John 10 - BAIBEL (BSI)

Bheriki pesu Kimighipiye

¹ “Kuchouno ino nongu vilo pini, timi khuuno ahukikha vechesu bherikilo ilomono ala kutauno zumilisu iloghini keno paye kupukami eno suxakulumi lakhie.

² Ikemu khuuno ahukikha vechesu iloni keno pano bheriqo kheu ke.

³ Pa pelo ilopeniye khagho kheuno khaqhitsu cheni; bherino pa sutsa chilu cheni, pano pawu bheriqo aje pighi kucheni eno khalau sawu cheni.

⁴ Kughou pano bheriqo khalau saipeghi nikeno pano atughushi eno bheriqono pa papewu cheni, kughengu tipaqoye pa sutsa ithi ani.

⁵ Tipaqoye inami papewu chemoe, ikemu tipaqoye tusumi launo pove nani, kughengu tipaqoye pa sutsa mthae.”

⁶ Jisu no kimighipiyekeu tsa hipau panoqo vilo pie, ikemu pano panoqo vilo kiu piakeno panonguye ithikuthumoe.

Jisu ye Akheu Kiviu

⁷ Jisu no itaghi panoqo vilo pi, “Kuchouno ino nongu vilo pini: Niye bheriqo ghenguno ahukikha ke.

⁸ Izuu ighikemi kumtsu kupukami eno suxakulumi qoe; ikemu bheriqoye panoqo tsa initsumoe.

⁹ Niye ahukikha ke; khunono ivechesu iloni keno xalu nani; paye ipe ilolu nani eno achuqupu phulu nani.

¹⁰ Kupukamiye puka heqhi eno kutsanike ghengu likhino ighi cheni. Ino ighikeuye panongu pelo akuxu apenike eno akuxu tipau kupukunoshi apeni yeke.

¹¹ Niye akheu akiviue. Akheu akiviuye bheriqo ghenguno pa kuxu pephetsuve cheni.

¹² Aqekiqemiye akheu kumo eno bheri kipighiu kumo kehu, kughou tungtugha chekeu ithulu nikeno bheriqo qhiveno pove cheni; tileno tungtughano tipaqo tsuqu luveno hapiyepighive cheni.

¹³ Paye poveukeuye kutau ghenguno kumono paye aqekiqemi eno bheriqo ghenguno alokumsu kuhae.

^14-15 Niye akheu akiviuke. Apu no ni ithi ani, eno ino Apuh ithi ani, tihutoi ino iwu bheriqo ithi ani eno panonguno ni ithi ani. Niye panoqo ghenguno ikuxu pephetsu cheni.

¹⁶ Hipau bheri bokuthalo kuhakeu iwu bheri kutau ghi ani; niye tipaqo ghi saghi masae; panonguno isutsa chilu nani, tilehino aqo lakhi eno akheu lakhi shive nani.

¹⁷ “Ino ikuxu pephetsu eno itaghi ikhichilelu penike tsuvekeu ghenguno Apu no ikimiye cheni.

¹⁸ Khunomu ilauno ikuxu ikhilu mlae; ino ilikhi igho shi puzu ikuxu pephetsuve. Tipau pephetsuni kepu kuka ino ani, eno tipau ikhichile luvenikepu kuka ino anie. Ahza hipauye iPuh launo sughike.”

¹⁹ Atsa hipaqo pikeulo Judamiqo dolo itaghi kuqhakumla ipeghive.

²⁰ Panoqo gholo kutomono, “Timi hipauye tughami sa-anie! Paye izuwuvae! Nonguye kushiye pa tsa inini kya?” ipi ae.

²¹ Ikemu kutami khamino pi, “Tughami sa-akemiye hipaqo pichemoe! Tughamiye anhethi kighiche tsukholupe nani kesha?”

Judamino Jisu Peve

²² Jerusalem lo Alhou lau Ikhiphe tsukeu Ghulhu shinikeu ghuloki tove, tiye susutsala shiae.

²³ Achinekilo Solomon kisheqho holo Jisu no iqho-iqi akelo

²⁴ Judamino pa suhope kumqoluve eno pa vilo pi, “Noye ningu pelo khitohi okhelho apeniye kya? Nono Mesiya keaye nivilo vejoi pitsulo.”

²⁵ Jisu no khochile, “Niye nongu vilo pivae ikemu nonguno ipulumoe. Ino iPu je lono akumla shikeuno ishepe shitsu ani;

²⁶ ikemu nonguno pulumoe, kughengu nonguye iwu bheri kumoe.

²⁷ Iwu bheriqoye isutsa chilu chenie ino panoqo ithi ani eno panonguno ipape cheni.

²⁸ Ino lhokta kuxu panoqo tsucheni eno panonguye khilemu hauvemo nani; eno khunomu i-u lono panoqo suxasuwuvemla nani.

²⁹ IPuhno kiu itsuve akeno tiye kumtsu nguno akijeuke eno khunomu iPuh u-lono tipaqo suxasuwuve mlae.

³⁰ Ni eno Apuh ye lakhie.”

³¹ Judamino itaghi atu ikhipe pa veniye kuto.

³² Jisu no panoqo vilo pi, “Apu no ivilo shilo pikeu akumla kivi kutomo ino nongu zulo shivetsue; tipaqo gholo khipau ghenguno nonguye atu pesu iveni kya?”

³³ Judamino pa khochileghi pi, “Akumla kivi ghenguno ninguye atu pesu oveniepi anike kumoe, ikemu nono Alhou thaigha kehue! Noye timi keghi olikhi opesu Alhou kepi ani.”

³⁴ Jisu no panoqo khochile, “Alhou no pikeu nongu yezahlo ishi yepuani, ‘Nonguye alhouqo ke.’

³⁵ Alhou tsa khunoqo lau ighikeno tipaqo pesu alhouqo kepi ku-puani (eno kuchoyesulo pipuakeuye pevemlake.)

³⁶ Ino ‘Niye Alhou Nu ke’ ipi keghenguno Apu no kishepheno ayeghiqhalo puwukeu vilo nonguye, ‘Niye Alhou thaigha anie!’ ipini kesha?

³⁷ Ino iPu kumla shimono aghi aye ipulube kevilo;

³⁸ ikemu ino tipaqo shiaghi aye nonguno ishou pulubemo namu nonguye ikumla likhimu pulu kepue, tishianguno Apu ye igholo ani eno niye Apu gholo ani kepi nonguno mutsumishei ithi apenike.”

³⁹ Itaghi panonguno pa kughaluniye pukaputsa, ikemu panongu launo paye chesu wuve.

⁴⁰ Jisu ye itaghi Jordan hukuku-u khilehi Johan no baptiz shiachekeno tilau ide iku ngo-auve.

⁴¹ Timi kutomono pa lau ighi, eno panonguno ishipi: “Johan ye amchipu kumla kumu shimoe ikemu Johan no timi hipau ghili pikeu kumtsu kuchouke.”

⁴² Tilehi timi kutomono pa pululuve.