JOB 1 - BAIBEL (BSI)

Satan no Job Peju

¹ Khaghi Uz ghakhulo Job ipikeu ache. Paye Alhou sumsa kemi eno tichetighemi kumo ikemu akumzumi eno lhoksakugha lono tsughuve chekemi.

² Paye anu tsuni eno anga kuthu ache,

³ bheri 7,000, amshi 1,000 eno gadaha 500 pighiche. Paye aqemi ghi kutomo ache eno kipela kudau timiqo gholo kinikululo atughiu shi ache.

⁴ Job nuliqo dolo kivetsughu ghi pututa ki lono aghulhu tsuche eno panongu chelimi kuthu ghi tile kusuche.

⁵ Aghulhu shikeu tsalaqo tovekeni Job no inaqhe itheno ithu puzu ati anuli khije keno akumllagho tijehi panongu shikimthe keu shi-ghi pesu Alhou mlla che. Kughengu pano kumsukeu no anuliqo gholo khualano Alhou ghusho puaghi nosa kehu.

⁶ Kughou kungughami no AMPEU zulo hekutsuwo ngoke tsala ighi keno Satan ghi panongu gholo no ighie.

⁷ AMPEU no pa iniju, “Noye khilauno chenia?” Satan no khochile, “Niye ayeghi vehomxa susu hulehile checheke.”

⁸ Tileno AMPEU no Satan vilo pi, “Noye iqeu Job jukutoju akema? Kughengu pa toi kemi amikucho, achipiu kuxu xukemi eno axine theqikulumi lakhimu ayeghilo kuhae.”

⁹ Tile Satan no AMPEU khichile, “Job ye pa zulo shiluksa kumu sholumo keghi osumsamoni kesha?

¹⁰ Nono pa kibo eno pa pighi sumxa putukhaveke kumo kesha? Pano mulakeu kumtsulo nono kumghatsue eno pa tsu-aquno aghakhu nhakha akhanie.

¹¹ Ikemu o-u chhopuwo pa pighi luvetsulo, tishi aye ogilo musute tsu nani, ogi thepe ghusho nanike.”

¹² AMPEU no Satan vilo pi, “Tishiaye! pano kiu pighi anikeno ti kumtsu oghoshilo, ikemu pa ampi shou o-u be kevilo.” Ike Satan ye Alhou zulono cheve.

Job nuli eno Kinikulu Kutsave

¹³ Ghulo lakhi Job nuliqoye panongu pamu kilo kuchu kusho shi akelau ye,

¹⁴ aghinikishimi lakhi posu Job lau ighi no pi,”Ningu ye amshi sasu alu hokide a eno gadahaqo no tipau phivilo achumza akelauye

¹⁵ zule no Shabemi no suholuve no kumtsu hasasu wuvae. Panonguno aqemi kumtsu ghiqhikhave eno ilikhi poka ighiluno hi ovilo pilu anie.”

¹⁶ Pano pi aphi lono aghinikishimi kutau lakhi ighi no pi, “Atsutsu lono amsu iqighino bheri ngo aqemi kumtsu pitiqhivae eno ilikhi poka ighilu no ovilo hi pilu anie.”

¹⁷ Pano pikha mphi lono aghinikishimi kutau lakhi ighino pi, “Khaldiami no aqo kuthu shi ighi no kemelqo ngo aqemi suholuve no kemel ye hasasu wuvae eno aqemi kumtsu ghiqhivae eno ilikhi poka ighilu no ovilo hi pilu anie.”

¹⁸ Pano pikha mphi lono aghinikishimi abidiu ighino pi, “Onu anoghiu kilo anuliqo kuchukusho shi ake lauye

¹⁹ asayeqha kudauno pasapagha kije ighi no aki fulavetsue. Eno anuliqo kumtsu veqaqhi pithivae. Ilikhi pokaighilu no ovilo hi pilu anie.”

²⁰ Ikelau ye Job no puthughove puzu pa mlo ghime launo pa ku-uphi suxuve, pa kutsu miyeve eno pa gi pishiqho pe ayeghi lo ihozuve no pi,

²¹ “Niye iza po lono kumsa ighie eno kumsa woveniae. AMPEU no tsu puzu AMPEU no ikhi suwuvae. AMPEU je shelo!”

²² Job ye hipaqo kumtsu sholue pimu axine shivemoe momu Alhou kipimi phumoe.