JEREMIYA 8 - BAIBEL (BSI)

¹ “Tipa ghulokilo Juda lo kukamiqo saghi, kijemi saghi eno achinemi ngo tungkupumi saghi eno Jerusalem lo kutami achekeqo saghi kumtsu panoqo kumoki lono khalau ikhiphe nani.

² Tipaqo hekutsu pesu qhovenike zuqhulo panoqo saghiye aghuma toi ayeghi shou dapesu anani. Tipaqoye tsukinhe ngo, aqhi eno ayepu zulo kuthole pesu qhinani, timi hipaqono thime hipaqo kimiye eno qe achenike eno panonguno hipaqo putsawu eno mlla achenike.

³ Hi lhoksakugha shiyehmi khunoqo thikhamono xuaghini keno ino panoqo halepuwuvekeu yeghilo xu aghikhani keno tipaqoye xu anikeu nguno thivekeu pavi kumsulu nani. Ni, Aqokitikhi MPEU no piqhiveake.”

Axine eno Aghime

⁴ AMPEU no pawu timiqo vilo pilopi ivilo pike, “Kughou khualano veqhiveni keno paye idethughive chemo kesha? Khualano ala vepimive aye paye tsughuchile ighi chemo kesha?

⁵ Tishiaye, iwu timiqo, nonguye kushiye ilau xaideghimono ilauno tsughusu wuvea kya? Nonguno asu-atu julho lau amlo tsu auveno ilau ideighimo pike.

⁶ Ino tsaqui inijuke, ikemu nonguno kuchou tsa pimoe. Nongu milakhimu pututa lhoksa ghenguno xaideghikeu kuhae, nongu milakhimu ‘Niye kishi akumou shive akela?’ ipi pimoe. Khurshino aghushilo posuwuke toi pututa shelo pututa lalo wuveke.

⁷ Azughau thotsu kughono ideighi kepu do ghuloki keno ithi cheni; miqhedu, akhalu eno azuhas qoghi kughono puthewo kepu do ghuloki keno ithi cheni. Ikemu iwu timiqo, nonguye ino kiu yeh lono nongu shou ayehpe cheni keno mthake.

⁸ Nonguye kishi puzu alokutsu kepi picheni eno nonguye iyezah ithi ani kepi picheni kya? Julo, ayezahqoye amikuchokumo kaku kiyemino kilive ani.

⁹ Nogholo alokutsumi shikukujove ani; panoqoye avehu kughuzu shivepe eno meluve cheni. Panonguno itsaqo peveke itehiye kiu lokutsu anani kya?

¹⁰ Tighenguno ino panoqo ki alu pesu apighimi akithemi tsuve nani eno panoqo nipu kutami tsuve nani. Kijemi kitilami kumtsuno amikucho kumo lono pisa kuphumi shi achenike. Tungkupmi ngo achinemi ghi timi pishiqhike.

¹¹ Iwu timiqo ghuzaku qoye chixesho keu likhi toi shi-ghi panonguno mla itha acheni. Thwokhalo vimo akeghi panonguno, ‘Kumtsulo vi ani’ ipi picheni.

¹² Iwu timiqo, nonguno aphikumqhupu hikithipu shikeu ghenguno nonguye kujoju akema? Moe, nonguye khilemu kujo chemoke: nonguye kujoke yeh ghi mthake! Tighenguno kutami veqhiveke toi nongu ghi veqhive nani; kughono ino nongu ghimeqhi nikeno tipauno nongu puhave nani. Ni, AMPEU no piqhiveake.”

¹³ “Timino pa thi-ghopua keu pekutsuke toi niye iwu timiqo pekutsu nishike; ikemu panonguye atsayibo athi pithimo keu toike; khughubo athi pithimokeu toike; anipa ghi thizumuyive. Tighenguno ino khalaumi pelono aghakhu luvepe nikeu pulovetsuake.”

¹⁴ Alhou wu timiqono ishi iniju, “Ninguye kushiye inaqhoi iqa ani kya? ighilo, ningu aliwo putupuakeu phughiqolo posu wuni eno tilano thinike. AMPEU niLhou no thipe nikeu shi nishou kughathavae; ninguno pa shou axine shike ghenguno pano nipelo yepenike tughuzu tsuke.

¹⁵ Ninguno alokughuno eno shipivikeu do ghuloki laju ake, ikemu tiye avehu kuhae; tipau zuqhulo shipughuqhi keu ighike.

¹⁶ Ni ghumiye Dan phughilo iloghivae; panoqo wu khurshi no khur khur shi igha keu ninguno chilu ani. Kughou panoqo-u khurshi ighi keno aluzaqha kumtsuno itha ani. Nighumino niyeghi eno tile aghikeu kumtsu eno niphughi ngo tile timi akeqo kumtsu kutsave nike ighi ani.”

¹⁷ AMPEU no pi, “Jupuwulo! Ino nongu gholo apighiqo puwu ani, tughu kupu pighi khunomu zumlakeu puwu ani eno panonguno nongu mighiqhi nani.”

Jeremiya Mlokusa

¹⁸ Imlo kusaye shipivimlae; niye amlo lono su ani.

¹⁹ Inijulo! Aghakhuqha kuchopulo iwu timiqono ishi igha akeu chilu ani, “AMPEU ye Zion lo ngo chemovea kesha? Zion kukauye tilehi kuhavea kesha?” AMPEU, panoqo kukauno khochile, “Kushiye nonguye asu-atu mllakeu lono eno nowu inaghami lhouqo lau itsaiqi mllakeu lono iloghu shikighideve kya?”

²⁰ Timiqono ighamuku pi, “Mutsutusho wovae eno ghile huqhivae, ikemu ninguye xalu movae.”

²¹ Imlo itapinyive kughengu iwu timiqoye hethapinyiveke; Ino mloqah; amlo ghujuno itshuluvae.

²² Gilead lo kusughu kuha kesha? Tilehi shikipivimi kuha kesha? Tishiaye, kushiye iwu timiqoye shipivivemo kya?