JOB 16 - BAIBEL (BSI)

Job

^1-2 Ino tikithipu azuu no chilu ighivae, nonguno aghime likhi pesu timi lokughunotsue.

³ Atsa kuza ashekichi havea kesha? Momu ohakutho pesu ishi pichile auvea kya?

⁴ Tsala ningu a-a kililuke aye, nighi nongu toi thwokha pilunike; Ino atsa kime-kime pesu nongu shou piqanike, eno nongu jupe ikutsu kunguni ke.

⁵ Momu shikumto keu tsa pinike eno ikichi kukulono nongu lopiqitsuni.

⁶ Ino pini aye ikusuno iquhmoe eno ino inaqhoive pimu tino iphemoe.

⁷ Alhou no ighimeqhi anie, pano niqomi kumtsu pithivepe ke.

⁸ Pano ishikighichive ke tino iwu thopi ke; niye aghi kumsavae eno tino ighime ghili pitsu auveake.

⁹ Pano imithike eno aloghu lono isutha piniyike, iju puzu pa hu tsughububushie; ighumino pa nhethi xukidepe iju ke.

¹⁰ Timino iju puzu abaxa muku anie, ithaigha ghi igimuchulo ghatsue eno hekutsu no imithi anie.

¹¹ Alhou no ikughape kuthakughami tsuvae, kusakughami ulo itukulu suvetsue.

¹² Niye inaqhoi xu acheke pano iyi qhike, pano iku-o lono tsuqupe isukuchoqhie, eno ikughape qhino vemiji michipu shi anie.

¹³ Aqha kumtsu lono pa leghuno ika anie pano iwu kighinoli kumtsu vezuli, eno itithi ayeghi shou ijiqi anamu kimiyekeu kuhae.

¹⁴ Ino shokukha mlapuakeu pano anguno anguno vexu ighie pano aghutomi toi ihaighi anie.

¹⁵ Niye muloqa eno thoilaphi ue ikumto kumtsu ayeghi mukhulo ilovae.

¹⁶ Qakeu lono inhebo khoivae eno inhethi ingughui puzu ilenheivae.

¹⁷ Ikemu niye kiumu kutsakungo puamoe, eno ikighini ghi kuchou ke!

¹⁸ O ayeghi, iji kusuvetsu kevilo eno achipiu xatha tsu peniye ighachekeu pelo ngovepe kevilo!

¹⁹ Itehimu kungughalo iwu thopi anie, eno isakuphuuye kunguu anie.

²⁰ Ikusamino ithaighae, Alhou lau inhezu pijie.

²¹ Tishi anguno timino akusami ghenguno pitsuke toi khuala pelo ighenguno Alhou putsatsu penishie.

²² Kughengu ampe kushuwa kumothiu niye ideghimo nikeu la zusu wuveniae.