JEREMIYA 7 - BAIBEL (BSI)

Jeremiya no Achinekilo Kutsu

¹ AMPEU no Achineki khaghalo ipuwuke Juda lo akemiqono mllaniye wuchekeulo.

² Pano ivilo tilehi puthughono Aqokitikhi MPEU, Israil Lhou no panoqo vilo pikepushi akeu pesu asheshulo pike:

³ “Nonguno xuchekeu laghi eno mlaithache keu laghi kilivelo eno ino nongu pelo hilehi xu acheuve penike.

⁴ Pishiqhikeu tsa hipaqo pulu kevilo, ‘Ninguye kiumu shimo nanike! Hiye AMPEU chinekike, hiye AMPEU chinekike, hiye AMPEU chinekike!’

⁵ “Nono xuchekeu laghi kilivelo eno nonguno shichekeu thimeqo shikevilo. Nongu lakhino lakhi lau achipi lono peithakilelo.

⁶ Tusumi ngo mighimgha eno chimemiqo shou akumou shikevilo. Ayeghi hipaulo kiumu shipuamokemi ghiqhi kevilo. Kutau lhouqo mllakevilo kughengu tipauno nongu kutsave nanike.

⁷ Nonguno kililuve aye ino nopuasu mheghipushi tsupepuakeu yeghilo ino nongu pelo xuachepe nanike.”

⁸ “Julo, nonguno pishikiqhi tsa pukhuke.

⁹ Nonguno puka, ghiqhi, salhashupu, tushoqhi kelo akimki tsa pi, Baal lau lhoxu heqhipe mllake eno nonguno puzuu mthakeu lhouqo mllake.

¹⁰ Nonguye ino jumithikeu thime hipaqo shicheni eno tishi puzu igizulo, ichinekilo puthugho puzu, ‘Ninguye kiumu shimoe!’ ipi cheni.

¹¹ Ichinekiye heqhi suxakulumi kughutshua kepi nonguye kumsu ani kesha? Nonguno kiu shiani keno ino ithulu khavae.

¹² Shilo lo wulo, mlla penikeu-a ino kishelu tughiu-a lakhike, eno iwu timi Israilmi xine ghenguno ino tipau pesu kiu shive keno julo.

¹³ Nonguno axine hipaqo kumtsu shi acheni eno anguno anguno ino nongu vilo pi anamu nonguye initsumono miliveke. Ino nongu kukelo nonguye khochilemoke.

¹⁴ Tighenguno Shilo shou kiu shikeno nonguno pukhu achekeu ichineki hipau shou ghi ino shitsu nanike. Ino nongu puasu ngo nongu tsukeu-a hipau lono ino Shilo shou shike paphi lono ino tipau shinanike.

¹⁵ Ino no sholokumi Israil lo akemiqo haphevekeu toi igizu lono ino nongu hapheve nani. Ni, AMPEU no piqhiveake.”

Timiqo Ghokulukumo

¹⁶ AMPEU no pi, “Jeremiya, noye timi hipaqo ghenguno khuini kevilo. Panongu ghenguno khuini momu igha kevilo; iqhuiniju kevilo kughengu niye otsa initsumo nanike.

¹⁷ Juda phughilo ngo Jerusalem laghilalo panonguno kiu shi ani keno noye ithumla kesha?

¹⁸ Itimino sukughupu su pesu ighi, timi qono ami shipe qhi eno totimiqono asho kununo panonguno kungugha kukaliu ipichekeu lhouliu ghenguno asho shiniyeke. Ighuzaniye panonguno kutau lhouqo ghenguno mllakeu tsayiji ghi leqhitsuke.

¹⁹ Ikemu kuchouno panonguye ighuza ani kesha? Moe, panonguye pano likhi panoqo ghuza ani eno panoqo shou akukujopu sughi anike.

²⁰ Tighenguno ni, AMPEU Alhou no iloghu kighide Achineki hipau shou lepuku nani. Timi shou ngo lhoxuqo shou aphiphi shi ino tipau lepuku nani, eno asubo ngo axabo shou ghi lepuku nani. Iloghuye, timi khunomu pinhemla keu mi toi nani.

²¹ “Iwu timiqo, akumllagho hamiye akuchopu akipti alono nonguno piti cheni eno hamiye nongu pelo chu cheni peke. Ikemu ni, AMPEU no piakeuno nonguye tipaqo kumtsu chukha kepu shilu nanike.

²² Ino nopuasuqo Ijip lono saipeghikelo niye panoqo vilo pitikeu kumllagho momu akumllagho jeli kutau lakhimu ahza tsupuamoe.

²³ Ikemu ino ahza tsukeuye igholulo pike, tishianguno niye panoqo Lhou shi eno panonguye iwu timi shipeniyeke. Ino panongu vilo pikeuno ino ahza tsukeu pesu xulo pike tishianguno panoqo ghenguno thwokha akivishi achepe niyeke.

²⁴ Ikemu panonguno agholumoe momu amlo tsuqhiyimoke. Tishinike zuqhulo panoqo mlolo kuthovi keu eno kusakughano panoqo vilo shilo pikeu shiwukhaveke, eno panonguye akiviu shinike zuqhulo alhoksau shikithe wuveke.

²⁵ Nopuasuno Ijip lono ipeghikeu tsala lono hipa tsala kutolo ino iqemi tungkupumi nongu lau puwu acheni.

²⁶ Ikeghi milakhi nomu initsumo momu amlo tsuqhiyikeu kuhake. Tishinike zuqhulo nonguno nopuasu nguno alau kuthovi kithe eno hebide kitheke.”

²⁷ “Jeremiya, tighenguno nono atsa hipaqo kumtsu pesu iwu timiqo vilo pinani ikemu panonguye otsa initsumo nani; nono panoqo kunani kemu panonguye okhochilemo nani.

²⁸ Nono panongu vilo pinanike pano shiayeh ye pano Lhou AMPEU, igholumoke, momu pano ghimeqhikeu lono ghi ithikeu kuhae, Amikuchoye thivae, tipau ghili pikeu ghi pimovae.”

Hinom Khilalo Axine kumla

²⁹ “Mlo qahlo, Jerusalem lo akemi; nongu kutsusa ghope pevelo. Naghuto kutsuqalo akithilo le lakhi phelo, kughengu ni, AMPEU ye aloghu ide ani, eno iwu timiqo peveake.”

³⁰ “Juda lo akemiqono alhoksapu lakhi shipuani. Panonguno panoqo su-atu julho khikhi ino jumithi cheni keno tipau pesu ichinekilo qhike eno tipau kitiqeveke.

³¹ Hinom khilalo panonguno akipti-a lakhi Tofet ipi keu shipe qhi, tishianguno panonguno pano nu ngo angaqo amilo heqhi mllaniyeke. Niye panoqo vilo hipau shilo pi ahza tsumoe, tiye ikukumsu loghi kuhake.

³² Tighenguno aghuloki lakhi loye tipau pesu Tofet momu Hinom khila kepi kunani. Panonguno timiqo tilehi qho nani kughengu kutau khilemu panoqo qhokepu-a kuhave nani.

³³ Akithi kumoye aghau ngo tughashi chuqupu shive nani, eno khunomu lhoxu tipaqo shikumsa kemi kuhave nani.

³⁴ Aghakhuye asayeqha shive nani. Juda phughiqolo eno Jerusalem laghilalo alokivishi aloinokeu sutsa eno kulakupu ghulhulo alokivi sutsa kumtsu ino kuhavepe nani.”