JEREMIYA 47 - BAIBEL (BSI)

Filistiya ghenguno AMPEU Tsape

¹ Ijip kukauno Gaza leighi mphi lono AMPEU no Filistiya ghenguno ilau pike Pano pike:

² “Julo! Ahuu azu ipechenike eno zuqo ghoki lakhi toi qowu chenike. Panonguno ayeghi ngo tile akeu, aphughiqo eno tile akemiqo kumtsu nhaluve nani. Timiqono kuphupe nike ku nani; ayeghilo timi kumtsuno amlo itapinyi igha qa nani.

³ Panonguno khurshi pukhu mutsu kukhukeu khurkuluno qhoqhoshi keu, akukulu pukhu kokoshikeu chilu nani. Apunoqono pano tianuli ghenguno athiu ideighimo nani; Panoqo uye aphimpi ihje pesu tuthuiju naive nani.

⁴ Filistiya kutsaleve nikeu eno Tur ngo Sidon kudauno kuphunike akeu kumtsu launo ghithave tsunikeu ghuloki ighivae. Ni, AMPEU no Filistiyami kutsaleve nani, panoqoye kumtsu Kreta sukumxa kudauno ighikemiqoke.

⁵ Gaza lo akemiqo shou amlo kusapu kije ighivae, eno Ashkelon lo akemiqoye inaqhoivae. Filistiya halau akeqoye khitotohi muloqa anani kya?

⁶ Nonguno ishi ighake ‘AMPEU ghushi zuta! nonguye ado khitotohi ghaleqhi anani kya? Obohulo idewovelo, tilau ngovelo eno akulhoqhilo!’

⁷ Ikemu ino tipau akumla shikepushi tsupe puake tiye kishi puzu akulho qhiluni kya? Ino tipau vilo Ashkelon ngo azughi sumxape achekemiqo lepenike ino ahza tsuvae.”