JOB 11 - BAIBEL (BSI)

^1-2 Atsa kichi khochilemono ani kesha? atsa chilo pilu keu lono timi lakhiye achipiepi pilu nani kesha?

³ Job, otsa kusano kutami hasuve niye ani kesha? eno nono kutha kugha tsa pi keghi oshikujomoni kesha?

⁴ Kughengu nono pikeuno, “Ino piqhikeuye kuchoue, niye Alhou zulo muqhamiqhiyi anie” ipie.

⁵ Alhou no pa mutsu xukhono oputsa penishie!

⁶ Tishianguno alokutsu kisheno ithi cheni keno ovilo pipeni ke. Kughengu Alhou no ithikuthu akeu ye ajolha ajolha anie. Ithilo, Alhou ye oxine jume nguno akimkheu oshou betsu anie.

⁷ Noye Alhou wu tuqho tughou phu kulupu kesha? Noye Tuchomujokutsuu shekichi phukulupu kesha?

⁸ Hiye atsutsu nguno akiqheuke noye kiumu shimlae? Hiye kithila nguno akuthou, nono hi ithini kesha?

⁹ Hiye ayeghiqha nguno akushuue, eno azughi nguno aqha kijeke.

¹⁰ Pano vechesu wuche puzu, okughape akughushi eno atsa kukughalo sawunamu khuno pa hakha kulupu kya?

¹¹ Kughengu pano ghaghumi ithi ani; eno lhoksakugha ithulu aye paye jukutomo nikesha?

¹² Aghalo kua gadahano timi piti kethiuno mbomzumino alotsu ipeghini aphie.

¹³ Nono omlo vejoi kutope aghike aye, eno o-u Alhou lau chhopuwo ke aye!

¹⁴ Lhoksakugha o-u lo aghiaye kushuwa lo kuza puwu velo. Akivikumo ogholo aghi pe kevilo.

¹⁵ Tishiaye noye atiche kiumu kuhano akijevilelu, iqemo eno msamo nani.

¹⁶ Nono shiluksa kumsumaluve nani, zuqozu toi tipaqo hauvekeu nono kumsulu nani.

¹⁷ Okuxu ye pucho tsala kumgho nguno alau vuqai nani, akuxulo akuzu sholue pimu tino inaqhe hutoi vuqai nani.

¹⁸ Lajupu ani kehu noye mutsuqhei xulu nani, Alhou no osusho pesu noye akulho qhilu nani.

¹⁹ Nono aghumi msamono zuhulu nani eno timi kutomono okukuphu iniju nani.

²⁰ Ikemu kusakughami nhethiye zamemeive nani, panongu sheloye ijehkulupu have nani, panongu kuxu wu lajupuye akithipuke.