JEREMIYA 49 - BAIBEL (BSI)

AMPEU no Amun shou Kughatha

¹ Amunmi ghenguno AMPEU no pikeu tsa hike: “Israil lo kiptimiqo khile ani kya? Pano yeghi sushoni kemi lakhimu kuha kesha? Kishi kelauno khunoqono Milkom mllachekemi keno timi tipaqo pelo Gad shiayeh yeghi bocho luvepe puzu tilehi kughuna anipe kya?

² Ikemu aphughi tou Raba lo akemiqo pelo aghukishi sutsa ino chilu penikeu ghuloki wocheni, ike tiye ixapinyi qhive nani eno tipaulo aphu akeqoye pitileqhive nani. Tipathiuno Israil no panoqo yeghi luvetsukemi launo pano yeghi luchileve nani.

³ Heshbon lo akemiqo, ighamukulo! Ai phughiye kutsalevae! Raba lo totimiqo, qanimulo wulo! Yeqhiye phi pepuno mloqalo. Avekughuzu shi poiqho iqilo. Nongu lhou Milkom ye pa chineki ngo pawu sakiphemi gholono hakughutsu sasu wuve nanike.

⁴ Nongu amikucho kumomiqoye qheza ani kya? Nongu kumto kuhave cheake. Kushiye nonguye no kukalo pukhubeve ani eno khunomu nongu hale musano anike pi piani kya?

⁵ Aqha kumtsu lono ino nongu shou shikumsa kepu sughini cheni. Nongu kumtsu pove nani. Milakhi khino pututa kuxu ghenguno po nani eno tishi akelo itaghi now ghushimi he kumqonikemi lakhimu kuha nani.

⁶ “Ikemu hithiuno ino itaghi Amun pesu kinikulu shitsu nani. Ni, AMPEU no piveake.”

AMPEU no Edom shou Kughathabe

⁷ Edom ghenguno AMPEU no pikeu hike: Edom lo kuamiqoye aloqhiyi kughathalu chekeu puhavea kesha? Pano lau akukumsu tsuchekemiqoye kiu shikepu keno pitsu chemovea kesha? Panoqo lokutsu kumtsu hauve akesha?

⁸ Dedan lo kuamiqo, tsughusu polo! Itshuluvelo! Ino Esao laghamiqo kutsaleni cheni kughengu ino panoqo ghimeqhini keu ghuloki ighivae.

⁹ Kughou timino atsaithi xoluni keno panonguno atsayibolo lakhikiniye qhive cheni eno kughou putholo kupkami ighini keno panonguno kiu lunishikeno tipau likhi lucheni.

¹⁰ Ikemu Esao laghamiqo qhoi xukutsuluvae eno panoqo kughutshu-a lhavetsu ake ikehu panoqoye itaghi itshu kidemla nani. Edom lo akemiqo kumtsu kutsalevae. Panoqo gholo milakhimu qhimovae.

¹¹ Nowu mighimghaqoye igholo qhivelo, ino panoqo hijuluve nanike. Nowu topuchimemino ishou pukhubelu nanike.

¹² “Timi khunoqo aghime jukhu shokuzupu shi aghimo namu tipau shokepu shive aye nonguye ghimeqhimono puwuve nani kepi kumsu ani kesha? Moe, nonguye tipau jukhu sho mayesa nani!

¹³ Ni ampino tushoqhive anike; timino tipau shou junuqhi nani eno musuinikelo tipau je peitha nani. Tipau sukumxalo aphu akeqo kumtsu alhokupujulo ixapinyive nani. Ni, AMPEU no piqhiveake.”

¹⁴ Ino pi, “Edom, niye AMPEU launo atsape lakhi ithuluvae. Ashiayeh kutamiqo pelo panowu ghushimi hekutsu kumqo puzu olepe nike kutope aghipeniye AMPEU no aghinikishimi lakhi puwuvae.

¹⁵ AMPEU no nongu pelo miqemileivepe nani eno khunomu nongu gihumo nani.

¹⁶ Nongu qhekuzano nongu pishiqhivae. Nongu musa ani kepi kumsu ake qhemi lono khunomu nongu musamoe. Nonguye naghuto kutsuqa qhemghaikeu atuxulo ngo acheni; ikemu aluqu toi qhemghai keulo xuaghi namu AMPEU no aqhou kudau nongu saiqighive nani, AMPEU no piveake.”

¹⁷ AMPEU no pi, “Edom shou kutsakungo keu ighiniye akeuye shishe akumsa kuighupu kehu vechewu chekemi kumtsuno akumsano khokhoive nani.

¹⁸ Tiye Sodom ngo Gomora eno tipaqo cheaxulo taun akeqo kutsaleveke toi Edom lau ghi tipatho shi nanike. Khuumu itaghi tilehi kughuna kithe pemove nani. Ni, AMPEU no piveake.

¹⁹ Abongushu lakhino Jordan vekudalo aghasa lono achu kumzapu atsuni akeu yeghilo ipeghikeu toi ino ighi nani eno Edommi pelo zuleno pano yeghi lono kohapovepe nani. Tipathiuno ino kishelukeu sakipheu pelo tipa shiayeh shou ayehpe pe nani. Isasu kimighilu kepu khuu ani kya? Khuno ighumono ikhu lunani kya? Ayehkipemi kiutoi keuno imujolu nani kya?

²⁰ Tighenguno Edom lo kuamiqo shou ino kughupe qhikeu eno Teman lo akemiqo pesu kiu kishiveniye kumsupu ani keno iniju khalo. Panoqo tianuli ghi sunhe sawuve nani eno timi kumtsuno thughuive nani.

²¹ Edom ikiqi keulo asutsa ihulokeu shi nanike ayeghiqha kumtsu itha nani eno kutughukile keu ghughano Akuhu Zughi kutolo tipau chilu nani.

²² Aghumino aluquno achishibo sukhopesu ihi iqighi keshi Bozra leighi nani. Tipa tsalalo Edom wu ghushimiqoye totimi no punu akeshi kichiqhipe ngove nani.”

Damaska shou Kughathabe

²³ Damaska ghenguno AMPEU no pikeu hike: “Hamat ngo Arpad phughilo kuamiqoye asutsa lhoksa chilukeu ghenguno amlo kusa shi eno amlo kupuna pesu ani. Kutakihi keuno azughi lakhi toi panoqo shou ilu ikughi ani eno panonguye iquneimlano anike.

²⁴ Damaska lo kuamiqoye miqemileike eno thughuyi musaveno kohavae. Panonguye totimino punu akelo toi su ani eno kumsa kimishipulo ani.

²⁵ Alovi achekeu phughi ajekipiu huye qhoi piyighivae.

²⁶ Tipa tsalalo aphughilo lhothemiqoye alaghila lono ghiqhi pithive nani eno tipaulo ghushimiqoye kumtsu kutsaleve nani.

²⁷ Ino Damaska putukha pe akeulo ami suvetsu nani eno Akukau Benhadad kikuloghi pitilevetsu nani. Ni, Aqokitikhi MPEU no piveake.”

Kedar Hazor shou Kughatha

²⁸ Kedar shiayeh ngo Hazor no qhasupe akeu khikhi Babilon kukau Nebukadnezar no leluvekeu kokutha bocho ghenguno AMPEU no pikeu hike: “Kedar lo kuamiqo leluvelo eno ti kipelau akemi shiayehqo kutsalevelo!

²⁹ Panoqo phiki ngo atsuaqu loji tshuluvelo, panoqo phiki lashe nhaqhikeu ngo alou aghikeu kumtsu luvelo. Panoqo wu kemel qo luvelo eno timiqo vilo ishi pilo, ‘Akumsapuno nongu suhupe ani!’

³⁰ “Hazor lo akemiqo, ni, AMPEU no nongu kutughuve anike kushuwalo povelo eno itshuvelo. Babilon kukau Nebukadnezar no nongu pithinikeu kughupesu ani eno pano hipau piani,

³¹ ‘Ighilo! Timi hupaqono kumsu akeuno panongu shou kiumu shimla nani eno panonguye sushokulu ani kepi akhanike, ninguye panoqo leluvenie! Panoqo phughiye ahukikha kuhae momu akhadu supuamoe eno kiumu pesu shokhape puamoe!’

³² “Panoqo wu kemel ngo amshi kumtsu luvelo! Timi khunoqo asa ikhonhei ghoveno ani keno tipaqo aqha kumtsulo ino halepuwuve nani, eno aqha kumtsu lono ino panoqo shou kutsakungokeu sughi nani.

³³ Hazor ye alhokupujulo asayeqha shivetsu nani, tiye tungtugha likhino ngokeu-a shive nani. Tilehi khunomu itaghi kughuna kithemove nani. Ni, AMPEU no piveake.”

AMPEU no Elam shou Kughatha

³⁴ Zedekiya no Juda lo akukau shive kemtsa, Aqokitikhi MPEU no Elam ghakhu ghenguno iputsake.

³⁵ Pano pi, “Asuzu kipemi khunoqono Elam pelo akumto shilu acheni pe keno ino tipaqo pithikhave nani.

³⁶ Ino amlhu pelo aqha kumtsu lono Elam shou mulhu pukupe nani, eno pano timino kupokichemi shisusu khuno yeghi lomu ilomokeu kuhaveke kutolo ino pano timiqo pesu aqha kumtsulo halepuwuve nani.

³⁷ Ino Elam lo akemiqo pelo aghumi panoqo pithive nishi achekemi musakutuvepe nani. Iloghu kije lono ino Elam lo akemiqo kutsaleve nani eno ino panoqo jole puhavemoke kutolo panoqo shou aghushi puwu nani.

³⁸ Ino panoqo shou kukami ngo sakiphemi kutsaleve nani eno tilehi ikuka lakhu qhi nani.

³⁹ Ikemu hithiuno ino Elam lo kuami pesu itaghi kinikulu shitsu nani. Ni, AMPEU no piveake.”