JOB 10 - BAIBEL (BSI)

¹ Ikuxu ju ingaghai vae, imlo kishikumo kuqhole niae, ikuxu kukhu kimji qhemi lono piniake.

² Alhou vilo ishi pini aphi, “Ipesu kusakugha shitsukevilo, ikipimi kiu ani kela ipithi tsulo.

³ Noye mughachhoyi ani keu pavi kesha? Nono lhokeu jumithi nishi kesha? Ikemu kusakughami no kuchughu akeu loye azukuvu auve ishi kesha?

⁴ Noye anhethi puani kesha?Maye, timino ithuluke toi ithulu cheni kya?

⁵ Otsalaye timi tsala paphi kesha? Maye, ompeye timi kuxu mpe paphi kya?

^6-7 Niye kuqu puamoe pi nono ithi ani, eno o-u lono khuu nomu ixaphe mlae pi ithi apulaghino, noye kushiye ikipimi phucheni eno ixine lhe cheni kya?

⁸ O-uno ikoghe mlatsu eno ilhoke, eno itehiye noye idewo ikutsave anie.

⁹ Kumsujulo, nono aghani pesu ilhoe, noye ikughape ayeghi mukhu kughulhoveni kesha?

¹⁰ Nono akichhizu toi ilhophe athachi toi chetho ipeghi pe,

¹¹ ighi anhu kimetsu eno ayiko ngo apiti pesu ikuzu tsuke kumo kesha?

¹² Nono akuxu eno qhuivulai keu ghi itsue, nono tuchokeu ghengu lono ingugha khekuto puaghi tsue.

¹³ Ikemu ino itehino ithivae, ike noye ado tipaqo kumtsulo ighenguno akimji lakhi omlolo tuqhouno pu achekena!

¹⁴ Ike, ino axine shinimalaye imiqe achekena, tishianguno ikipimi pevetsumo niyeke.

¹⁵ Ino kiuala lhoksakugha shiveaye ihakusau shive ino amikucho shimu ikijevile pemoe. Kughengu niye akukujono chhivae eno aghimeno mhoqhivae.

¹⁶ Ino qhemghai ithuche aye abongushu toi nono ihaqhie, eno akumzapu kumla mla pesu ihakhae.

¹⁷ Nono ilau oshepe sughi kithe acheni, eno ilau omlo kishikumo alau acheni, akikili eno aghukishiye alhokuthu igholo acheni.

¹⁸ Ishi keghi noye kushiye iza pelo ipunupe kya? Khunomu iju ithumla aphi lono thivepe mono.

¹⁹ Iza polono vejoi akumolo wuve keaye niye ayeghilo ighimo keu paphi shivenicheke.

²⁰ Ikuxu tsalaye ikhonheike kumo kesha? ilikhi qhivelo, tishianguno ado kitila likhimu ilopiqiluvepelo.

²¹ Ino khilehi wunicheni keno tipa-a lono khilemu ideghimae. Zuchiyi eno zumaike yeghilo wuni cheni.

²² Tiye akuzu kutho eno kubang keu ghakhue, eno tilehiye akuvu ghi akuzu paphie.”