JOB 2 - BAIBEL (BSI)

Satan no Job Ghujukithe

¹ Itaghi kungughami no AMPEU zulo hekutsuwo ngokeu tsala ighi kelo, Satan ghi panongu gholo ighie.

² AMPEU no Satan vilo iniju, “Noye khilauno chenia?” Satan no khochile, “Niye ayeghi vehomuxa susu hule hile checheke!”

³ AMPEU no pi, “Noye iqeu Job jukuto ju akema? Pa toi kemi amikucho achipiu kuxu xukemi eno axine theqhikulumi lakhimu ayeghilo kuhae. Kumu shimo amu opelo pa kutsavepe lopi nono ihakutho kemu itehi kuto pa mikucho phe mphie.”

⁴ Tile Satan no AMPEU vilo pi, “Akuxu no akuxu theli, timi ye xu aghikulupu shiaye pano akeumu kumtsu tsuve nanie.

⁵ Tsalanomu nono o-u chhope pa phi mpi kutsave tsu aye, ogilo musute sutsu nanike.”

⁶ Ike AMPEU no Satan vilo pi, “Tishiaye-a, pa kughape ogho shilo, ikemu pa kuxu luvetsu kevilo.”

⁷ Satan no AMPEU zulono wuve puzu apiyi pesu Job kishe lono apukhu mutsu kuto piyi ipeghipe.

⁸ Ike Job ye pa piyi chuxani ke alitsa ikhi pesu ayevulo iqae.

⁹ Tileno pa nipu ghi ishi pi, “Itehi kuto omikucho phemoni kesha? Alhou ghusho no thivelo!”

¹⁰ Ikemu Job no li vilo pi, “Noye mbomzumi tsa toi pi anie. Alhou no kiwala akivi ningu tsu aye alokivishi ikhilu cheni. Pano shiluksa puwutsu kelo muchho nike shea?” Aghime hi kumtsu sholue pimu, Job ye kiumu Alhou shou axine tsa piqhimoe.

Job Shounoqo Ighi

¹¹ Timi hipano kuthu ye Job shou noqo ke - Elifaz no Teman phughilomi, Bildad no Shuwa ghakhumi eno Zofar no Nama no ghakhumi. Job no aghime sholu ani pikeu chilu kelo panonguno pa mlo vepiqi eno pa lokughuno tsunike pututa-a qhiveno kumtsa ighie.

¹² Panonguno putou chephi lono Job ithulu ikemu paju michi mlave. Paju michilu kethiu panonguno ighamuku qauve. Amlo ghime launo panonguno aphi u-akeu suxu eno ayeghi mukhu kungu-u epuku eno panongu kutsuqa shou ebe.

¹³ Panonguno putho tsala tsuni pucho tsala tsuni kutolo atsa lakhimu pimono pa phivilo ayeghi shou iqa. Kughengu panonguno ithulukeu no Job ye shishe aghime shi aghie.