JEREMIYA 6 - BAIBEL (BSI)

Aghumino Jerusalem Suholuve

¹ Benjamin lo akemiqo, xulukepu shi polulo! Jerusalem launo polulo! Tekoa lo afuko kuyighalo eno Bet Hakherem lo amichipushi ami shilo. Kutsakungokeu eno hepho pinyikeuye ahuuno ighiniye kuto ani.

² Zion phughiye jukivike ikemu tiye kutsaleve nani;

³ kukamino pano ghushimi loji sawo aphiki shi eno ngo nani. Panonguno aphughi suhupesu aphiki shiwo nani eno pututano khilehi aphiki shinishi keno tile shiwo nani.

⁴ Panonguno pinani, “Jerusalem lenikeu kutolo! kutope ngolo, ninguno puchouno lenike!” Ikemu tishi apuzu panonguno ishi pinani, “Ni hakusapu shivae, atsalaye tsuzuvae eno kijiliu yekukhuye kushuwa shiwuvae.

⁵ Ninguno putho lono lenike; ninguno aphughi liwo kuptuqo kutsalevetsu nike.”

⁶ Aqokitikhi MPEU no kukami hipaqo vilo Jerusalem sasu aghu pughu nike ghenguno asuboqo yeqhi puzu aqo-ghe puku penike ahza tsuke. Pano ishi pi, “Ino hipau phughi ghimeqhi nike kughengu hipaulo timi qodaqhi keu chhitoi anike.

⁷ Azukikhe lakhino tipaulo azu akeu anileshi pua cheke toi Jerusalem no tile alhoksa pesu anileshi pu acheni. Aphughilo shikupusa eno heqhi buqhikeu ino chilu; kusukini ngo ghuza ghugha likhi ino ithulu ani.

⁸ Jerusalem lo akemiqo, akupuna hipaqo pelo nongu lo putsutsu pelo tikumoaye niye nongu qhive nani; ino nophughi pesu asayeqha timi khunomu ngochemokeu-a kughulhove tsu nani.”

Hekibideu Israil

⁹ Aqokitikhi MPEU no ivilo pike, “Israil ye atsayi lu lakhilo atsayithi kumtsu xolukhave keu toi mithemitheive nani. Ikehu noye ado aphi lono nono shiluke thaqhu timi kumtsu hakhophelulo.”

¹⁰ Ino khochile, “Ino panoqo vilo pinikelo eno panoqo kutughuni kelo khuno itsa initsuni kya? Panonguye kuthoviloke eno atsape initsumo kepike; nono ivilo pilo pikeulo panonguno junuke.

¹¹ AMPEU, panoqo shou ologhu akeu huye ilolo ghi pitipuzaqhi ani eno niye tipau suchile pesu ngo nikeu ngosumlavae.” Tileno AMPEU no ivilo pi, “Iloghu pesu alaghilalo ititunu akeqo shou eno lhothemi kumqo akeqo shou lepukulo. Akimiqo eno anipunoqoye kughasawuve nani eno kutamiqo ghi phemo nani.

¹² Panoqo kiye kutami tsuve nani eno panoqo luza ngo panoqo nipu ghi titoi tsuve nani. Niye hipau ghakhulo akemiqo ghimeqhini cheni.

¹³ Kijemi kitilami kumtsu amikucho kumo lono alla kighishe cheni aghukha shi acheni ke; tungkupumi ngo achinemi thotsu timi pishiqhi cheni.

¹⁴ Iwu timiqo ghuzakuqoye kuxushope akeu paphi lono panonguno mla itha cheni. Kumtsulo akivishimono akelo ghi panonguno, ‘Kumtsu vi ani’ ipi cheni.

¹⁵ Panonguno aphi kumqhupu hikithipu shikeu ghenguno panonguye kujo cheni kesha? Moe, panonguye kiumu kujo chemoe panonguye kujoke yeh ghi mthake. Ikehu kutamino ikiqiveke toi panongu ghi ikiqive nani. Ino panongu ghimeqhi aye tino panoqo shekha shive nani. Ni, AMPEU no piveake.”

Israil no Alhou laghi Peve

¹⁶ AMPEU no pawu timiqo vilo pi, “Alaghi shokuba lo puthughono julo. Khaghi laghiqo inijulo eno ala akiviu khile anikeno inijulo. Tipaulo chechelo eno nongu ye alokiqipushi xulu nanike.” Ikemu panonguno pi, “Moe, ninguye tishimoe!”

¹⁷ Tileno, AMPEU no aghukheu kutope qhi eno afuko lono kutughu keu inipeniyeke. Ikemu panonguno pi, “Ninguye tipau inimoe.”

¹⁸ Ikehu AMPEU no pike, “Inilo, nongu ashiayehqo, iwu timiqo lau kiu shini cheni keno tipau ithilo.

¹⁹ Ayeghi, inilo! Julo, ino timi hipaqo shou alhoksapu sughini cheni tiye panoqo wu muqumugha ghenguno, kughengu panonguye ino kutsukeu peveke eno itsa papelumoke.

²⁰ Panonguye kushiniye Sheba kudauno musughuta ilau sughi cheni momu aghache yeghi lono vekuju mukhu sughi cheni kya? Niye panoqono akumllagho tsukeu lutsumoe momu panoqono lhoxu heqhi itsukeulo aloqimoke.

²¹ Ikehu ino timi hipaqo pelo kupuxalupe eno veqhipe nani. Apunoqo ngo anuliqono thive nani, tihutoi shompami ngo akisughumi ghi thi nani.”

Ahuuno Leighikeu

²² AMPEU no pi, “Ahuu akeu ghakhu lono timiqo cheni; putou akeu shiayeh kije lakhino aghu shinike kuto kugho ani.

²³ Panonguye panoqo suzu eno azutakihi pepuluvae; panoqoye ayikusa eno kimiyemo mithe kemike. Panonguno khurshi shou chechekelo tiye azughi ghugha toi asutsa shicheni. Panonguye Jerusalem shou aghu shi nike kutope ani.”

²⁴ Jerusalem lo akemiqono pi, “Ninguno asutsa hu chiluvae eno ni uye inayi iqivae; ninguye totimino punu akelo toi amloksa ngo aghimeno nitshuluvae.

²⁵ Ninguye aluzalo wu nikeu momu alaghilo cheche nikeu ighuvae kughengu nighumiye aghunanu puani eno akuighupuno nisuho luvae.”

²⁶ AMPEU no pawu timi vilo pi, “Yeqhiye phi ulo eno ayevulo ihilo. Nonguno anu lakhi likhi akeu shou qa keshi anhezu piji qalo, kughengu nongu kutsaniye che keuye zuleno nongu leighi nani.

²⁷ Jeremiya, timino ayi ghujuke toi iwu timiqo pejulo eno panonguye kiu toi anikela julo.

²⁸ Panonguye kumtsuno hebideghi kuthovi acheni, ayi eno alazayi toi tsatsayike. Panongu kumtsu mithe movae, iqho iqi pipusa acheni.

²⁹ Pitikeu miphokiye igha piti ani ikemu ayi bazuye azu ilhoveno qowuve moke. Iwu timiqo qhukimthe anikeuye adouke kughengu khunoqono alhoksa keno tipaqo ikhivemo kehue.

³⁰ Panonguye amekuha keu bazu ipi kunani kughengu ni, AMPEU no panoqo peveake.”