhi pesu akiqhi-jilo putsuno ailo sulokalo beno pa kichilo ditsu.

³⁰ Jisu no akiqhi-ji muqaluve puzu ishipi, “Hiye shikupuvae!” Eno pa kutsu ihoiqive puzu thive.

Jisu Jibo Qhuxutsu

³¹ Tipaniye Hechekulu Ghulhu ghenguno kishekulushi kutope qhinikeu tsalake, eno Sabat tsalalo akithikumo kros lo qhipe puamo kepushi Judamino Pilat vilo kros lo yedapuakemi pukhu hechevetsuno kros lono ikhiqhisuwuve nikeu qhuiyiniju, kughengu ti wochekeu Sabat tsalaye ighono akhotou shi ake.

³² Ikehu ghushimino ighino Jisu gholo timi kini yedakeu pama pukhu hechhevetsu;

³³ ikemu panonguno Jisu lau ighi kelo paye thive aghikeu ithuluno pa pukhu hechhe tsumove.

³⁴ Ikelauye ghushimi gholo lakhino angu pesu Jisu jibolo qhusutsu kemtsa ahji ngo azu qoipeghi.

³⁵ Khuno ti ithulu keno pano ashepe hipau tsu ani, eno pa shepeye kuchou, eno paye kuchou tsa picheni kepi pano ithi ani, tishianguno nongu ghi pulu peniyeke.

³⁶ Panonguno hitoi shikeuye kuchoyesulo ishi yepuakeu shikupuni keghenguno: “Pasaghi lakhimu hephotsumo nani.”

³⁷ Itaghi kuchoyesu lakhilo pipuakeuno, “Panonguno timi khuu qhukeno panoqono timi tipau ju nani.”

Jisu Qhove

³⁸ Tipathiu Arimathia noghami Josef no Pilat vilo Jisu kumo pewuvenike qhuiniju, paye Judami msa keghenguno kusuuno Jisu khopemi shiche. Ike Pilat no pa vilo pewulu nani pivekehu pano wuno Jisu kumo pewuve.

³⁹ Puzuu putho lono Jisu lau ighikeu Nikodema ghi tsungquyikeu-ta ngo musughutha kitekungokeu ahu-kimighi lhopungua toike pesu Josef gholo ighi.

⁴⁰ Pamano Jisu kumo pewuve eno Judamino akumo qhochekeuyeh lono aphi kumtshalo vekutsungu kepu supuzu Jisu kumo kuzuvetsu.

⁴¹ Khilehi Jisu kros lo yedakeno tipa-alo aghutu lakhi ake, eno aghutu tipaulo timi lakhimu qhomphi keu kumo-ki akithe lakhi ae.

⁴² Judami wu Sabat ghenguno kishekulu shipe qhikeu tsala kehu, eno akumoki huye akupunulo aghi kehu panonguno tilehi Jisu kumo pewo alou qhive.