John 18 - BAIBEL (BSI)

Jisu Kughakulu

¹ Jisu no atsa hipaqo pivekethiu paye pa khopemi sasu cheve eno Kidron ghokiti kathasu wuve. Tilehi aghutu lakhi ake Jisu no pa khopemi sasu tilau ilo.

² Jisu kughapesu atheshivekeu Judas ghi tipa-a ithiae, kughengu Jisu no pa khopemi sasu ghuthu kutomo tileno kuhoche.

³ Ike Judas ye achinetomi eno Farisimi, ghushimi eno achineki khemi puwukeqo ishi sasu aghutulo ighi. Panoqoye azuta, angu, amizukulu eno akuluqhe ishi peche.

⁴ Tilehi Jisu ye pa shou kiu shi nani keno thwokha ithi akehu pano azuu chesu ighi eno panoqo vilo pi, “Nonguye khuu phucheni kya?”

⁵ Panonguno, “Nazaret noghami Jisu phuchenike,” ipi khochile kelo, pano pi, “Tihu nike.” Jisu kughape atheshivekeu Judas ye panoqo sasu kumtsa puthugho ae.

⁶ Jisu no panoqo vilo, “Tihu nike,” ipi kelo panonguye shothi athiu idewove eno ayeghilo iluqive.

⁷ Itaghi Jisu no panoqo iniju, “Nonguye khuu phucheni kya?” Panonguno pi, “Nazaret noghami Jisu phuchenike.”

⁸ Tileno Jisu no pi, “Tihu nike ipi ino nongu vilo pivae. Tishiaye nonguno iphucheni aye, timi hipaqo pelo wuvepelo.”

⁹ Jisu no hipau pikeuye pano ishi piqhipuakeu shikupuni kehuke: “Apuo, nono itsuvekemiqo lakhimu puhatsumoe.”

¹⁰ Tilehi Simon Pitor ye azutakihi lakhi pecheke tipau sujopheno achinemi shou Akiqheu qeu kini ajeu kudau kusavetsu. Aqeu jeye Malkha.

¹¹ Jisu no Pitor vilo pi, “Ozuta pe asuchhilo suvelo. Niye iPuno aghime jukhu ipelo shopeniye tsukeu shomoni kesha?”

Anna zulo Jisu Sawu

¹² Ike ghushimi ngo panoqo shou kijemi eno Achineki khemi ishino Jisu kughalu puzu pa tshuluveno

¹³ pa sasu atughushi Anna lau wuve. Anna ye Kaifa ngukishiuke, Kaifa ye tipa ghulokilo achinemi shou Atou shiache.

¹⁴ Ti Kaifa no Judami vilo akukumsu tsukeuno timi lakhino timiqo ghenguno thivekeu pavi kepi pipua.

Pitor no Jisu Mtha ipi

¹⁵ Simon Pitor ngo akhopemi lakhiu pamaye Jisu papeche. Akhopemi lakhiu huye achinemi shou Atou sasu akivishi kilethi akehu pano Jisu gholono ti achinemi shou atou kilo kughaki bocho akeulo ilove,

¹⁶ ikelo Pitor ye khalau ahukikhalo puthugho ae. Ti achinemi shou Atou sasu kilethi akeu akhopeu huno khalau ideipe puzu ahukikhalo ilimi akeu putsa puzu Pitor sasu alou sailoghi.

¹⁷ Ahukikhalo ayiliu akeuno Pitor vilo pi, “Noghi timi hupau khopemi lakhike kumo kesha?” Pitor no khochile, “Moe, niye kumoe.”

¹⁸ Suthi akehu aqemi ngo aghukhemiqono amiyi pesu ami shipuzu panongu puthughono ti suhope pugha ae. Pitor ghi ighi puzu panoqo gholo puthughono ti pugha ae.

Achinetouno Jisu vilo Iniju

¹⁹ Achinemi shou Atouno Jisu vilo pa khopemi ngo pano kutsuchekeu ghili iniju.

²⁰ Jisu no pa khochile, “Niye timi kumtsu zulono piche; niye pulhapuju Sinagog lo ngo Achinekilo khile Judami kumtsuno kuhokumqo aghikeno tileno ino kutsuche; niye kusuuno kiumu pipuamoe.

²¹ Ike noye kushiye ni iniju ani kya? Khunoqomino itsa chilu puani keno tipanoqo vilo niye panongu vilo kiu piche keno inijulo, kughengu ino kiu piche keno panonguno ithi anike.”

²² Kughou Jisu no hi pikeno, tilehi puthugho akemi aghukhemi kijemi lakhino pau pesu Jisu gha puzu ishipi, “Noye ighumoke sheno achinemi shou Atou vilo tishi picheni kya?”

²³ Jisu no pa khochile, “Ino akipimipu tsa kiuala pipuaghi aye tiye kiu keno kumtsu vilo hileno pilo. Ikemu ino achipiu tsa pipuaghi aye noye kushiye ihe ani kya?”

²⁴ Tileno Anna no achinemi shou Atou Kaifa lau Jisu ye qeti tishi tshupesu puwuve.

Itaghi Pitor no Jisu Mthae ipi

²⁵ Pitor ye tikutolo puthughope ami pugha ae. Panonguno pa vilo pi, “Noghi pa khopemi gholo lakhi kekumo kesha?” Ikemu Pitor no tipau lahghi pi, “Moe, niye kumoe!”

²⁶ Pitor no akini kusale vetsukeu sholokumi lakhi achinemi shou Atou qeu ake pano ishipi. “Aghutulo noye pa gholo akeu ino ithulupuani keku?”

²⁷ Tileghi Pitor no tishi mokepi lahve; eno tipamtsa awuduno ighave.

Pilat zulo Jisu sawu

²⁸ Tileno panonguno Kaifa ki lono Ahng no achekeu akighiki kudau Jisu sawuve. Tiye inaqhe noke eno Judamiye akighiki sholokuu ilomo kughengu panonguye achine kitiqemo puzu Hechekulu libe chulu kepu shiniyeke.

²⁹ Ikehu Pilat no khalau ipeghino panongu sasu kusho puzu pi. “Timi hipau shou kiu nguku kepu sughi ani kya?”

³⁰ Panonguno khochile, “Timi hipauye alhoksa kumlami kumoke aye ninguye olau pa kugha saghini chemoke.”

³¹ Pilat no panoqo vilo pi, “Nonguno pa sawulo eno nongu yezah kiqi lono pa shou kughathalo.” Judamino khochile, “Ninguye timi khumu pithive kepu ayezah kuhae.”

³² Hiye Jisu no paye kiu kithi shi thi nani kela pipuakeu tsa shikupunikehu ke.

³³ Pilat no akighikilo ideilove eno Jisu kupuzu pa vilo pi, “Noye Judami shou Akukau kesha?”

³⁴ Jisu no inijukide, “Hiye olikhi ololono ipeghikeu pesu iniju ani keo, ikeo kutamino ighili pesu ovilo pikya?”

³⁵ Pilat no khochile, “Niye Judami kesheno! No likhi no shiayeh eno achinetomino ilau okugha saghi thono; noye kiu shive kya?”

³⁶ Jisu no pi, “Ikukaqhaye hipau yeghiqha launo kumoe, ikukaqhaye hipau yeghiqha launo keaye, Judami pelo ikughasawu pemoni kelauno ikhopemino aghu shini cheke; ikemu ikukaqhaye hipau yeghiqha launo kumoe!”

³⁷ Ikelo Pilat no pa iniju, “Tishiaye noye akukau lakhi kesha?” Jisu no khochile, “Niye akukau lakhi kepi nono pianie. Ipunukeu eno ino ayeghiqhalo ighikeu kimijiye highenguno ke: Kuchou ghili ashepe tsuniyeke. Khunono kuchou laumi keno paye isutsa inicheni.”

³⁸ Pilat no pa vilo pi, “Kiuno kuchou kya?” Pilat no hi piveno khalacheu Judami lau idepe eno panoqo vilo pi, “Niye pa pithive kepu akiqi kiumu phumlae.

Jisu Pithivenikeu Xathave

³⁹ Ikemu nongu khuayehlo akeu kiqi lono, niye Hechekulu Ghulhu atsu- tsu nongu ghenguno akughumi lakhi kuqhophetsu cheni, ike ipelo nongu ghenguno Judami shou Akukau kuqhophetsu penishi anima?”

⁴⁰ Panonguno vekipighi igha ghi pa khochile, “Timi hipau kumoe, ikemu Baraba kuqhophe tsulo!” Baraba ye heqhi-buqhi chekemi lakhi ke.