JOB 7 - BAIBEL (BSI)

¹ Timi kuxuye ghushimi lakhi kuxu lo kushokutsu hutoie, pano kuxuye aqekiqemi toike kumo kesha?

² Aqemi lakhino akicheqo khelho ake toike, aqekiqemino ajume kheju ake toike.

³ Aqhi atsu-tsu isajeye abokumsa likhi, kijili atsu-tsu isalaye shiluksa likhie.

⁴ Ino ihozu aye idaithuveni keu khelhoe, tsuthomoke kutolo puthopuzu pidepukhu zue.

⁵ Iphi kumtsu aphitheno chhivae eno apiyikolano aphi nhakhavae, Tishino apiyi lono anni pholeke.

⁶ Ikuxuye aye-kighichi suta nguno akumthue, huqhe kheakepu kuhano ashekha shivae,

⁷ Kumsululo, Alhou ikuxuye atuthu lakhi keku, inhethino ighowo akivi tsala ithulumae.

⁸ Nithulu akeu nhethiye khilemu nithulumae, nono iju anamu niye cheve aghiniae.

⁹ Khungkusuno jumghoi hauveke toi thivekemi ye khilemu ileghi chemoe.

¹⁰ Panoye khilemu pano kilo ideghimae, pano achekeu-a lo pa kumsuma khaveniae.

¹¹ Tighenguno niye ikichi mushope amlae: Ingu-agha ghime launo pini putsae, ikuxu kukhukimji mutsa lono mopi aniaphie.

¹² Niye azughi ghahwu keo azughi yithu keno noye akheu kughape ikhe anipe kya?

¹³ “Izuano ilokughuno tsu nani eno ilupa no ilokishikumo vepiqi tsu nani” ipi ino pi aye.

¹⁴ Nono asamoksa pesu ishi kumsa eno zuxouno ishikichi peke;

¹⁵ Ikehu hitoi aghimeshi anike zuqhu itsuquqhi pithive penikeu pavie.

¹⁶ Ikuxu ju ipumqhue, xuanike izuzuvae. Ilikhi qhivelo, ikuxuye kiumu avehu kuhae.

¹⁷ Timiye kiuepi noye pa ju ithulu acheni kya eno omlo pa shou bepe acheni kya?

¹⁸ Nono inaqhe atsu-tsu pa xuju acheni eno atuqhudo atsu-tsu pa peju acheni.

¹⁹ Ilauno kutau ighosu juwuvemono kushi auvea kya? Amiti munoqhilu kepu do likhimu ilikhi ngopelo.

²⁰ Ino axine shipaghi namu tino kiu oghuza kya? O timi jukuto chekeu: Kushiye ikughape nono miji keu kimshi ani kya? Oghenguno niye amakho kije shive kesha?

²¹ Noye ixine phevetsu mla kesha? Ikipimi noye pevetsumla kesha? Kughengu niye pai ayeghilo zuwuvenia, nono iphu namu niye aghi mae.