JOB 4 - BAIBEL (BSI)

Atsa Kuptsakile Tughiu ( 4.1—14.22 ) Elifaz

^1-2 Ino atsa pini kelo olokumopu shimoni ma? Niye atsa pimono ngomlavae?

³ Nono timi kutomo kutsuche, eno miqemilei keqo shikumto cheke.

⁴ Khualano nekiphepe iluqi eno qei nai aghi aye otsano shikumto pe puthugholu pe cheke.

⁵ Itehiye oshelo shiluksa ighi kelau ye noye kutu-u mlavae, tino oto kelauye noye kushomsano auvae.

⁶ Nono Alhou gihu chekeu huno ousu kumo keshea? Okuxulo tiche tighe kuhakeu huno owu lajupu kumo kesha?

⁷ Kumsujulo, khileno kumu pimimo kemi hauve aghi kya? Khileno akumzumi kuxu pukahvetsu aghi kya?

⁸ Ino ithulupuakeu no khunono kusakugha hokide acheni keno eno akupuna xusu cheni keno, ti xolu chenie.

⁹ Alhou tuthu kufu lakhi lono panongu puhave nani eno pa loghu kighidelo panonguye kutsave nani.

¹⁰ Abongushu toi kusakughami no ahutsughu igha cheni ikemu Alhou no panongu hasuve cheni panongu hu ghachhevetsu cheni.

¹¹ Abongushu no kumu tsumla no chukepu kuhave keshi panonguye thive eno pano tianuliye piyi ghive cheni.

¹² Ghuthu lakhi asutsa lakhi kusuu no ilau ighi, ikini lo chhu chhu shikeu likhi chilu.

¹³ Timino zucheyi akelo asamo lhoksa no haputhuve ketoi.

¹⁴ Niye thughuyive eno khokhoshi ithauve, iphi kumtsu akumsa launo khokhoshi ithauve.

¹⁵ Aghahwu lakhi no igi fu ghi vechewu, iphilo asa kumtsu ithowuve.

¹⁶ Kiu kela tshumu shimono igizulo puthugho akeu ino ithulue, ikemu niye tipau ju michimlae. Inaqhoike lono asutsa lakhi ino chilu:

¹⁷ “Timi thiveni kuau noku-u Alhou zulo amikucho shiluni kya? Kiptimi mu pa lhokeu zulo mithe kulupu kesha?

¹⁸ Alhou ye pa ghinimi mu pukhubelu chemoe, paw kungumi kipimi ghi phu chenie.

¹⁹ Tishi aye ayeghino lhokemi eno ayeghi mukhuno atsukucho shikemi, amimi toi nedave luni keqo shou Alhou ye pukhubeluni kesha?

²⁰ Panonguye tsukuzu lakhi dolono heqhiluve chenie khunomu mthano panonguye hauve cheni.

²¹ Panono akeu kumtsu ikhisuwuve namu alokutsu phukhamla no thive chemo kesha?”