JEREMIYA 52 - BAIBEL (BSI)

Jerusalem Ikiqive

¹ Kughou Zedekiya no Juda lo akukau shilu keno pa punu mpeye muku qhaqhi shiake, eno pano Jerusalem lo ampe chighi qhaqhi ayehpeke. Paza jeye Hamutal, liye Libna phughilo Jeremiya kutami achekeu nongake.

² Akukau Jehoiakim no shichekeu toi akukau Zedekiya ye AMPEU shou axine shike.

³ AMPEU ye Jerusalem ngo Juda lo akemiqo shou ighono aloghu ideve kehu panoqoye pa gizu lono hapupokhaveke. Zedekiya no Babilon kukau Nebukadnezar shou hebideke,

⁴ ikehu Nebukadnezar no pawu aghushimi kumtsu gholono ighi eno Zedekiya no kakeu ampe atokuulo aqhi achighiu tsala achighiu lono Jerusalem leke. Babilon ghushimino aphughi nguno khalau apusho shipe qhi eno tipau sumxa pesu ayeghi toghi ghowo,

⁵ eno Zedekiya no kakeu ampe chighi aqhaqhiu kutolo tipau khasu pesu bothasuluve.

⁶ Tipa mipelo aqhi abidiu atsala atokuni lo, puqumiyekeu shishe ihulove puzu timiqoye chukepu kiumu kuhave keulo,

⁷ aphughi putupuakeu tuxu ipeke. Babilonmi no aphughi suhupe aepinamu, putho lono ghushimiye kumtsu polukhave. Panonguye kukami ghutu akeu lalono cheve puzu putupuakeu jolha kini kikime kikha laghi vechesu wuve eno Jordan bokhu kudau kohapove.

⁸ Ikemu Babilonmi ghushimino Akukau Zedekiya papewu eno Jerikho kupunulo aqa lono pa kughaluve, ike pawu ghushimi kumtsu pa qhiveno kohapove.

⁹ Zedekiya ye Akukau Nebukadnezar lau sawuve, paye Hamat ghakhulo Ribla phughilo ake eno tilano Zedekiya shou Nebukanezar no kughathabe keu tsa pivetsu.

¹⁰ Ribla lo Zedekiya no ju apulaghino Nebukadnezar no Zedekiya nuliqo pithivetsu eno pano Juda lo kijemiqo ghi ghiqhivetsuke.

¹¹ Tipathiu, pano Zedekiya nhethi lejovetsupe eno ayikichheno tshupe Babilon lo sawuve. Zedekiya ye pano thimoke kutolo Babilon lo akughukilo acheuve.

Achineki Kutsaleve

¹² Babilon lo Nebukadnezar no kakeu ampe chighi atokuu, aqhi apunguu eno atsala achighiu shiakelo Akukau mijekutsuu eno aghushimi shou zahtsuu shiakeu Nebuzaradan no Jerusalem lo iloluve.

¹³ Jerusalem lo pano Achineki ngo Akukau kighiki eno timi akhotomiqo ki kumtsu pitilevetsu;

¹⁴ eno pawu ghushimiqono aphughi putupuakeu tupholevetsu.

¹⁵ Tishi puzu aphughilo timi khije aghikeno Babilon lo sawuve, tiye akumla shikithimi qhipuaghikeqo eno timi Babilonmi lau posusu wuve keqoke.

¹⁶ Ikemu Juda lo timi ighono kumlhomiqo khunono aki alu kuha keno tipaqoye pano qhive, eno pano tipaqo pelo atsayilu ngo alu chipe nikeu shivetsu.

¹⁷ Babilonmino Achinekilo alazayino shikeu ahutshu ngo mishikulu kubopinyive tsu eno tipa gholono alazayi tughuko ghi kubovetsu eno panonguno Babilon lo alazayi kumtsu pesu wuve.

¹⁸ Ami kihipu-yi ghi eno akipti-a shikimthe chekeu ayevu yili, lhoxu heqhi mlla keulo aji migheluve chekeu chithakhu, tsungquikeu ta pitikelo peitha chekeu khu eno achinekilo peitha chekeu alazayi jeli kutauqo ghi panonguno pewuvetsuke.

¹⁹ Panonguno shunayi momu tsandiyino shikeu jeli kumtsu pewu khavetsu: akhu aghuloloqo, amibalu pewu chekeu khuqo, lhoxu heqhikelo aji suchekeu khu, ayevu suchekeu bohu, akulu kibepu, tsungquikeu ta ghenguno peitha chekeu khu eno atsayiji leqhini kelo peitha chekeu khuqo.

²⁰ Achinekilo qhinike ghenguno Akukau Solomon no alazayi no shikeu nhemgha - ahutshu kini, mishikulu, azu tughuko akuloghi eno amshitsu no tipau xapuqheghi shikeu, tiye mighinikeu mishisheike.

²¹ Ahutshu kumaye aphiphike: lakhikhino akiqhe lau miter tache eno veho kelo miter punguno tuxa. Tikuma alouye kubokhu eno ayiye akishilau milimiter lhotsuni pungu ke.

²² Ahutshu lakhikhi kutsuqolo alazayi pesu sukho ghi shikeu kuxapuku keu miter kini qhemghai ake eno tipau vehomxa ghi khaghatu xathi ju lono koghekughu shike, tipaqo kumtsu alazayino shikeuke.

²³ Ahutshu lakhikhilo kuxapuku keu xathi ju kumtsukelo 100 ake eno tipaqo gholo lhotoku tsughoye ayeghi kudauno jupuku ithulu ke.

Judami Babilon lo Sawuve

²⁴ Tinguno alauno, Zahtou Nebuzaradan no Achinetou Seraiya ngo pashelo aqhokigheu Zefania eno achinekilo kijemi akhotomi kutau pano kuthu akughumi shi sasu wuve.

²⁵ Aphughi lono aghushimi shou Zahtou shiakeu ngo akukau wu luthu lono mijekutsuu mitsuni aphughi lo aghikeqo ngo, zahtsuu kukuphuu ghushimi yekithi puakeu kaku kipighiu eno akhotou timi lhotsugho ishi ghi Nebuzaradan no sawuvetsuke.

²⁶ Pano panoqo sasu Babilon kukau lau sawuve, akukauye Hamat yeghi bocholo Ribla phughilo ake.

²⁷ Tilauno akukauno panoqo pesu pishipiyipe eno panoqoye pithiveke. Ike Juda lo akemiqoye halepupove keulo wuvepe.

²⁸ Nebukadnezar no timi akughumi shi sawuve kemiqo kihikutoju kelo hitoike: Pano kakeu mpe akutsuniu shiake lono timi 3023 sawuvetsu;

²⁹ Pano kakeu mpe chighi akutacheu lono timi 832 Jerusalem lono sawuve;

³⁰ eno pano kakeu mipe muku akuthuu lono timi 745 Nebuzaradan no sawuvetsu ke. Kumtsu kelo, timi 4600 sawuvetsuke.

³¹ Ewilmerodak no Babilon lo akukau shike mipelo, pano akukau Jehoiachin shou kimiyeqhiyi keu piyeke, tiye akughu shiakeu lono pa khaqhipheveke. Hiye Jehoiachin akughumi shi sawuvekeu mipe shighi akutsuniu aqhi chighi akiniulo atsala muku apunguu shi ake lonoke.

³² Ewilmerodak no kimiyeqhiyi pa peitha eno Babilon lo pa gholo kukami kutau khunoqo halesawu akeno tipaqo nguno agigihu akijeu lono pa pelo ngopeke.

³³ Ike Jehoiachin ye akughu shi achekeu phimini xakiliveno pa kuxu kupujulo akukauno alibe chuche keu alo chupe nikeu pulovetsu.

³⁴ Atsala kipetsu pano xuake thaqhulo pano avehupu shiakeu kiqi lono peithakepu kihikutha pesu tamono akukauno pa tsu ache.